ޗެލްސީގެ އިނގިރޭސި ޑިފެންޑަރު ޓްރެވޯ ޗަލޮބާ ހޯދުމަށް ރޯމާއިން ބިޑު ކުރުމަށް ތައްޔާރުވަމުންދާ ކަމަށް ރިޕޯޓުކޮށްފިއެވެ.
ޗެލްސީއަށް ކާމިޔާބީތަކެއް ހޯދައިދީފައިވާ ހޯސޭ މޮރީނިއޯގެ އިރުޝާދުގެ ދަށުން ކުޅެމުންދާ ރޯމާގެ ޑިފެންސަށް ވަނީ މައްސަލަތަކަކާ ކުރިމަތިލާން ޖެހިފައެވެ. އެ ކްލަބުގެ އެންމެ މުހިންމު ޑިފެންޑަރުން ކަމަށްވާ ކްރިސް ސްމޯލިން އަދި ޑިއޭގޯ ލޮރެންޓޭ އަދި މަރާޝް ކުމްބުއްލާ ވެސް މި ވަގުތު ހުރީ އަނިޔާގައެވެ.
ރިޕޯޓުތައް ބުނާ ގޮތުގައި ރޯމާއިން ދަނީ ޖެނުއަރީ ޓްރާންސްފާގައި ޗަލޮބާއަށް ބިޑު ކުރުމަށް ތައްޔާރުވަމުންނެވެ. ޗެލްސީން ވެސް ހުރީ ރަނގަޅު ހުށަހެޅުމެއް ލިބިއްޖެ ނަމަ، އޭނާ ދޫކޮށްލާ ގޮތަށް ކަމަށް ރިޕޯޓުތައް ބުނެއެވެ.
އުމުރުން 24 އަހަރުގެ ޗަލޮބާ އަކީ ޗެލްސީގެ ކޯޗު މައުރީސިއޯ ޕޮޗެޓީނޯގެ ރޭވުންތަކުގައި ހިމެނޭ ޑިފެންޑަރެއް ނޫނެވެ. ޗެލްސީގެ ޔޫތު ސިސްޓަމް ތެރެއިން ތަމްރީނުވެގެން އައި ޗަލޮބާ ވެސް އެހެން ކްލަބަކަށް ބަދަލުވާން ބޭނުންވެފައި ހުރި އިރު، މިދިޔަ ޓްރާންސްފާގައި އޭނާ ބަޔާން މިއުނިކާ ގުޅުމާ ގާތަށް ދިޔައެވެ.
ޗަލޮބާގެ އިތުރުން ރޯމާއިން ދަނީ ޓޮޓެންހަމް ހޮޓްސްޕާގެ އިނގިރޭސި ޑިފެންޑަރު އެރިކް ޑަޔާ ހޯދުމަށް ވެސް ބިޑެއް ހުށަހެޅުމަށް ތައްޔާރުވަމުންނެވެ. އެ ބިޑު ކުރުމަށް ވެސް ހަމަޖެހިފައިވަނީ ޖެނުއަރީ ޓްރާންސްފާގައި ކަމަށް ރިޕޯޓުތައް ބުނެއެވެ.