ނޮވެމްބަރު 17 ގައި އުފެދޭ ޑރ. މުޙައްމަދު މުއިއްޒުގެ ސަރުކާރަށް ތަރައްގީގެ ގޮތުން އެހީތެރިވެ ދެއްވާނެ ކަމުގެ ޔަގީންކަން ސައުދީ އަރަބިއްޔާއިން ދެއްވައިފިއެވެ.
އިންތިޚާބީ ރައީސް މުއިއްޒު މިއަދު ވަނީ ރާއްޖެއަށް ކަނޑައަޅާފައި ހުންނަވާ ސައުދީ ސަފީރު މަތްރެކް ބިން އަބްދުﷲ އަލްޢަޖާލީން އަލްދައުސަރީއާ މިއަދު ބައްދަލު ކުރައްވައިފައެވެ. މި ބައްދަލު ކުރެއްވުމުގައި އިންތިޚާބީ ނައިބު ރައީސް ހުސައިން މުޙައްމަދު ލަތީފް ވެސް ބައިވެރިވެ ވަޑައިގެންނެވިއެވެ.
ދިމްޔާތުގައި މިއަދު ހެނދުނު އޮތް އެ ބައްދަލު ކުރެއްވުމުގައި މުއިއްޒު ވަނީ އެ މަނިކުފާނުގެ ވެރިކަމުގައި ސައުދީއާ އެކު އޮންނަ ގުޅުން މިހާރަށްވުރެ ހަރުދަނާކުރެވި، އާ ހަރުފަތަކަށް ގެންދެވުމަށް އުއްމީދުކުރައްވާކަމަށް ވިދާޅުވިއެވެ.
ދިވެހިރާއްޖެއަކީ އިސްލާމީ ގައުމަކަށްވާތީ، އަރަބި އިސްލާމީ ގައުމުތަކާ އޮންނަ ގުޅުން މިހާރަށްވުރެ ބަދަހިކުރުމަށް އެދިވަޑައިގަންނަވާކަމަށްވެސް މުއިއްޒު ފާހަގަކުރެއްވިއެވެ. އަދި އެމަނިކުފާނު ވަނީ ސައުދީއަރަބިއްޔާގެ އެހީތެރިކަމާއެކު ދިވެހިރާއްޖޭގައި ކުރިޔަށްގެންގޮސްފައިވާ އަދި މިހާރުވެސް ކުރިޔަށްދާ މަޝްރޫއުތަކަށް ޝުކުރުއަދާ ކުރައްވައިފައެވެ.
އަލަށް އުފެދޭ ސަރުކާރުން ރައްޔިތުންނަށް ވެވަޑައިގެންފައިވާ ވައުދުތައް ފުރިހަމަކުރެއްވުމުގައި، ސައުދީގެ އެހީތެރިކަމާއި ބައިވެރިވުމަށް މުއިއްޒު ވަނީ އެދިވަޑައިގެންފައެވެ.
ސަޢުދީ ސަފީރުގެ ވާހަކަފުޅުގައި، ދިވެހިރާއްޖެއާ ސަޢުދީއަކީ އެއްގޮތަށް ވުރެ ގިނަ ގޮތުން ގުޅިފައިވާ ދެ ގައުމުކަން ފާހަގަކުރެއްވިއެވެ.
މި ގުޅުންތައް އިތުރަށް ބަދަހިކުރުމަށް ދެ ފަރާތުން ގުޅިގެން ކުރެވެންހުރި މަސައްކަތްތަކަށާއި، ދިވެހިރާއްޖޭގެ ތަރައްގީއަށް ބޭނުންވާ އެކި ދާއިރާތަކުން ފުރިހަމަ އެހީތެރިކަމާއި އެއްބާރުލުން ދެއްވާނެކަމުގެ ޔަގީންކަން ސަފީރު ދެއްވިއެވެ.