މި ސަރުކާރުން ހިންގާ ބޯހިޔާވަހިކަމުގެ އެންމެ ބިޔަ މަޝްރޫއު 'ރަސްމާލެ' ހިއްކުމުގެ މަޝްރޫއާ ގުޅޭ ތަފުސީލުތައް ސަރުކާރުން ހާމަނުކުރާ ކަމަށް ވިދާޅުވެ، ރައްޔިތުންގެ މަޖިލީހަށް މިއަދު މައްސަލައެއް ހުށަހަޅުއްވައިފިއެވެ.
ކ. ފުށިދިއްގަރުފަޅު ހިއްކުމުގެ މަޝްރޫއު ހިންގާނީ، ބިން ހިއްކާ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އަށް 70 ހެކްޓަރުގެ ބިމެއް ދީގެންނެވެ. އެއީ، މި ސަރުކާރުން ހިންގާ އެންމެ ބިޔަ މަޝްރޫއެވެ. މި މަހު 18 ގައި ވަނީ އެ ފަޅު ހިއްކަން ފަށައިފައެވެ.
ރަސްމާލެ މަޝްރޫއާ ގުޅޭ ތަފުސީލުތައް ހާމަކުރަން ގޮވާލައި މައްސަލައެއް ހުށަހެޅުއްވީ މަޖިލީހުގެ ނައިބު ރައީސް އަހުމަދު ސަލީމެވެ.
އެ މައްސަލައިގައި ބުނެފައިވަނީ ރަސްމާލެ ހިއްކުމުގެ މަސައްކަތަށް ކުންފުންޏެއް ހޯދި ގޮތެއް ވެސް ނޭނގޭ ކަމަށެވެ. އަދި، މި މަޝްރޫއަށް ހޭދަވާނެ ޖުމުލަ ޚަރަދު ވެސް ހާމަނުކޮށް، ކުއްލި ގޮތަކަށް މަޝްރޫއު ފެށުމުގެ ސަބަބުން އެތައް ސުވާލެއް އުފެދިފައިވާ ކަމަށް އެ މައްސަލައިގައި ވަނީ ފާހަގަކޮށްފައެވެ.
މީގެ އިތުރުން، ފުށިދިއްގަރުފަޅު މަޝްރޫއަކީ 2024 ވަނަ އަހަރުގެ ބަޖެޓުން އުނިކޮށްފައިވާ މަޝްރޫއަކަށްވާއިރު ވެސް އެ މަޝްރޫއު ހިންގުމަކީ ސަރުކާރުން ކުރި ޒިންމާދާރުކަން ކުޑަ ކަމެއްގެ ގޮތުގައި ވަނީ ސިފަކޮށްފައެވެ.
ސަލީމް ހުށަހެޅުއްވި މައްސަލައިގައި ބުނެފައިވަނީ ފުށިދިއްގަރުފަޅުން ހިއްކާ ސަރަހައްދުގެ އެންވަޔަރަމަންޓު އިންސްޕެކްޓު އެސެސްމަންޓު (އީއައިއޭ) ހަދާފައިނުވާ ކަމަށެވެ. އީއައިއޭ ހަދާފައިވަނީ ހިއްކާ ސަރަހައްދުގެ ތެރެއިން އެންމެ 2.26 އިންސައްތަ ސަރަހައްދެއްގައި ކަމަށާއި، އެހެންވެ އެއީ އުސޫލުން ބޭރުން ހާއްސަ އިންތިޒާމުތަކެއް ހަމަޖައްސައިގެން ކުރާ ކަމެއް ކަމަށް ވަނީ ތުހުމަތުކޮށްފައެވެ.
މި މަޝްރޫއުގެ ދަށުން މިހާރު ސީއެމްސީއަށް 10 ހެކްޓަރުގެ ބިން ހުޅުމާލެއިން ވަނީ ދީފައެވެ. އަދި ފުށިދިއްގަރު ފަޅުން 60 ހެކްޓަރުގެ ބިން ދޭނެއެވެ. އެއީ، 49 އަހަރާއި 50 އަހަރަށް ކަމަށް އާބަންކޯގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މީގެ ކުރިން ވިދާޅުވިއެވެ.
މަޖިލީހުގެ ނައިބު ރައީސް ސަލީމް: އޭނާ ވަނީ ރަސްމާލެ މަޝްރޫއުގެ މައުލޫމާތު ހާމަކުރަން ގޮވާލާފައި --- ފޮޓޯ/ މަޖިލިސް
ސަލީމް ހުށަހެޅުއްވި މައްސަލައިގައި ބުނެފައިވަނީ ބޭރުގެ ކުންފުންޏަކަށް ބިން ދޫކުރާއިރު އެއީ އެންމެ ފައިދާހުރި ގޮތްކަން އެނގޭނެ ގޮތެއް ވެސް ނެތް ކަމަށެވެ.
އެހެންވެ، އެ މައްސަލައާ ގުޅޭ ހުރިހާ ތަފުސީލެއް ހާމަކުރަން ސަރުކާރުގެ ކަމާ ބެހޭ ވުޒާރާތަކަށް ވަނީ ގޮވާލައިފައެވެ.
މި މަޝްރޫއުގެ ބޭނުމަށް ރައީސް ޑރ. މުހައްމަދު މުއިއްޒު ވަނީ، އެ މަނިކުފާނަށް ލިބިދޭ ޚާއްސަ ބާރުގެ ދަށުން ގަރާރެއް ނެރުއްވައި ފުށިދިއްގަރުފަޅު، ކ. ގުޅީގެ އިހްތިޞާސުން އުނިކުރައްވައިފައެވެ. އެ ފަޅުން 1153 ހެކްޓަރުގެ ބޮޑު ސަރަހައްދެއް ހިއްކާނެއެވެ. އެއީ، ރައީސް ވިދާޅުވި ގޮތުގައި ހުޅުމާލޭގެ ދެ ފިޔަވަހި އެއްކޮށްލީމާ ވާވަރުގެ ތިންގުނަ ބޮޑު ސަރަހައްދެކެވެ.
ފުށިދިއްގަރުފަޅު ހިއްކަން ފެށުން: މިއީ މި ސަރުކާރުގެ އެންމެ ބޮޑު މަޝްރޫއު -- ފޮޓޯ/ ރައީސް އޮފީސް
ރައީސް ވިދާޅުވީ އަމާޒަކީ ފުށިދިއްގަރުފަޅުގައި ތަރައްގީކުރާ ސިޓީއަކީ ޒީރޯ-ކާބަން ސިޓީއަކަށް ހެދުން ކަމަށެވެ. އަދި، އެ ތަން ތަރައްގީކުރާނީ 'މޯލްޑިވްސް އީކޯ ސިޓީގެ' ގޮތުގައި ކަމަށެވެ.
ފުށިދިއްގަރުފަޅު ސަރުކާރުން ތަރައްގީކުރަނީ 20 އަހަރުގެ ދިގު ރާސްތާގެ ޕްލޭނަކަށް ބަހައިލައިގެންނެވެ. މިއީ މާލެއާ ގުޅައިލެވޭ ވަރަށްވުރެ ދުރު ތަނަކަށްވުމުން މި ތަން ތަރައްގީކުރާނީ މާލެ ނައިސް ރައްޔިތުންނަށް ދިރިއުޅެވޭ ފެންވަރަށް ހުރިހާ ޚިދުމަތަކާ އެކު ކަމަށް ވެސް ހައިދަރު ވިދާޅުވެފައިވެއެވެ.
އެ މަޝްރޫއަށް 2025 ވަނަ އަހަރު 600 މިލިއަން ރުފިޔާ ހިމަނަން ސަރުކާރުގެ ޕްލޭންގައި އޮތްއިރު 2026 ވަނަ އަހަރު 350 މިލިއަން ރުފިޔާ ހިމަނާނެއެވެ.
މި މަޝްރޫއަކީ ސަރުކާރުގެ މުހިންމު މަޝްރޫއެއް ނަމަވެސް އިދިކޮޅު އެމްޑީޕީން ދެކޮޅު މަޝްރޫއެކެވެ. އެމްޑީޕީ މެންބަރުން ބުނާ ގޮތުގައި، އެ ފަޅަށް ޚަރަދުކުރުމުގެ ބަދަލުގައި އެ ފައިސާއިން، މިހާރު ހިއްކައި ނިމެމުން އަންނަ ގުޅީފަޅާއި ގިރާވަރުފަޅު ތަރައްގީކޮށް އެ ތަނުގައި ގޯތި ލިބުނު ރައްޔިތުންނަށް ދިރިއުޅެވޭ ގޮތް ހެދުމަކީ މި ވަގުތަށް އެންމެ މުހިންމު ކަންތަކެވެ.