ހުޅުމާލޭގެ ތިންގުނަ، ރަސްމާލެ ހިއްކަން ފަށައިފި

ރައީސް ޑރ. މުޙައްމަދު މުއިއްޒުގެ ތަސައްވުރުގައި ހިމެނޭ އެންމެ ބިޔަ މަޝްރޫއުކަމަށްވާ ފުށިދިއްގަރުފަޅު ހިއްކުމުގެ މަސައްކަތް މިއަދު ފަށައިފިއެވެ.

ސަރުކާރުގެ ބޯހިޔާވަހިކަމުގެ ސިޔާސަތުގައި ހިމެނޭ އެންމެ ބޮޑު މަޝްރޫއު ފައްޓަވައިދެއްވީ ރައީސް މުއިއްޒެވެ.

ރައީސް ވިދާޅުވީ، ފުށިދިއްގަރުފަޅު ތަރައްގީކުރާނީ ރަސްމާލޭގެ ނަމުގައި ކަމަށެވެ.

މަޝްރޫއު ފައްޓަވައިދެއްވަމުން ރައީސް ވިދާޅުވީ، މި ސަރުކާރުން ގައުމީ ބޮޑެތި މައްސަލަތައް ނަގާފައި ދެން އެންމެ ބޮޑު އިސްކަމެއް ދެއްވާނީ ބޯހިޔާވަހިކަން ހައްލުކުރަން ކަމަށެވެ. މިއަދު ފެށުނު މަޝްރޫއަކީ އެ އަމާޒަށް ވާސިލުވާން މުހިއްމު މަޝްރޫއެއް ކަމަށް އެ މަނިކުފާނު ވިދާޅުވިއެވެ.

"މިއީ މިއަދާ ހަމައަށް ރާއްޖޭގައި ހިންގާ އެންމެ ބޮޑު ބިންހިއްކުމުގެ މަޝްރޫއު،" ރައީސް ވިދާޅުވިއެވެ.

މި މަޝްރޫއުގެ ބޭނުމަށް ރައީސް މުއިއްޒު ވަނީ، އެ މަނިކުފާނަށް ލިބިދޭ ޚާއްސަ ބާރުގެ ދަށުން ގަރާރެއް ނެރުއްވައި ފުށިދިއްގަރުފަޅު، ކ. ގުޅީގެ އިހްތިޞާސުން އުނިކުރައްވައިފައެވެ.

އެ ފަޅުން 1153 ހެކްޓަރުގެ ބޮޑު ސަރަހައްދެއް ހިއްކާނެއެވެ. އެއީ، ރައީސް ވިދާޅުވި ގޮތުގައި ހުޅުމާލޭގެ ދެ ފިޔަވަހި އެއްކޮށްލީމާ ވާ ވަރުގެ ތިންގުނަ ބޮޑު ސަރަހައްދެކެވެ.

"ފެހިކަން ގަދަ، ވަރަށް ހިތްގައިމު މާހައުލެއް ލިބިގެންދާ ތަނަކަށް މިތަން ވެގެންދާނީ،" އެ މަނިކުފާނު ވިދާޅުވިއެވެ.

ރައީސް ވިދާޅުވީ އަމާޒަކީ ފުށިދިއްގަރުފަޅުގައި ތަރައްގީކުރާ ސިޓީއަކީ ޒީރޯ-ކާބަން ސިޓީއަކަށް ހެދުން ކަމަށެވެ. އަދި، އެ ތަން ތަރައްގީކުރާނީ 'މޯލްޑިވްސް އީކޯ ސިޓީގެ' ގޮތުގައި ކަމަށެވެ.

"ފަސް އަހަރު ނިމިގެންދާއިރު ބޯހިޔާވަހިކަމުގެ މައްސަލަ އެއްކޮށް ހައްލުވާނެކަމުގެ ޔަގީންކަން ތަކުރާރުކޮށް އަރުވަން،" އެ މަނިކުފާނު ވިދާޅުވިއެވެ.

މިއަދު މި މަސައްކަތް ފަށާއިރު، އަންނަ އަހަރުގެ ބަޖެޓުގައި މި ކަމަށް ހިމެނި 400 މިލިއަން ރުފިޔާ ވަނީ ބަޖެޓު ފާސްކުރިއިރު އުނިކޮށްފައެވެ.

މަޝްރޫއުގެ މަސައްކަތް ފަށާއިރު މި ކަން ކުރަން ހާވާލުކުރަނީ ކޮން ކުންފުންޏަކާ ކަމެއް އަދި ސަރުކާރުން ރަސްމީކޮށް ހާމައެއް ނުކުރެއެވެ. އަދި، މި މަޝްރޫއަށް ފައިސާ ހަމަޖައްސާ ގޮތެއް ވެސް ސަރުކާރަކުން ހާމައެއް ނުކުރެއެވެ.

https://sun.mv/185304

ނަމަވެސް އެއީ މި ސަރުކާރުގެ މުހިންމު މަޝްރޫއެއްކަމުން އެ ކަމަށް ފައިސާ ހޯދާނެ ކަމަށާއި އެ ކަންކަމާމެދު ވިސްނާނީ ސަރުކާރުން ކަމަށް ހައުސިން މިނިސްޓަރު ޑރ. އަލީ ހައިދަރު މީގެ ކުރިން ވަނީ ވިދާޅުވެފައެވެ.

ފުށިދިއްގަރުފަޅު ސަރުކާރުން ތަރައްގީކުރަނީ 20 އަހަރުގެ ދިގު ރާސްތާގެ ޕްލޭނަކަށް ބަހައިލައިގެންނެވެ. މިއީ މާލެއާ ގުޅައިލެވޭ ވަރަށްވުރެ ދުރު ތަނަކަށްވުމުން މި ތަން ތަރައްގީކުރާނީ މާލެ ނައިސް ރައްޔިތުންނަށް ދިރިއުޅެވޭ ފެންވަރަށް ހުރިހާ ޚިދުމަތަކާ އެކު ކަމަށް ވެސް ހައިދަރު ވިދާޅުވެފައިވެއެވެ.

އެ މަޝްރޫއަށް 2025 ވަނަ އަހަރު 600 މިލިއަން ރުފިޔާ ހިމަނަން ސަރުކާރުގެ ޕްލޭންގައި އޮތްއިރު 2026 ވަނަ އަހަރު 350 މިލިއަން ރުފިޔާ ހިމަނާނެއެވެ.

މި މަޝްރޫއަކީ ސަރުކާރުގެ މުހިންމު މަޝްރޫއެއް ނަމަވެސް އިދިކޮޅު އެމްޑީޕީން ދެކޮޅު މަޝްރޫއެކެވެ. އެމްޑީޕީ މެންބަރުން ބުނާ ގޮތުގައި، އެ ފަޅަށް ޚަރަދުކުރުމުގެ ބަދަލުގައި އެ ފައިސާއިން، މިހާރު ހިއްކައި ނިމެމުން އަންނަ ގުޅީފަޅާއި ގިރާވަރުފަޅު ތަރައްގީކޮށް އެ ތަނުގައި ގޯތި ލިބުނު ރައްޔިތުންނަށް ދިރިއުޅެވޭ ގޮތް ހެދުމަކީ މި ވަގުތަށް އެންމެ މުހިންމު ކަންތަކެވެ.