ދަ ޑިމޮކްރެޓްސްއިން ބޭނުން ވަނީ އެ ޕާޓީގެ މެންބަރަކު އިންނަވާ މަޖިލީހުގެ ރިޔާސަތެއްގައި އިންތިޚާބީ ރައީސް ހުވައިކުރުވަން ކަމަށާއި، އެއީ މިހާރު އޮތް މަޖިލިސް ރައީސް މުޙައްމަދު ނަޝީދުގެ އިތުބާރުގެ މައްސަލަ ދިގުދަންމަން މަސައްކަތްކުރާ ސަބަބުކަމަށް އެމްޑީޕީ ޕީޖީގެ މެންބަރު އަލީ ނިޔާޒު ވިދާޅުވެއްޖެއެވެ.
ރާއްޖެ ޓީވީގެ ޕްރޮގްރާމެއްގައި ވާހަކަދައްކަވަމުން ނިޔާޒު ވިދާޅުވީ ބޭރުން އޭނާއަށް އިވިލައްވާ އަޑުތަކަށް ބަލާއިރު ޑިމޮކްރެޓުންގެ ވިސްނުން ހުރީ މި މަހު 17އާ ހަމައަށް އިތުބާރުގެ މައްސަލަ ގޮތެއް ނުނިންމާ ދިގު ދެންމޭނެހެން ކަންކަން ރޭވުމަށް ކަމަށެވެ.
"އަޅުގަނޑުމެންނަށް ދާ މިސްރާބަށް ބަލައިފި ނަމަ އެއީ މި ކަން ކުރަން އުޅުއްވާ ގޮތް ކަމަށް އަޅުގަނޑުމެންނަށް ގަބޫލުކުރެވޭ،" އޭނާ ވިދާޅުވިއެވެ.
އޭނާ ވިދާޅުވީ ލަސް ކުރަނީ ރައީސް ނަޝީދު އިންނަވާ ރިޔާސަތުގައި ހުވައިކުރުމުގެ ޖަލްސާ ބޭއްވުމަށް ކަމަށެވެ. ސަބަބަކީ އައު ސަރުކާރަކީ ޑިމޮކްރެޓުންގެ ބައިވެރިވުމާ އެކު ހޮވުނު ސަރުކާރެއް ކަމަށް އެ ޕާޓީގެ މެންބަރުން ގަބޫލުކުރާތީކަމަށް ނިޔާޒު ވިދާޅުވިއެވެ.
"އެހެންނަމަވެސް އެ ބޭފުޅުންގެ ތެރެއިން ބައެއް ބޭފުޅުން ވިދާޅުވާ ކަމަށް އެ ބޭފުޅުންނަކީ ވެރިކަން ގެނައުމަށް ޓަކައި މަސައްކަތް ކުރެއްވި ބޭފުޅުންކަމަށް. އެހެންވީމާ ޑިމޮކްރެޓުންގެ ރިޔާސަތެއްގައި މުއިއްޒު ހުވައިކުރެއްވުމުގެ ރަސްމިއްޔާތު ބޭއްވުމަކީ އެ ބޭފުޅުން ބޭނުންފުޅުވާ ކަމެއް ކަމަށް. އަދި އެ ކަމަށް ކޮންމެ ވެސް ވަރެއްގެ އަންޑަސްޓޭންޑިންއެއް އޮތްކަމަށް،" އޭނާ ވިދާޅުވިއެވެ.
ނަމަވެސް އެއީ ޕީޕީއެމުން ބޭނުންވާ ކަމެއް ކަމަށް ޔަގީން ނުވާކަމަށް ނިޔާޒު ވިދާޅުވިއެވެ. ސަބަބަކީ ޕީޕީއެމުން އެދެނީ އިތުބާރުގެ ވޯޓު ވީ އެންމެ އަވަހަކަށް ނެގޭނެ މަގެއް ހަމަޖެހުމަށް ކަމަށް އެ ޕާޓީން ބުނާތީކަމަށް ނިޔާޒު ވިދާޅުވިއެވެ.
އޭނާ ވިދާޅުވީ މަޖިލީހުގެ ރިޔާސަތުން އަމަލުކުރަމުން އަންނަނީ ރިޔާސަތުން ހިތުހުރި ގޮތަކަށް ކަމަށެވެ. އެގޮތުން ރިޔާސަތުން ބޭނުންވާ އެޖެންޑާ އައިޓަމެއް އިސް ފަސްކޮށް ބަހުސްކުރުމަކީ އެމްޑީޕީން ދެކޮޅު، ނުރުހޭ ކަމެއްކަމަށް ނިޔާޒް ވިދާޅުވިއެވެ.
އެއީ އެމްޑީޕީން ރައީސް ނަޝީދުގެ އިތުބާރު ނެތްކަމުގެ މައްސަލަ ވައްދަން ޖެހުނު އެއް ސަބަބުގެ ގޮތުގައި ނިޔާޒު ފާހަގަކުރެއްވިއެވެ.
އަދި، ހަމައެއާއެކު އެމްޑީޕީގެ ސަރުކާރު ނިމުމުގެ ކުރިން މަޖިލީހުގެ ތެރެއިން ކުރަން ހުރި މުހިންމު މަސައްކަތްތަކެއް ހުރި ކަމަށާއި މިހާރު އޮތް މުއްދަތުގެ ތެރޭ އެ ކަން ކުރެވޭނީ އަަވަހަށް ރިޔާސަތުން ރައީސް ނަޝީދު ދުރުކޮށްގެން ކަމަށް ވެސް އޭނާ ވިދާޅުވިއެވެ.
"އެމްޑީޕީގެ މެޖޯރިޓީ އޮންނަ އަދި އެމްޑީޕީ މެޖޯރިޓީއާ މަޝްވަރާކުރެވިގެން އެޖެންޑާކުރެވޭނެ ކަހަލަ ގޮތަކަށް މަޖިލީހުގެ އިންތިޒާމުތައް ތަރުތީބު ވެގެންދާން އަޅުގަނޑުމެން ބޭނުން. އެހެންވީމާ އެ ކަމަށް ޓަކައި ވެސް މި ވަގުތު މަޖިލީހުގެ ރިޔާސަތުން [ނަޝީދު] އެއްފަރާތްވާން ޖެހޭކަމަށް އަޅުގަނޑު ގަބޫލުކުރަނީ،" އޭނާ ވިދާޅުވިއެވެ.
މިއަދު ސުޕްރީމް ކޯޓުގައިވަނީ އެމްޑީޕީން ހުށަހަޅައިފައިވާ މައްސަލައިގެ އަޑުއެހުން ފަށައިފައެވެ. މިއަދުގެ އަޑުއެހުން ނިންމައިލީ ޑިމޮކްރެޓުން އިތުރު ވަގުތު ބޭނުންވާ ކަމަށް ބުނުމުންނެވެ.
ނަޝީދުގެ އިތުބާރުގެ މައްސަލަ މިދިޔަ ހަފުތާގެ ހަތަރު ދުވަހު އެޖެންދާ ކުރި ނަމަވެސް، އީވާ އާލާސްކަންފުޅާ އުޅުއްވާތީ ޖަލްސާ ނުބޭއްވުނެވެ. އަދި، އެ މައްސަލަ އެޖެންޑާ ނުކޮށް، ބަޖެޓު ހުށަހަޅަން މަސައްކަތް ކުރި ނަމަވެސް އެމްޑީޕީން ވަނީ މަޖިލިސް ތަޅުމުގައި އިހުތިޖާޖުކޮށް، ޖަލްސާއަށް ހުރަސްއަޅާފައެވެ.