ފަލަސްތީނުގެ ޣައްޒާއަށް ދެކޮޅަށް ޔަހޫދީ އިސްރާއީލުން ކުރަމުންދާ ހަނގުރާމައިގައި، އިސްރާއީލަށާއި އެ މީހުންގެ ލާއިންސާނީ އަމަލުތަކަށް ތާއީދުކުރުމުން ކުވޭތުގައި މަސައްކަތްކުރާ އިންޑިއާ ނަރުހެއް އެ ގައުމުން ބޭރުކުރުމަށް އަމުރު ނެރެފިއެވެ.
ކުވޭތުގެ އަލްރާއީ ނޫހާ ހަވާލާދީ މިޑްލް އީސްޓް މޮނިޓަރުން ރިޕޯޓުކޮށްފައިވާ ގޮތުގައި ފަލަސްތީނާ ދެކޮޅަށް ޔަހޫދީން ކުރާ ހަނގުރާމައިގައި ފަލަސްތީނަކީ ޓެރަރިސްޓު ގައުމެއް ކަމަށް ބުނެ ޔަހޫދީ އިސްރާއީލަށް ތާއީދު ކުރުމުން ކުވޭތުން ބޭރު ކުރުމަށް އިންޑިއާ ނަރުހެއްގެ މައްޗަށް ވަނީ އަމުރު ނެރެފައެވެ. ކުވޭތުގެ އިންޓީރިއާ ވުޒާރާއިން ނެރުނު މި އަމުރުގައި ބޭރުކުރަން ނިންމާފައި ވަނީ އަލް ސަބާހް ހޮސްޕިޓަލްގައި މަސައްކަތް ކުރާ ނަރުހެކެވެ. ނަރުސް ވަނީ ވަޓްސްއެޕް މެދުވެރިކޮށް އިސްރާއީލަށް ތާއީދުކުރާކަން ހާމަކޮށްފައެވެ.
އަލްރާއީ ނޫހުން ފާހަގަކުރި ގޮތުގައި މިއީ އިސްރާއީލަށް ތާއީދުކޮށްގެން އިންޑިއާ ރައްޔިތަކު ކުވޭތުން ބޭރުކުރާ ދެވަނަ ފަހަރެވެ.
ބަންދަރް އަލް މުތާއިރީ ކިޔާ ވަކީލަކު ނަރުހާ ދެކޮޅަށް ހުށަހެޅި މައްސަލައިގައި އިސްރާއީލަށް ތާއީދުކުރި ކަމަށް ނަރުސް އެއްބަސްވެފައިވާ ކަމަށް ވެސް މިޑްޅް އީސްޓް މޮނިޓާއިން ވަނީ ރިޕޯޓުކޮށްފައެވެ.
މީގެ ކުރިން މި މަހުގެ 22 ވަނަ ދުވަހު ކުވޭތުން ބޭރުކޮށްލި އިންޑިއާ ނަރުސް މަސައްކަތް ކޮށްފައިވަނީ މުބާރަކް އަލް ކަބީރު ހޮސްޕިޓަލްގައެވެ. އޭނާ ވަނީ ޣައްޒާގެ އަލް އަހްލީ އަރަބި ހޮސްޕިޓަލަށް ޔަހޫދީން ދިން ހަމަލާއަށް ތާއީދުކޮށް، ސޯޝަލް މީޑިއާ އެކައުންޓުތަކުގައި އިސްރާއީލުގެ ދިދަ ބޭނުންކޮށްފައެވެ.
ޔަހޫދީން އިސްރާއީލުން ޣައްޒާއަށް އަމާޒުކޮށް ދެމުންގެންދާ ހަމަލާތަކުގައި މިހާތަނަށް ޝަހީދުވި މީހުންގެ އަދަދު 8000 ށް ވުރެ މަތިވެފައިވާއިރު، 20000 ށް ވުރެ ގިނަ މީހުން ވަނީ ޒަޚަމްވެފައެވެ. އަދި އެތައް ބަޔަކު މިހާރުވެސް ތިބީ އިސްރާއީލުން ދިން ވައިގެ ހަމަލާތަކުގައި ސުންނާފަތިވެފައިވާ އިމާރާތްތަކުގެ ދަށުގައެވެ.