ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތް ކަމުގެ މައްސަލަ ކުރިއަށްގެންދެވޭނެ ކަމަށް ކަނޑައަޅައިދިނުމަށް، ޕީޕީއެމް، ޕީއެންސީން ސުޕްރީމް ކޯޓުގައި އެދިއްޖެއެވެ.
މަޖިލީހުގައި ނަޝީދުގެ އިތުބާރުގެ މައްސަލައިގެ ގަރާރުގެ މަސައްކަތްތައް ކުރިއަށްނުގެންދެވިފައި ވަނީ އެމަނިކުފާނުގެ ކޮއްކޯފުޅު އަދި ނައިބު ރައީސް އީވާ އަބްދުﷲ ސަލާމް ވިދާޅުވާތީއެވެ.
މަޖިލީހުގެ އިދާރާއިން ޖަލްސާ ނުބާއްވަން ނިންނަނީ، މަޖިލީހުގެ ރައީސްގެ އިތުބާރު ނެތް ކަމުގެ މައްސަލައެއްގައި ރިޔާސަތުގައި އިންނަވަން ވާނީ މަޖިލީހުގެ ނައިބު ރައީސް ކަމަށް މަޖިލީހުގެ ގަވާއިދުގެ 205 ވަނަ މާއްދާގައި ބަޔާންކޮށްފައިވާތީއެވެ.
އެމްޑީޕީން އެ މައްސަލަ ސުޕްރީމް ކޯޓަށް ހުށަހަޅަމުން ބުނެފައި ވަނީ، މަޖިލީހުގެ ރައީސާއި ނައިިބު ރައީސަށް ރިޔާސަތުގައި ނުހުންނެވޭ ހާލަތެއްގައި ރިޔާސަތު ބެލެހެއްޓެވޭނެ މެންބަރުންތަކެއް ކަނޑައަޅަން މަޖިލީހުގެ ގަވާއިދުގެ 44 ވަނަ މާއްދާގައި ބަޔާންކޮށްފައިވާ ކަމަށާއި، އެ މެންބަރުން ކަނޑައަޅާފައިވާ ކަމަށެވެ.
ޕީޕީއެމް، ޕީއެންސީގެ ފަރާތުން ވަކާލަތު ކުރައްވަމުން ކުރީގެ ބަންޑާރަ ނައިބު އާޒިމާ ޝުކޫރު ވިދާޅުވީ މި މައްސަލައިގައި އުޅެނީ ގާނޫނު އަސާސީ ތަރުޖަމާކުުރުމުގެ މައްސަލައެއް ކަމަށެވެ. އަދި ގާނޫނު އަސާސީއާ އެކީގައި ރައްޔިތުންގެ މަޖިލީހުގެ ގަވާއިދު ތަރުޖަމާ ކުރުމުގެ މައްސަލައެއް ކަމަށެވެ.
މި މައްސަލައިގައި ބަލަން ޖެހޭނީ ދައުލަތުގެ އެންމެ އިސް މަސްލަހަތުތައް ހުއްޓުވޭނީ ކޮން ގޮތަކުން، ކޮން ހާލަތެއްގައި ކޮން ބާރަކުންތޯ ކަމަށެވެ. އެގޮތުން ފުރަތަމަ ބަލާނީ ގާނޫނު އަސާސީގެ އަށް ވަނަ މާއްދާއަށް ކަމަށާއި އެ މާއްދާގައި ވަނީ ރާއްޖެއަކީ ކޮންސްޓިޓިއުޝަނަލް ޑިމޮކްރެސީއެއް ކަމަށެވެ. އެހެންކަމުން، ދުސްތޫރީ ހަމަތަކަށް ވުރެ މަތީ އެހެން އަސާސެއް ރާއްޖޭގައި ނުހިންގޭނެ ކަމަށް އޭނާ ވިދާޅުވިއެވެ.
އާޒިމާ ވިދާޅުވީ، މަޖިލީހުގެ ރައީސްގެ އިތުބާރު ނެތް މައްސަލައެއްގައި ރިޔާސަތުގައި ހުންނަވަން ވާނީ ނައިބު ރައީސް ކަމަށް މަޖިލީހުގެ ގަވާއިދުގެ 205 ވަނަ މާއްދާގައި އޮތް ނަމަވެސް، ނައިބު ރައީސަށް ރިޔާސަތު ނުބެލެހެއްޓެވޭ ނަމަ އަމަލު ކުރާނެ ގޮތް 44 ވަނަ މާއްދާގައި ބަޔާންކޮށްފައިވާ ކަމަށެވެ.
"ގާނޫނު އަސާސީން ވެސް ގަބޫލުކުރާ ޕްރޮސީޖާތަކެކޭ އެއީ އެހެންވީމަ ޖެނެރަލް އިންޓަޕްރެޓޭޝަންއަކަށް ޖެނެރަލް ރޫލްއަށް ރުޖޫއަ ނުވެވޭނެ ގާނޫނީ ހަމައެއް އަޅުގަނޑަށް ނުފެނޭ އެ މުޅި ބޭނުމަކީ ދުސްތޫރީ އޮނިގަނޑު ކުރިއަށްދާން ޖެހޭ ޖެހުން ދުސްތޫރީ އޮނިގަނޑު ހުއްޓުވޭނެ މީހަކު މި ގާނޫނު އަސާސީގެ ދަށުން ދިވެހިރާއްޖެއަކު ނުހުންނާނެ،" އޭނާ ވިދާޅުވިއެވެ.
ނަޝީދުގެ އިތުބާރުގެ މައްސަލަ މިދިޔަ ހަފުތާގެ ހަތަރު ދުވަހު އެޖެންދާ ކުރި ނަމަވެސް، އީވާ އާލާސްކަންފުޅާ އުޅުއްވާތީ ޖަލްސާ ނުބޭއްވުނެވެ. އަދި އެ މައްސަލަ އެޖެންޑާ ނުކޮށް، ބަޖެޓު ހުށަހަޅަން މަސައްކަތް ކުރި ނަމަވެސް އެމްޑީޕީން ވަނީ މަޖިލިސް ތަޅުމުގައި އިހުތިޖާޖުކޮށް، ޖަލްސާއަށް ހުރަސްއަޅާފައެވެ.
މި ހަފުތާގައި އެ ކަމަނާ ވިދާޅުވީ، ސުޕްރީމް ކޯޓަށް އެމްޑީޕީން އެ މައްސަލަ ވެއްދީމާ، އެހެންވެ ދެން ރިޔާސަތު ބެލެހެއްޓިދާނެ ކަމަށް ގަބޫލުނުކުރައްވާ ކަމަށެވެ.
އޭގެ ފަހުން މަޖިލީހުގެ އިދާރާއިން ވަނީ ސުޕްރީމް ކޯޓުގައި އޮތް އެކަމާ ގުޅުންހުރި މައްސަލަ ނިމެންދެން ނަޝީދުގެ އިތުބާރުގެ މައްސަލަ ދެން އެޖެންޑާ ނުކުރާނެ ބުނެފައެވެ.