ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ބައިނަލްއަޤުވާމި އަދި އެތެރޭގެ ފުލައިޓް ޗެކްއިން ކުރުމަށް ބައެއް ދަތިތައް ކުރިމަތިވެފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން މިއަދު ބުނެފިއެވެ.
މި ކަމާ ގުޅިގެން އެ ކުންފުނިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ ބައިނަލްއަޤުވާމީ އަދި އެތެރޭގެ ފްލައިޓްތައް ޗެކްއިން ކުރުމުގައި ބައެއް ލަސްތަކާ ކުރިމަތިލާން ޖެހިދާނެ ކަމަށެވެ.
އެއީ، ޓެކްނިކަލް މައްސަލަތަކަކާ ހުރެ ދިމާވާ ކަމެއް ކަމަށް ބުނެ އެ ކުންފުނިން ވަނީ ފަސިންޖަރުންގެ ފަރާތުން މާފަށް އެދިފައެވެ. އަދި، އެ މައްސަލަ ހައްލު ކުރުމަށް މިހާރު އެމްއޭސީއެލުގެ ޓެކްނިކަލް މުވައްޒަފުން މަސައްކަތް ކުރަމުން އަންނަ ކަމަށް ވެސް އެ ކުންފުނިން މައުލޫމާތު ދެއެވެ.
ފުރަތަމަ ޓާމުގެ ބަންދާ އެކު، ރާއްޖޭގެ އެކި ރަށްރަށަށާއި ރާއްޖެއިން ބޭރުގެ ގައުމުތަކަށް ދަތުރު ކުރާ އަދަދު އިތުރުވެފައިވާއިރު މި ދުވަސްވަރަކީ ރާއްޖޭގެ ފަތުރުވެރިކަމުގެ ޕީކް ސީޒަން ވެސް މެއެވެ.