އަވައްޓެރި އިންޑިއާ އާއި ރާއްޖެއަކީ އެތައް ގޮތަކުން އެއްގޮތް ދެގައުމު ކަމަށާއި، ދެ ގައުމުގެ ހީނަރުވެފައިވާ ގުޅުން ރަނގަޅުވުމުން އުފާކުރާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިރޭ އެކްސްގައި ކުރެއްވި ޕޯސްޓެއްގައި ވަނީ، ރާއްޖެއާއި އިންޑިއާއަކީ ގުދުރަތީ ގޮތުން ގުޅިފައިވާ ބައެއް ކަމަށެވެ. އެގޮތުން ދެގައުމުގެ ދެމެދުގައި އެއްގޮތް އެތައް ކަމެއް ވެސް އެބަހުރިކަން ނަޝީދު ވަނީ ފާހަގަކުރައްވާފައެވެ.
ނަޝީދު ލިޔުއްވާފައިވާ ގޮތުގައި ރާއްޖެއާއި އިންޑިއާ މިއުޒިކާއި، ކެއިންބުއިމާއި، ސަގާފަތާއި ތާރީޚު އަދި ގިއޮގްރަފީ ގޮތުން ވެސް އެއްގޮތެވެ. އެހެންކަމުން ދެ ގައުމު އަބަދުވެސް ރަހުމަތްތެރިންގެ ގޮތުގައި ދެމިތިބެންވާނެކަން އެމަނިކުފާނު ފާހަގަކުރައްވާފައި ވެއެވެ.
ދެގައުމުގެ މެދުގައި ހީނަރުވެފައިވާ ގުޅުން ރަނގަޅުވާތަން ފެނުމުން އުފާކުރައްވާ ނަޝީދު ވަނީ އިންޑިއާގެ ބޮޑުވަޒީރު ނަރެންދުރަ މޯދީއަށާއި ރައީސް ޑރ. މުހައްމަދު މުއިއްޒަށް މަރުހަބާ ވިދާޅުވެފައެވެ.
މިވަގުތު ރައީސް މުއިއްޒު ހުންނެވީ، އިންޑިއާގެ ރައީސް ދުރޫޕަތީ މުރުމޫގެ ދަޢުވަތަކަށް ކުރައްވާ ރަސްމީ ދަތުރުފުޅެއްގައި އެ ގައުމުގައެވެ.
މި ދަތުރުފުޅުގައި އިންޑިއާގެ ރައީސާއި، ބޮޑުވަޒީރުގެ އިތުރުން އެގައުމުގެ އިސްވެރިންނާ ބައްދަލުކުރައްވަން ވަނީ ހަމަޖެހިފައެވެ.
ރާއްޖޭގައި ގާއިމުވެ ތިބި އިންޑިއާ ސިފައިން ފޮނުވާލަން އިދިކޮޅުގައި ތިބިއިރު މި ސަރުކާރުގެ އިސްވެރިން ވެސް ހިމެނޭހެން ހިންގި 'އިންޑިއާ އައުޓް' ކެމްޕޭންގެ ސަބަބުން ދެ ގައުމުގެ ގުޅުމަށް އަސަރުކޮށްފައިވަނިކޮށް ސަރުކާރުގެ ތިން ޑެޕިއުޓީ މިނިސްޓަރަކު ވަނީ އިންޑިއާގެ ބޮޑު ވަޒީރު މޯދީއަށް މީސްމީޑިއާގައި ކުޑައިމީސްކޮށްފައެވެ.
އެއަށް ފަހުގައި ދެ ގައުމުގެ ގުޅުން ހީނަރުވެ، ނުތަނަވަސްކަން އޮތީ އުފެދިފައެވެ.
މޯދީއަށް ކުޑައިމީސްވާގޮތަށް ސޯޝަލް މީޑިއާގައި ކުރެއްވި ޕޯސްޓުތަކަކާ ގުޅިގެން ޔޫތު މިނިސްޓްރީގެ ޑެޕިއުޓީ މިނިސްޓަރުކަމުން ސަސްޕެންޑުކުރިތާ ނުވަ މަސް ފަހުން، އެ މަގާމުން މަރިޔަމް ޝިއުނާއާއި މަލްޝާ ޝަރީފް ވަނީ އިސްތިއުފާ ވެސް ދެއްވާފައެވެ.
އެކަމަކު، އޭގެ ފަހުން ދެ ގައުމުގެ ގުޅުން ވަނީ ވަރަށް ބޮޑަށް ރަނގަޅުވެފައެވެ. އެގޮތުން، އިންޑިއާއިން ވަނީ ދެ ލޯނެއް ވެސް ފަސްކޮށްދީފައެވެ.