އައްޑޫ ސިޓީ ހިތަދޫގައި ފައިވާން ފެކްޓަރީއެއްގެ ގޮތުގައި ބޭނުންކުރި ގުދަނެއްގައި އިއްޔެ ރޯވުމުގެ ސަބަބުން ލިބުނު ގެއްލުމުގެ އަގު ހަ މިލިއަން ރުފިޔާއަށް އަރާ ކަމަށް އެތަނުގެ ވެރި ފަރާތުން ބުނެފިއެވެ.
އިއްޔެ މެންދުރު ހިނގި އެ އަލިފާނުގެ ހާދިސާގައި ގުދަން ބޭނުން ނުކުރެވޭ ވަރަށް އަނދާފައިވާ ކަމަށް އެމްއެންޑީއެފުން ވަނީ ބުނެފައެވެ.
'ސަން'އާ ވާހަކަ ދައްކަމުން އެ ފެކްޓްރީގެ ވެރި މީހާ މުހައްމަދު ޝަރީފް ބުނީ އެ ތަނަކީ 2016އިން ފެށިގެން އޭނާ ހިންގަމުން އަންނަ ތަނެއް ކަމަށެވެ. އަދި މި ފަދަ ބޮޑު ގެއްލުމެއް ލިބުމަކީ ވަރަށް ހިތާމަވެރި ކަމެއް ކަމަށް އޭނާ ބުންޏެވެ.
ޝަރީފް ބުނީ އެ ފެކްޓަރީގައި ހުރި މެޝިންތަކާއި މުދާތައް އަނދައި، ބޭނުން ނުކުރެވޭ ވަރަށް ގެއްލުން ވެފައިވާ ކަމަށެވެ.
"މެޝިންތަކާ ހުރިހާ އެއްޗެއް އެއްކޮށް އަނދާ ހުލި ވެފައު ހުރީ. އެތާ ހުރި ސާމާނަކީ ގާތްގަނޑަކަށް ބުނާ ނަމަ ހަ މިލިއަން ރުފިޔާ،" ޝަރީފް ބުންޏެވެ.
އެމްއެންޑީއެފުން އިއްޔެ ބުނި ގޮތުގައި އެ ހާދިސާ ރިޕޯޓްކުރީ 14:49 ހާއިރު ހިތަދޫ ފަޔާ ސްޓޭޝަނަށެވެ. އެ އަލިފާންގަނޑު ނިއްވާލެވުނީ 15:35ހާއިރު ކަމަށް ވެސް ސިފައިން ބުންޏެވެ.
އެ ހާދިސާގައި، ގުދަނުގެ ވަށައިގެން ހުރި ގެތަކުގެ ފާރުތަކަށް ވެސް އަލިފާނުގެ ހޫނުގެ ސަބަބުން ކޮންމެވެސް ވަރެއްގެ ގެއްލުންތައް ލިބިފައިވާ ކަމަށް އެމްއެންޑީއެފުން ބުންޏެވެ.
އެ ހާދިސާގައި އެއްވެސް މީހަކަށް އަނިޔާވެފައި ނުވެއެވެ.