ރައްޔިތުންގެ މަޖިލީހުގެ ގިނަ މެންބަރުން މާލޭގައި ނެތުމުން، ކޮމިޓީގެ ކޯރަމް ހަމަނުވާތީ ސަރުކާރުގެ ވަޒީރުންނަށް ރުހުންދިނުމުގެ ކަންކަން ކޮށް ނިންމައިލެވޭނީ ޗުއްޓީއަށް ފަހުގައި ކަމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލައި ކޮމިޓީގެ މުގައްރިރު މުހައްމަދު ފަލާހު މިއަދު ވިދާޅުވެއްޖެއެވެ.
މިދިޔަ ހަފުތާގެ ހޯމަ ދުވަހު އޮތް، މަޖިލީހުގެ ޖަލްސާއަށް ވަޒީރުންނަށް ރުހުންދޭން އެޖެންޑާ ވެސް ކުރިއެވެ. އެކަމަކު، ވުޒާރާތަކުގެ މެންޑޭޓު ފާސްކުރުމުގެ ކަންކަން ފުރިހަމަނުވާ ކަމަށް ވިދާޅުވެ، މަޖިލީހުގެ ރައީސް މުހައްމަދު އަސްލަމް އެ ދުވަހު ނިންމެވީ އެ މައްސަލަ އަނބުރާ ކޮމިޓީއަށް ފޮނުވައިލާށެވެ.
އެކަމަކު، އެ ދުވަހު ކޮމިޓީއަށް އެ މައްސަލަ އަނބުރާ ފޮނުވައިލި ފަހުން ކޮމިޓީގެ ބައްދަލުވުމެއް ބޭއްވިފައެއް ނުވެއެވެ.
އެ ކޮމިޓީގެ މުގައްރިރު ފަލާހު މިއަދު "ސަން"އަށް ވިދާޅުވީ، މި ދުވަސްވަރު ސްކޫލު ޗުއްޓީއާ ވެސް ދިމައިވުމުގެ ސަބަބުން ގިނަ މެންބަރުން މި ވަގުތު މާލޭގައި ނެތް ކަމަށެވެ. އެހެންވެ، ކޮމިޓީ ބާއްވަން ބޭނުންވާ އަދަދަށް މެންބަރުން ހަމަނުވާ ކަމަށް އޭނާ ވިދާޅުވިއެވެ.
"މި ވަރު ކަމެއް ނިންމާއިރު ތަންކޮޅެއް މެންބަރުން ވެސް ގިނަވާން ޖެހޭނެ ދެއްތޯ. ތިން މީހުން، ހަތަރު މީހުންނަށް ނިންމޭވަރު ކަމެއް ނޫނެއްނުންތޯ،" ފަލާހް ވިދާޅުވިއެވެ.
ވަޒީރުންގެ މަޖިލީހުގެ ބައްދަލުވުމެއްގެ ތެރެއިން: މަޖިލީހުގެ ކޮމިޓީގެ ކޯރަމް ހަމަނުވާތީ ވަޒީރުންނަށް ރުހުންދިނުމުގެ މަސައްކަތް އޮތީ ފަސްވެފައި -- ފޮޓޯ/ ރައީސް އޮފީސް
އޭނާ ވިދާޅުވީ، އެންމެ ފަހުން އެ ކޮމިޓީގެ ބައްދަލުވުމެއް ބާއްވަން އެޖެންޑާކުރުމުން ސަރުކާރަށް ތާއީދުކުރައްވައި ބައެއް މެންބަރުން ވެސް ކޮމިޓީއަށް ހާޒިރުވެފައިނުވާ ކަމަށެވެ.
"ކޯރަމް ހަމަވީމާ ކޮމިޓީ ބާއްވާނަން، ހަ މެންބަރުން ހަމަވީމާ ވޯޓަށް އެހެނީ، އެކަމު އެ ވަރު ވެސް ނުވެގެން މިއުޅެނީ. އަޅުގަނޑަށް ހީވަނީ ދެން މިކަން ވާނީ ޗުއްޓީއަށް ފަހުގައިހެން،" އޭނާ ވިދާޅުވިއެވެ.
ސަރުކާރުގައި ހިމެނިވަޑައިގަންނަވާ ޖުމުލަ 22 ވަޒީރުންނަށް ރުހުން ހޯދަން ސަރުކާރުން ފޮނުވި ނަމަވެސް އެ މައްސަލަ އޮތީ ކޮމިޓީގައި ހުއްޓިފައެވެ. ތަޅުމަށް އެ މައްސަލަ އެޖެންޑާކުރި ދުވަހު އެމްޑީޕީގެ ތުޅާދޫ ދާއިރާގެ މެންބަރު ހިސާން ހުސައިން ވަނީ ކޮމިޓީން ނިންމި ގޮތުގެ ރިޕޯޓު ތަޅުމަށް ފޮނުވިއިރު މެންޑޭޓު ފާސްކޮށްފައިނުވާތީ ވޯޓަށް ނޭހޭނެ ކަމަށް ވިދާޅުވެފައެވެ.
އެހެންވެ، މެޖޯރިޓީ ލީޑަރާއި މައިނޯރިޓީ ލީޑަރާ މަޝްވަރާ ކުރައްވާފައި އަސްލަމް އެ ދުވަހު ނިންމެވީ މައްސަލަ އަލުން ކޮމިޓީއަށް ފޮނުވާށެވެ.
އެކަމަކު، މީގެ ކުރީ ސަރުކާރުތަކުގެ ވަޒީރުންނަށް ވެސް މަޖިލީހުން ރުހުންދީފައިވަނީ މެންޑޭޓު ފާސްކުރުމުގެ ކުރީގައި ކަމަށް ވިދާޅުވެ، ބަންޑާރަނައިބު ވަނީ ކަންބޮޑުވުން ފާޅުކުރައްވައިފައެވެ.
ވަޒީރުންނަށް ރުހުންދިނުމުގެ މަސައްކަތް ލަސްވާއިރު، މަޖިލީހުގެ ބޮޑު މެޖޯރިޓީއެއް އޮތް އެމްޑީޕީގެ ބައެއް މެންބަރުން ގެންދަވަނީ ބައެއް ވަޒީރުންނަށް ރުހުންނުދޭނެ ކަމަށް ވިދާޅުވަމުންނެވެ.
މަޖިލީހުގެ ކޮމިޓީން މީގެ ކުރިން ވަނީ ވަޒީރުންނަށް ރުހުންދޭއިރު ތަޅުމުގައި ވޯޓަށް އަހާނީ ކޮންމެ ވަޒީރަކަށް ވަކިވަކިން ކަމަށް ނިންމައިފައެވެ. ވަޒީރުންނަށް ރުހުންދިނުމުގެ ކަންކަން ނުނިމޭތީ، މަޖިލީހުގެ މި ހިނގާ ތިންވަނަ ދައުރު ވަނީ ބުރާސްފަތި ދުވަހުގެ ނިޔަލަށް ދަންމާލައިފައެވެ.