ރައްޔިތުންގެ މަޖިލީހުގެ މެންބަރަކަށް މަހަކު ލިބޭ މުސާރައަށްވުރެ ބޮޑު ހޭދައެއް ރައްޔިތުންގެ ހައްގުގައި ކުރަންޖެހޭ ކަމަށް އެމްޑީޕީ ޕާލިމެންޓްރީ ގްރޫޕްގެ ލީޑަރު މުހައްމަދު ރަޝީދު ހުސައިން (ބިގޭ) މިއަދު ވިދާޅުވެއްޖެއެވެ.
މަޖިލީސް މެންބަރުންނާއި ރައީސުލްޖުމްހޫރިއްޔާގެ މުސާރަ ހިމެނޭހެން މުސާރަތައް ބޮޑުކުރަން އިއްޔެ މާލިއްޔަތު ކޮމިޓީން ފާސްކުރުމާއެކު ގިނަ ބައެއްގެ ނުރުހުން ވަނީ އަމާޒުވެފައެވެ.
އެކަމާ ގުޅިގެން އެމްޑީޕީ ޕީޖީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ބިގޭ ވިދާޅުވީ ރައްޔިތުންގެ ހައްގުގައި ވަކާލާތު ކުރުމަށް ރައްޔިތުން އަމިއްލަ ވޯޓުން އިންތިޚާބުކުރުމަށްފަހު އެ މެންބަރަކު މާލެ އަންނައިރު ވަރަށް ބައިވަރު ދަތިތަކާ ކުރިމަތިލާން ޖެހޭ ކަމަށެވެ.
އެގޮތުން ރަށްރަށުގައި އުޅެ މާލެއަށް ބަދަލުވާއިރު އުޅެން ޖެހެނީ ވަރަށް އުނދަގުލުގައި ކަމަށް ބިގޭ ފާހަގަކުރެއްވިއެވެ.
"އުނދަގުލުގައި ތަންތަން [ކުއްޔަށް] ހިއްޕަވައިގެން އުޅުއްވާ ވާހަކައާއި އެއްޗެހި މެންބަރުން އަބަދު ދައްކަނީ. އެހެންވީމަ އެ ހުރިހާ ކަންތައްތަކެއް ދަތިކޮށް މާލޭގަ އުޅެން ޖެހުމުގެ އިތުރުން ރައްޔިތުންގެ ކައިރިއަށް ވެސް ދާނެ ޖެހޭ،" ބިގޭ ވިދާޅުވިއެވެ.
ބިގޭ ވިދާޅުވީ، ރައްޔިތުންގެ މަޖިލީހަށް ކޮންމެ ދެ މަހުން އެއް މަހު ރިސެސްގެ ވަގުތު ލިބޭ ކަމަށެވެ. އޭގެ އިތުރުން ވެސް ރައްޔިތުންގެ ގާތަށް ރައްޔިތުންގެ ހާލަތު ބެލުމަށް ޓަކައި ވަޑައިގަންނަވަން ޖެހޭކަމަށް އޭނާ ވިދާޅުވިއެވެ.
"އެ ކުރާ ކޮންމެ ދަތުރަކީ ވެސް އިންތިހާއަށް ހޭދަކުރަންޖެހޭ ޚަރަދުތައް. އެހެންވީމަ މި ހުރިހާ ކަންތައްތަކަކަށް ބަލާއިރު ގިނަ މެންބަރުންގެ ވާހަކަތަކުން އެނގެނީ އަދި އަޅުގަނޑުގެ ވެސް އަމިއްލަ ތަޖުރިބާއިން އެނގެނީ އެ މަހެއްގައި ލިބޭ މުސާރައަށްވުރެ ބޮޑު ހޭދައެއް ރައްޔިތުންގެ ހައްގުގައި ކުރަން ޖެހޭކަން،" ބިގޭ ވިދާޅުވިއެވެ.
ބިގޭ ވިދާޅުވީ މަޖިލިސް މެންބަރުންގެ ހައްގުތައް ރައްކާތެރިކުރުމާއި އިނާޔަތްތައް ބެލެހެއްޓުމަށް ޚާއްސަ ކޮމިޓީތައް ހުންނަ ކަމަށެވެ. އަދި އެ ކޮމިޓީތަކުގައި އެ ކަންކަމާ ގުޅިގެން މެންބަރުންގެ ހުރި ނުތަނަވަސްކަން ހިއްސާކުރާކަމަށް ވެސް ބިގޭ ވިދާޅުވިއެވެ.
މިކަމާ ގުޅިގެން ސަރުކާރުގެ އިސްވެރިންގެ މުސާރަ ބޮޑުކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމީ ސަރުކާރުގެ ބަހެއް ނެތި، އާންމުންގެ މެދުގައި ސަރުކާރާ މެދު ނަފުރަތު އުފައްދަން ކަމަށް ސަރުކާރުން ވަނީ މިއަދު ބުނެފައެވެ.
އިއްޔެ މާލިއްޔަތު ކޮމިޓީއަށް ހުށަހެޅީ މަޖިލީހުގެ ރައީސްގެ ޖުމްލަ މުސާރަ 90،000 ރުފިޔާއަށް ބޮޑު ކުރުމަށާއި މަޖިލީހުގެ ނައިބު ރައީސްގެ ޖުމްލަ މުސާރަ 88،000 ރުފިޔާއަށް ބޮޑުކުރުމަށެވެ. އަދި މެންބަރުންގެ އަސާސީ މުސާރަ 57،000 ރުފިޔާއަށާއި، ލިވިން އެލަވަންސްއަށް 25،000 ރުފިޔާއާއެއްކޮށް، ޖުމްލަ 82،000 ރުފިޔާއަށް ބޮޑުކުރުމަށެވެ.
ނަމަވެސް ކޮމިޓީގައި ކުރިއަށްގެންދިޔަ މަޝްވަރާތަކަށް ފަހު އަސާސީ މުސާރައާއެކު ޖުމްލަ މުސާރަ ކުޑަކުރަން ނިންމިއެވެ. އެގޮތުން އަސާސީ މުސާރައިގެ ގޮތުގައި ހުށަހެޅި 57،000 ރުފިޔާގެ ބަދަލުގައި 55،000އަށް ކުޑަކޮށް، ޖުމްލަ މުސާރަ 80،000އަށް ކުޑަކުރުމަށް ނިންމިއެވެ.
އެހެންވެ، މެންބަރުންނަށް ކޮމިޓީ އެލަވަންސްގެ ގޮތުގައި ލިބޭ 20،000 ރުފިޔާއާއެކު ޖުމްލަ މުސާރަ އެއް ލައްކައަށް އަރާނެއެވެ.