އަށްވަނަ ފަހަރަށް ބެލޮންޑިއޯ އެވޯޑު ހޯދި އިންޓަ މަޔާމީގެ އާޖެންޓީނާ ތަރި ލިއޮނެލް މެސީ އިތުރު އެވޯޑެއް ހޯދައިފިއެވެ.
މެސީ އެންމެ ފަހުން ހޯދި އެވޯޑަކީ އެމެރިކާގެ އިންޓަ މަޔާމީގެ އަހަރުގެ އެންމެ މޮޅު ކުޅުންތެރިޔާގެ އެވޯޑެވެ. އިންޓަ މަޔާމީން މިހާރު ވަނީ އެ ކްލަބުގެ ވެބްސައިޓުގައި އެކަން އިއުލާން ވެސް ކޮށްފައެވެ.
މީގެ ކުރިން އިންޓަ މަޔާމީގެ އެ އެވޯޑު ހޯދި ކުޅުންތެރިންގެ ތެރޭގައި އާޖެންޓީނާ ފުޓުބޯޅަ ލެޖެންޑް ގޮންޒާލޯ ހިގުއައިން އާއި ސްކޮޓްލެންޑް ފޯވަޑް ލެވިސް މޯގަން ފަދަ ކުޅުންތެރިން ހިމެނެއެވެ. އާޖެންޓީނާއާއެކު މިދިޔަ އަހަރުގެ ވޯލްޑް ކަޕް ކާމިޔާބުކުރި މެސީ އެ އެވޯޑު ހޯދާފައި މިވަނީ، އަށްވަނަ ފަހަރަށް ބެލޮންޑިއޯ ހޯދިތާ މާގިނަ ދުވަސްތަކެއް ނުވެއެވެ.
އިންޓަ މަޔާމީން އެ ކްލަބުގެ ތާރީހުގައި ފުރަތަމަ ފަހަރަށް އެވޯޑެއް ހޯދާފައިވަނީ ވެސް މެސީގެ ކެޕްޓަންކަމުގެ ދަށުންނެވެ. އިންޓަ މަޔާމީން ލީގްސް ކަޕް ކާމިޔާބުކުރި އިރު، އުމުރުން 38 އަހަރުގެ މެސީ ވަނީ މޮޅު ކުޅުމެއް ދައްކައިފައެވެ.
މެސީއަަށް އަނިޔާގެ މައްސަލަތަކެއް ކުރިމަތިވެ، މޭޖާ ލީގް ސޮކާ (އެމްއެލްއެސް)ގެ ޕްލޭއޯފްއަށް އިންޓަ މަޔާމީ ގެންދެވިފައި ނުވި ނަމަވެސް، ލީގުގައި އޭނާ ކުޅުނު ހަ މެޗުގައި ވެސް މޮޅު ކުޅުމެއް ދެއްކިއެވެ. ލީގުގައި އޭނާއަށް ކާމިޔާބުކުރެވުނީ އެއް ގޯލެވެ. އިންޓަ މަޔާމީއަށް މިސީޒަނުގައި އޭނާ ކުޅުނު ހުރިހާ މުބާރާތެއްގައި 14 މެޗުން ޖުމުލަ 11 ގޯލު ޖަހައި، އަށް އެސިސްޓް ހަދާފައިވެއެވެ.