ނިޒާމު ބަދަލު ކުރުމާ ބެހޭ މަޝްވަރާއަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ޖަލުގައި އޮންނެވި ކުރީގެ ރައީސް އަބްދުﷲ ޔާމީން އަބްދުލްގައްޔޫމާ ބައްދަލުކުރައްވަން އެދިލެއްވި ނަމަވެސް އެ މަނިކުފާނު ނަޝީދާ ބައްދަލުކުރައްވަން ދެކޮޅު ހައްދަވައިފިއެވެ.
މި މަހު 30 ގައި އޮންނަ ރިޔާސީ އިންތިޚާބުގެ ދެވަނަ ބުރުގެ ކުރިން ނިޒާމާ ބެހޭ ފެންނަ ނުފެންނަ ވޯޓެއް ނަގަން ގޮވާލައި ނަޝީދާއި އެ މަނިކުފާނުގެ ދަ ޑިމޮކްރެޓްސް ޕާޓީން އަންނަނީ އެހެން ސިޔާސީ ޕާޓީތަކާ އެކު މަޝްވަރާ ކުރަމުންނެވެ. އެ މަޝްވަރާތަކުގެ މަތިން ޔާމީނާ އެކު މަޝްވަރާ ކުރަން ނިންމައި، މަޖިލީހުގެ ރައީސްގެ ހައިސިއްޔަތުން ނަޝީދު ވަނީ ޔާމީނާ ބައްދަލުކުރައްވަން އެދިވަޑައިގެންފައެވެ.
އެކަމަކު، މޯލްޑިވްސް ކަރެކްޝަނަލް ސާވިސްއިން މިއަދު "ސަން"އަށް ބުނީ، ނަޝީދާ ބައްދަލުކުރައްވަން ޔާމީން އިންކާރު ކުރައްވާފައިވާ ކަމަށެވެ. އެހެންވެ، އެ ދެ ބޭފުޅުން ބައްދަލުކުރައްވައިފައެއް ނުވެއެވެ. އެހެންވެ، އެ ކަން މިހާރު ރައްޔިތުންގެ މަޖިލީހަށް އަންގައިފަައިވާ ކަަމަށް ވެސް ބުންޏެވެ.
ނަޝީދު، ޔާމީނާ ބައްދަލުކުރައްވަން ނިންމެވީ ރާއްޖޭގެ ވެރިކަން ކުރާ ނިޒާމު އިޚްތިޔާރު ކުރުމާ ގުޅޭ ވޯޓެއް ނެގުމާ ބެހޭ ގޮތުން މަޝްވަރާ ކުރެއްވުމަށެވެ. އެ މަނިކުފާނު ބޭނުންފުޅުވެވަޑައިގަތީ ޕީޕިއެމުން ބުނާ ޝަރުތުތަކަކާ އެކު ނުވަތަ ޝަރުތަކާ ނުލައި ނަމަވެސް ބަރުލަމާނީއަށް ތާއީދުކޮށް ކުރިއަށް ދާނަމަ އެކުގައި މަސައްކަތް ކުރުމަށެވެ.
ޑިމޮކްރެޓްސްއިން މީގެ ކުރިން ބުނި ގޮތުގައި، އެއްބަސްވުމެއްގައި ސޮއިކުރަން ބޭނުންނުވުމުގެ ސަބަބުން ޑިމޮކްރެޓްސްއިން ޕީޕީއެމާ އެކު ކުރި މަޝްވަރާތައް ވަނީ ހުއްޓިފައެވެ. ބެލެވޭ ގޮތުގައި ޔާމީން، ނަޝީދުގެ ހުށަހެޅުމަށް ދެކޮޅު ހެއްދެވުމާ އެކު ދެން އެ ޕާޓީން މަސައްކަތް ކުރާނީ އެމްޑީޕީ ޑިމޮކްރެޓްސްގެ ޝަަރުތުތަކަށް އެއްބަސް ކުރެވޭތޯއެވެ.
އެއީ، 25 ވަނަ ދުވަހުގެ ކުރިން ނިޒާމީ ވޯޓު ނަގަން އެއްބަސްވުމެވެ. އެމްޑީޕީން އެއްބަސްނުވެއްޖެނަމަ ރިޔާސީ އިންތިޚާބުގެ ދެވަނަ ބުރުގައި ޑިމޮކްރެޓުން ވެސް ވަކިކޮޅަކަށް ނާރައި ތިބުމުގެ ފުރުސަތު ބޮޑެވެ.
މީގެ ކުރިން ނިޒާމީ ވޯޓެއް ނަގާފައިވަނީ 2007 ވަނަ އަހަރެވެ. އެ އަހަރުގެ ވޯޓުގައި ޔާމީންގެ އޭރުގެ ޕާޓީ ޕީޕަލްސް އެލަޔަންސް (ޕީއޭ)އިން ތާއީދު ކުރީ ބަރުލަމާނީ ނިޒާމަކަށެވެ. އޭގެ ފަހުން ވެސް ޔާމީން ވަނީ ބަރުލަމާނީ ނިޒާމަކަށް ތާއީދު ކުރައްވާކަން ހާމަ ކުރައްވައިފައެވެ. އެކަމަކު، އެ މަނިކުފާނު ވިދާޅުވި ގޮތުގައި ނިޒާމު ރަނގަޅު ނަމަވެސް މި ވަގުތު ރާއްޖެއަށް ބަރުލަމާނީ ނިޒާމެއް ފިޓެއް ނުވާނެއެވެ. އެހެންވެ، ނިޒާމު ބަދަލުކުރަން މިހާރު އެއްބަސްވެނުލައްވާ ކަމަށް ޔާމީން އޭރު ވިދާޅުވިއެވެ.