ރައްޔިތުންގެ މަޖިލީހުގެ މާދަމާގެ އެޖެންޑާއަށް ސަޕްލިމެންޓަރީ ބަޖެޓާއި އަންނަ އަހަރަށް ލަފާ ކުރާ ބަޖެޓު ހުށަހަޅަން ހިމަނައި، ރައީސް މުޙައްމަދު ނަޝީދުގެ އިތުބާރު ނެތް ކަމުގެ މައްސަލަ ބުދަ ދުވަހަށް ފަސްކޮށްފިއެވެ.
ރައްޔިތުންގެ މަޖިލީހުގެ ވެބްސައިޓުގައި އެޖެންޑާ އާންމުކޮށްފައި ވަނީ، ނަޝީދުގެ އިތުބާރުގެ މައްސަލަ ނުނިމެނީސް އެހެން މަސައްކަތްތަކަށް ޖަލްސާ ނުބޭއްވޭނެ ކަމަށް ކަނޑައަޅައިދިނުމަށް އެދި އެމްޑީޕީން ސުޕްރީމް ކޯޓަށް މައްސަަލަ ހުށަހަޅާފައިވަނިކޮށެވެ.
ސުޕްރީމް ކޯޓުންވަނީ އެ މައްސަލަ މިއަދު ބަލައިގެންފައެވެ.
މިއަހަރުގެ ތިންވަނަ ދައުރުގެ 15 ވަނަ ޖަލްސާގައި އިއްޔެއާއި މިއަދު ވަނީ ރައީސް ނަޝީދުގެ އިތުބާރު ނެތް ކަމުގެ މައްސަލަ އެޖެންޑާކޮށްފައެވެ. ނަމަވެސް މަޖިލީހުގެ ނައިބުރައީސް އަދި ރައީސް ނަޝީދުގެ ކޮއްކޯފުޅު އީވާ އަބްދުﷲ އާލާސްކަންފުޅާ އުޅުއްވާ މަޖިލީހަށް ވަނީ ދެ ދުވަހު ވެސް ސަލާން ފޮނުއްވައިފައެވެ.
އިއްޔެ މަޖިލީހުގެ ޖަލްސާވެސް ނުބޭއްވޭނެ ކަމަށް ބުނެ އަމީންއާއްމު ފާތިމަތު ނިއުޝާ ވަނީ ނިންމަވައިފައެވެ. އެކަމާ ހިތްހަމަނުޖެހުން ފާޅުކުރައްވާ އެމްޑީޕީން ވަނީ މަޖިލީހުގެ ތަޅުމުގައި އިހުތިޖާޖުކޮށްފައެވެ. އަދި އިއްޔެ މެންދުރު ނަޝީދުގެ އިތުބާރުގެ މައްސަލަ ހުއްޓުވާ ކަމަށް ބުނެ އެމްޑީޕީން ސުޕްރީމް ކޯޓަށް ހުށަހެޅި މައްސަލައިގައި، އެ ގަރާރުގެ މައްސަލަ ނުނިމެނީސް މަޖިލީހުގެ އިތުރު މަސައްކަތެއް ކުރުމަށް ޖަލްސާއެއް ނުބޭއްވޭނެ ކަމަށް ކަނޑައަޅައިދޭން ވަނީ އެދެފައެވެ.
އެމްޑީޕީން ކޯޓަށް ހުށަހެޅި މައްސަލައާ ގުޅޭ ގޮތުން އިއްޔެ ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ގާނޫނީ ކޮމިޓީގެ މެންބަރު އަޙްމަދު އަބްދުﷲ އަފީފް ވިދާޅުވީ، އެ މައްސަލަ ހުށަހެޅީ އަމީންއާންމުގެ ނިންމެވުމަކީ ގާނޫނު އަސާސީ އާއި މަޖިލީހުގެ ގަވާއިދާ ޚިލާފު ކަމެއް ކަމަށް ފެންނާތީ ކަމަށެވެ.
މަޖިލީހުގެ މިދިޔަ ދައުރުގައި ވެސް ރައީސް ނަޝީދުގެ އިތުބާރު ނެތް ކަމުގެ މައްސަލަ ހުށަހެޅުމަށް ފަހު އެމްޑީޕީން ވަނީ ރިޔާސީ އިންތިޚާބުގެ ފުރަތަމަ ބުރަށް ފަހު މައްސަލަ އަނބުރާ ގެންގޮސްފައެވެ. ނަމަވެސް މި ދައުރުގައި 49 މެންބަރުންގެ ސޮޔާއެކު އެ މައްސަލަ ވަނީ އަލުން ހުށަހަޅާފައެވެ.
އެ މައްސަލައާ ގުޅިގެން މީގެ ކުރިން ނަޝީދު ވަނީ، އިތުބާރު ނެތް ކަމުގެ މައްސަލަ މި ދައުރުގައި ބަލައިގަންނަން ދަތިވާނެ ކަމަށް ވިދާޅުވެފައެވެ. އެގޮތުން ދައުރެއްގައި ބަލައިގަނެވޭނީ އިތުބާރު ނެތް ކަމުގެ އެންމެ މައްސަލައެއް ކަމަށް އެ މަނިކުފާނު ވިދާޅުވެފައިވެއެވެ.
މާދަމާއަށް އެޖެންޑާކޮށްފައިވާ ސަޕްލިމެންޓްރީ ބަޖެޓާ ގުޅިގެން ވެސް މަޖިލީހުގެ ސަރުކާރާ ދެކޮޅު ޕާޓީތަކުން އަންނަނީ ނުރުހުން ފާޅުކުރަމުންނެވެ.
މާލިއްޔަތު ގާނޫނުގައި ބަޔާންކުރާ ތަފުސީލުތައް ނުހިމަނައި ފުރަތަމަ އެ ސަޕްލިމަންޓަރީ ބަޖެޓު ހުށަހެޅުމުން، ރައްޔިތުންގެ މަޖިލީހަށް ފިނޭންސް މިނިސްޓްރީން އަލުން ސަޕްލިމަންޓަރީ ބަޖެޓު ހުށަހެޅީ މިދިޔަ ބުދަ ދުވަހުއެވެ.
ފިނޭންސް މިނިސްޓްރީން ހުށަހެޅީ ޖުމުލަ ރިކަރަންޓު ޚަރަދަށް 3.1 ބިލިއަން ރުފިޔާ އަދި، ކެޕިޓަލް ޚަރަދުގެ ގޮތުގައި 3.3 ބިލިއަން ރުފިޔާއެވެ. ބަޖެޓަށް ހުށަހެޅި 6.5 ބިލިއަން ރުފިޔާއާ އެކު މި އަހަރު ދައުލަތުގެ ބަޖެޓު 49.3 ބިލިއަން ރުފިޔާއަށް އިތުރުވާނެއެވެ.
އެމްޑީޕީން ވަކިވެ މިހާރު ޑިމޮކްރެޓްސްއަށް ނިސްބަތްވާ މެންބަރުން ވަނީ އެ ބަޖެޓު ފާސްކުރަން ފުރުސަތެއް ނުދޭނެ ކަމަށް ވިދާޅުވަމުންނެވެ. އަދި މި ސަރުކާރުން އުޅެނީ އާ ސަރުކާރު އައުމުގެ ކުރިން އިތުރަށް ދަރަނި ބޮޑުކުރަން ކަމަށް ޑިމޮކްރެޓްސްއިން އަންނަނީ ބުނަމުންނެވެ.