މި އަހަރަށް ލަފާކޮށް ހުށަހަޅާފައިވާ ސަޕްލިމެންޓްރީ ބަޖެޓްގެ މަސައްކަތް، ރައްޔިތުންގެ މަޖިލީހުގެ މަދަމާގެ ޖަލްސާއަށް އެޖެންޑާ ކޮށްފައިނުވާތީ އެމްޑީޕީން ކަންބޮޑުވުން ފާހަގަ ކޮށްފިއެވެ.
މިކަމާ ގުޅިގެން އެމްޑީޕީގެ ޕީޖީ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް "ސަން"އަށް ވިދާޅުވީ، އެ މައްސަލަ އެޖެންޑާ ކުރުމަށް ބޭނުންވާ ބައެއް ލިޔެކިޔުންތައް ފިނޭންސް މިނިސްޓްރީން ލިބިފައިނުވާ ކަމަށް މަޖިލީހުގެ އަމީން އާންމު ފާތިމަތު ނިއުޝާ ވިދާޅުވިކަމަށެވެ.
"އެހެންނަމަވެސް އަޅުގަނޑު މައުލޫމާތު ސާފު ކުރެއްވި އިރުގައި އެ ޑޮކިއުމަންޓްތައް ވެސް، ހުރިހާ އެއްޗެއް ހަމަކޮށްފައި ފޮނުއްވާފައި ކަމަށް ފިނޭންސް މިނިސްޓްރީން މައުލޫމާތު ލިބުނީ،" އަސްލަމް ވިދާޅުވިއެވެ.
އޭނާ ވިދާޅުވީ ބަޖެޓުގެ މައްސަލަ އެޖެންޑާ ކުރަން މަޖިލީހުގެ ސެކެޓްރީ ޖެނެރަލާއި މަޖިލީހުގެ ނައިބު ރައީސްގެ އަރިހުގައި ވެސް އެދިފައިވާ ކަމަށެވެ.
މަޖިލީހުގެ އެޖެންޑާ ހެދުމުގެ ބާރު ރިޔާސަތަށް ލިބިފައި ވާތީ އެ ބޭފުޅުންނަށް ފެންނަ ގޮތެއް ހައްދަވަނީ ކަމަށް އަސްލަމް ތުހުމަތު ކުރެއްވިއެވެ. އޭނާ ވިދާޅުވީ، މައްސަލައެއް އެޖެންޑާ ކުރުމަށް ފަހު އެ މައްސަލަ ނަގައިގެން ނުވާނެ ކަމަށެވެ.
"މައްސަލައެއް އެޖެންޑާ ކުރުމަށް ފަހު އެ މައްސަލަ އަސްލު އެޖެންޑާއިން ނެގިގެން ނުވާނެ،" އަސްލަމް ވިދާޅުވިއެވެ.
މިކަމާ ގުޅިގެން އަމީން އާންމުގެ ބަހެއް ހޯދަން މަސައްކަތް ކުރި ނަމަވެސް، ބަހެއް ލިބޭގޮތް އަދި ވަނީ ނުވެފައެވެ.
މި އަހަރަށް ލަފާކޮށް ހުށަހަޅާފައިވާ ސަޕްލިމެންޓްރީ ބަޖެޓްގެ މަސައްކަ މިއަދު ބޭއްވި މަޖިލީހުގައި އެޖެންޑާ ކޮށްފައި ވެއެވެ. ނަމަވެސް ކޯރަމަ ހަމަ ނުވުމުގެ ސަބަބުން އެ މައްސަލަ ކުރިއަށް ނުގެންގޮސް މަޖިލިސް ވަނީ ނިންމާލާފައެވެ.