ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ މަޖިލީހުގެ އިދާރާއިން ހުއްޓުވީ ގާނޫނާ ހިލާފަށް ކަމަށް ސުޕްރީމް ކޯޓުން މިއަދު ހުކުމްކޮށްފިއެވެ.
އެމްޑީޕީގެ 49 މެންބަރުން ސޮއިކުރައްވައި މަޖިލީހަށް ހުށަހެޅި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައިގެ ރިޔާސަތު ބަލަހައްޓަވަން ނައިބު ރައީސް އީވާ އަބްދުﷲ އުޒުރުވެރިވެވަޑައިގަތުމުން އެ މައްސަލައާ ހެދި މަޖިލީސް އޮތީ ހުއްޓިފައެވެ.
މަޖިލީހުގެ މެޖޯރިޓީ އޮތް އެމްޑީޕީން ނަޝީދުގެ އިތުބާރު ނެތް ކަމަށް ހުށަހެޅި މައްސަލަ ކުރިއަށް ނުދާތީ، އެމްޑީޕީން ސުޕްރީމް ކޯޓަށް މައްސަލަ ހުށަހެޅީ މިދިޔަ މަހު 29 ގައެވެ. މަސްލަހަތު އޮތް ކަމަށް ބުނެ، އެ މައްސަލައިގެ ތެރެއަށް ނަޝީދު ނިސްބަތްވާ ޑިމޮކްރެޓްސް އަދި، ޕީޕީއެމް/ޕީއެންސީން ވެސް ވަނީ ތަދައްޚުލްވެފައެވެ.
އެ މައްސަލައިގައި މިއަދު ސުޕްރީމް ކޯޓުން ކުރި ހުކުމުގައި ބުނީ، މަޖިލީހުގެ ރައީސާއި ނައިބު ރައީސް ނެތް ހާލަތެއްގައި ރިޔާސަތު ބަލަހައްޓާނެ މެންބަރުން މަޖިލީހުގެ ގަވާއިދުގައި ބަޔާންކޮށްފައިވާއިރު، އެ މެންބަރުންނަށް ރިޔާސަތުގެ އިތުބާރު ނެތް ކަމުގެ މައްސަލަ ވެސް ކުރިއަށް ގެންދެވޭނެ ކަމަށެވެ.
އެހެންވެ، މަޖިލީހުން ނަޝީދު ވަކި ކުރުމުގެ ޖަލްސާ ކުރިއަށް ނުގެންދިޔައީ ގާނޫނާ ހިލާފަށް ކަމަށް ސުޕްރީމް ކޯޓުން ވަނީ ކަނޑައަޅައިފައެވެ.
އެމްޑީޕީން އެދުނީ މަޖިލީހުގެ ނައިބު ރައީސް ނޫނަސް، އެހެން މެންބަރަކަށް ވެސް ރިޔާސަތުގައި އިންނަވައިގެން ނަޝީދުގެ އިތުބާރު ނެތް ކަމުގެ މައްސަލަ ނިންމޭނެ ގޮތެއް ކަނޑައަޅައިދެއްވުމަށެވެ. މަޖިލީސް ގަވައިދުގެ 205ވަނަ މާއްދައިގައި ނައިބު ރައީސަށް ރިޔާސަތު ނުބެލެހެއްޓޭނެ ހާލަތެއް އައިސްފިނަމަ އަމަލުކުރާނެ ސީދާ ގޮތެއް މިހާރު ނެތުމުންނެވެ.
މަޖިލީހުގެ ގަވާއިދުގައި ނައިބު ރައީސާއި ރައީސް ނެތް ހާލަތުގައި ރިޔާސަތު ބެލެހެއްޓޭނެ އާންމު އުސޫލެއް އޮވެއެވެ. އެކަމަކު، ނަޝީދުގެ އިތުބާރުގެ މައްސަލައަށް އެ އުސޫލު ނުހިނގާނެ ކަމަށް މަޖިލީހުގެ އަމީންއާންމު ގަބޫލުކުރައްވާތީ، ނައިބު ރައީސް އީވާ ނެތި މަޖިލީސް ކުރިއަކަށް ނުގެންދެވެއެވެ.
ސުޕްރީމް ކޯޓުގައި އެ މައްސަލަ ބެއްލެވި ފަސް ފަނޑިޔާރުންގެ އިއްތިފާގުން މިއަދު ނިންމީ އެ އުސޫލާ އެއްގޮތަށް އިތުބާރުގެ މައްސަލައިގައި ވެސް ރައީސާއި ނައިބު ރައީސް ނޫން މެންބަރުންނަށް ރިޔާސަތު ބެލެހެއްޓޭނެ ކަމަށެވެ.
އެމްޑީޕީގެ 49 މެންބަރުން ސޮއިކޮށް ނަޝީދުގެ އިތުބާރު ނެތް ކަމުގެ މައްސަލަ ހުށަހެޅީ މިދިޔަ މަހު އަށެއްގައެވެ. އެ މައްސަލައިގައި ފޮނުވަން ޖެހޭ 14 ދުވަހުގެ ނޯޓިސް ފޮނުވުމަށް ފަހު އެ މައްސަލަ އެންމެ ފުރަތަމަ އެޖެންޑާ ކުރީ މިދިޔަ މަހު 26 ގައެވެ. އެކަމަކު، މަޖިލީހުގެ ނައިބު ރައީސް އަދި ނަޝީދުގެ ދެބެއިންގެ ދެ ދަރި ކޮއްކޯފުޅު އީވާ އާލާސްކަންފުޅާ ސަލާން ވިދާޅުވާ ވަރުން، މުޅި އެ ހަފުތާގައި ވެސް އެ މައްސަލަ ކުރިއަކަށް ނުގެންދެވުނެވެ.
އޭގެ ފަހުން، މި ހަފުތާގައި އީވާ ވަނީ އެމްޑީޕީން މަޖިލީހުގެ މައްސަލަ ސުޕްރީމް ކޯޓަށް ހުށަހަޅާފައިވާތީ ރިޔާސަތު ބަލަހައްޓަން އުޒުރުވެރިވެވަޑައިގަންނަވާ ކަމަށް ވިދާޅުވެ، އަމީންއާންމަށް ސިޓީއެއް ފޮނުއްވައިފައެވެ. އެހެންވެ، މި މައްސަލައިގައި ސުޕްރީމް ކޯޓުން ހުކުމް ކުރަންދެން، ނަޝީދުގެ މައްސަލަ ތާވަލުނުކުރެވި، މަޖިލީސް އޮތީ ހުއްޓިފައެވެ.