ނަޕޯލީގެ ނައިޖީރިއާ ފޯވަޑް ވިކްޓާ އޮސިމްހެން ސައުދީ އަރަބިއާއަށް ދާން އަދި މާ އަވަސް ކަމަށާއި އެންމެ ރަނގަޅުވާނީ ޗެލްސީއާ ގުޅުން ކަމަށް ޗެލްސީގެ ލެޖެންޑް ޖޯން އޮބި މިކެލް ބުނެފިއެވެ.
ނަޕޯލީއާ ދެމެދު މައްސަލަތައް ހޫނުވެ، އޮސިމްހެން ސައުދީއަށް ބަދަލުވާން އުޅޭ ކަމަށް ވަނީ ވާހަކަތައް ފެތުރިފައެވެ. މިކެލް ވަނީ އޭނާ ކުރިއަށްގެންދާ ޕޮޑްކާސްޓްގައި އޮސިމްހެންއާ ދެމެދު އެކަމުގެ ވާހަކަތަކެއް ދައްކައި، ކެރިއަރުގެ މިހާ ހިސާބުން ސައުދީއަށް ނުދިއުމަށް ނަސޭހަތްތެރިވެފައެވެ.
"މިއީ ސައުދީއަށް ދާންވީ ވަގުތެއް ނޫން. އަހަރެންނަށް އެނގޭ އަންނަ ސީޒަނުގައި އޮސިމްހެން ގުޅޭނީ ޗެލްސީއާކަން. އެ ޓްރާންސްފާ ނިންމުމުގައި އަހަރެން އެޖެންޓެއްގެ ގޮތުގައި ވެސް މަސައްކަތްކޮށްދޭނަން. އޮސިމްހެން ޗެލްސީއާ ދާނެކަމުގެ 100 ޕަސަންޓް ޔަގީންކަން އެބައޮތް،" 'ދަ އޮބި ވަން ޕޮޑްކާސްޓް'ގައި އޮސިމްހެންއާ ވާހަކަދައްކަމުން މިކެލް ބުންޏެވެ.
އިނގިރޭސި ޕްރިމިއާ ލީގަށް ކުޅުމާ މެދު ދެކެވުނު ވާހަކަތަކުގެ ތެރެއިން އޮސިމްހެން ބުނީ އޭނާގެ ވަރަށް ޒުވާން އުމުރުގައި މެންޗެސްޓާ ޔުނައިޓެޑް އަދި ޗެލްސީގެ ޖާޒީއެއް ހޯދާފައިވާނެ ކަމަށެވެ. އަދި އޭނާ އައިޑޮލްއެއްގެ ގޮތުގައި ބަލަމުން ގޮސްފައިވާނީ ޗެލްސީގެ ލެޖެންޑް ޑިޑިއޭ ޑްރޮގްބާ ކަމަށް އޭނާ ބުންޏެވެ.
"އަހަރެން ވަރަށް ކުޑައިރު އަހަރެންގެ ބޭބެގެ ފަރާތުން ޗެލްސީ އަދި މެންޗެސްޓާ ޔުނައިޓެޑުގެ ޖާޒީއެއް ލިބުނު. އަދި އަހަރެން ގްރާސްރޫޓްގައި ކުޅެމުން ދިޔަ އިރު، ޑްރޮގްބާގެ ގޮތުގައި ސިފަކުރަމުންދިޔަ. އޭރު އަހަރެން ޑްރޮގްބާގެ ކުޅުން ބެލުމަށް ބޭބެގެ ފޯނު ބޭނުންކުރަން. އެއަށްފަހު އަހަރެން ކުޅެން ގޮސް މަސައްކަތްކުރަނީ ޑްރޮގްބާގެ އެ ހުނަރުތައް ދައްކަން. މިހާރު ވެސް އަހަރެން ޑްރޮގްބާގެ އޭރުގެ ކުޅުން ބަލަން،" އޮސިމްހެން ބުންޏެވެ.
އޮސިމްހެން ގައުމީ ޓީމަށް ކުޅެމުންދަނިކޮށް، ލިބުނު އަނިޔާއަކާ ގުޅިގެން އޭނާ މިވަގުތު ހުރީ ކުޅުމާ ދުރުގައެވެ. މައްސަލަތަކާ ގުޅިގެން އަންނަ ސީޒަންގައި އޭނާ ނަޕޯލީން ނުފެންނާނެ ކަަމަށް ގިނަ ރިޕޯޓުތައް ބުނެއެވެ.