ރިޔާސީ އިންތިޚާބުގެ ދެވަނަ ބުރެއްގައި އެމްޑީޕީއާ ގުޅުމަކީ "އޮތް ގޮތެއް ނޫން ކަމަށް،" މިއަދު ދަ ޑިމޮކްރެޓްސްއިން ބޭއްވި އިންޓެރިމް ކައުންސިލް ބައްދަލުވުމުގައި ބައިވެރިވީ ގިނަ މެންބަރުން މިއަދު ވިދާޅުވެއްޖެއެވެ.
މިދިޔަ ހޮނިހިރު ދުވަހު ބޭއްވި އިންތިޚާބުގެ ފުރަތަމަ ބުރުގައި ހަތް އިންސައްތަ ވޯޓު ލިބުނު، ޑިމޮކްރެޓްސް ދިޔައީ ތިންވަނަ އަށެވެ. އެންމެ ގިނަ ވޯޓާ އެކު 46 އިންސައްތަ ވޯޓު ހޯއްދެވީ ޕީއެންސީގެ ކެންޑިޑޭޓު ޑރ. މުހައްމަދު މުއިއްޒެވެ. ދެވަނައަށް އެންމެ ގިނަ ވޯޓު ހޯއްދެވި ރައީސް އިބްރާހިމް މުހައްމަދު ޞާލިޙަށް ލިބިވަޑައިގަތީ 39 އިންސައްތަ ވޯޓެވެ.
އެހެންވެ، ދެވަނަ ބުރެއްގައި ކޯލިޝަން ހެދުމާ ގުޅޭ ގޮތުން މިއަދު ހައުސް އޮފް ޑިމޮކްރެޓްސް ޖަގަހައިގައި ބޭއްވި ކައުންސިލް ބައްދަލުވުމުގައި ވާހަކަދައްކަވަމުން، އިންޓެރިމް ޗެއާޕާސަން ހަސަން ލަތީފް ވިދާޅުވީ، މިހާތަނަށް އެއްވެސް ޕާޓީއަކާ އެކު ސިޔާސީ މަޝްވަރާތައް ކޮށްފައިނުވާނެ ކަމަށާއި އެއްވެސް މަޝްވަރާއެއް ކުރިއަށް ގެންދާނީ ކައުންސިލުން ނިންމާ ގޮތެއްގެ މަތިން ކަމަށެވެ.
"މިހާތަނަށް ރަސްމީ ހައިސިއްޔަތުން އެއްވެސް ބަޔަކާ އެކު މަޝްވަރާއެއް ކޮށްފައެއް ނުވާނެ،" އޭނާ ވިދާޅުވިއެވެ.
އެކަމަކު، ހަސަން ވިދާޅުވީ، ނުރަސްމީ ސިފައެއްގައި އެކިއެކި ޕާޓީތަކުގެ މެންބަރުންނާ ބައްދަލުވާ ކަމަށެވެ. އެހެންނަމަވެސް ކޯލިޝަން ހެދުމާ ބެހޭ އެއްވެސް މަޝްވަރާއެއް ރަސްމީ ސިފައެއްގައި ކޮށްފައިނުވާނެ ކަމަށް އޭނާ ވިދާޅުވިއެވެ.
ދަ ޑިމޮކްރެޓްސްގެ ފަސްވަނަ އިންޓެރިމް ކައުންސިލް ބައްދަލުވުން --- ސަންފޮޓޯ/ މާވީ
އެ ބައްދަލުވުމުގައި ވާހަކަފުޅު ދައްކަވަމުން، އެ ޕާޓީން ރިޔާސީ އިންތިޚާބު ވާދަކުރެއްވި އިލްޔާސް ލަބީބު ވިދާޅުވީ، އެއްވެސް ބަޔަކާ ގުޅިގެން ސަރުކާރެއް އުފައްދާ ނަމަ އެއީ، ވަރަށް ބޮޑު ނިންމުމެއް ކަމަށެވެ. އެފަދަ ކަމެއް ކުރަން ވާނީ ޕާޓީގެ ކުރިމަގަށް ވަރަށް ބޮޑަށް ވިސްނާފައި ކަމަށް އޭނާ ވިދާޅުވިއެވެ.
މި ގައުމަށް އެންމެ ރަނގަޅު ގޮތަކީ ކޮބައިތޯ އަޅުގަނޑުމެން ވިސްނަން ޖެހޭ. [ހުށަހަޅަނީ] އަޅުގަނޑުމެންގެ ތެރެއިން ކޮމިޓީއެއް ނަގާފައި އެ މަޝްވަރާތައް ކުރިއަށް ގެންދަން،" އޭނާ ވިދާޅުވިއެވެ.
އެ ޕާޓީގައި ހިމެނިވަޑައިގަންނަވާ، މަޖިލީހުގެ ވިލުފުށީ ދާއިރާގެ މެންބަރު ހަސަން އަފީފު ވެސް ވަނީ ހަ މެންބަރުންގެ ކޮމިޓީއެއް އެކުލަވައިލައިގެން އެ ޕާޓީގެ މަޝްވަރާތައް ކުރިއަށް ގެންދަން ހުށަހަޅުއްވައިފައެވެ. އަފީފްގެ ހުށަހެޅުމަށް ތާއީދު ކުރައްވާ ވާހަކަދައްކަވަމުން މާލޭ ސިޓީ ކައުންސިލްގެ ގަލޮޅު އުތުރު ދާއިރާގެ މެންބަރު މުހައްމަދު ސައިފް ފާތިހު ވިދާޅުވީ، އެނބުރި އެމްޑީޕީއާ ގުޅުމަކީ އޮތް ގޮތެއް ނޫން ކަމަށެވެ.
"އިބްރާހިމް މުހައްމަދު ޞާލިޙަށް އަޅުގަނޑުމެން ތާއީދު ކޮށްފިއްޔާ، މަޖިލިސް ގަނެލާނެ ކަމަކީ އަޅުގަނޑަށް ޝައްކެއް އޮތް ކަމެއް ނޫން،" ސައިފް ވިދާޅުވިއެވެ.
އެ ޖަލްސާގައި އުނގޫފާރު ދާއިރާގެ މެންބަރު މުހައްމަދު ވަހީދު ވިދާޅުވީ، ޕާޓީތަކާ އެކުގައި މަގާމުތަކާއި ސަރުކާރުން ބައި އެޅުމުގެ ވާހަކަ ދައްކާކަށް ނުޖެހޭ ކަމަށެވެ. އޭނާ ވިދާޅުވީ "އިބޫ ނޫން ގޮތެއް،" ހޯދިއްޖެ ކަމަށާއި ޕާޓީތަކާ މަޝްވަރާ ކުރަން ޖެހޭނީ ޑިމޮކްރެޓްސްގެ މެނިފެސްޓޯގެ ހިމެނޭ ކަންކަން ތަންފީޒު ކުރުމާ މެދު ކަމަށެވެ.
"އަޅުގަނޑުމެންނަށް ހަމަ ގައިމު ވެސް އިބްރާހިމް މުހައްމަދު ޞާލިޙަކަށް ތާއީދެއް ނުކުރެވޭނެ،" އޭނާ ވިދާޅުވިއެވެ.
މި ބައްދަލުވުމުގައި ހަސަން ލަތީފް ވިދާޅުވީ، ކޮމިޓީއެއް އެކުލަވައިލައިގެން ސިޔާސީ ޕާޓީތަކާ އެކު މަޝްވަރާ ކުރި ނަމަވެސް އެއްވެސް ނިންމުމެއް ކައުންސިލްގެ މަޝްވަރާއާނުލައި ނުނިންމާނެ ކަމަށެވެ. އެއްވެސް ނިންމުމެއް ނިންމާނަމަ، ކައުންސިލަށް ހުށަހަޅާ، ފާސް ކުރާނެ ކަމަށް އޭނާ ވިދާޅުވިއެވެ.
"މި ކައުންސިލަށް ގެނެސްފައި ނޫނީ އަޅުގަނޑުމެން އެއްވެސް ކަމެއް ނުނިންމާނަން،" އޭނާ ވިދާޅުވިއެވެ.
މިއަދުގެ ބައްދަލުވުމުގައި ވާހަކަދެއްކެވި މެންބަރުން ވެސް ވަނީ ސަރުކާރަށް ފާޑު ވިދާޅުވެފައެވެ. އަދި، ގިނަ ބޭބޭފުޅުން ގަބޫލުކުރައްވާ ގޮތުގައި އެ ޕާޓީއަށް އޮތީ އެއްވެސް ޕާޓީއަކާ އެކު ކޯލިޝަން ނުހެދުން ނުވަތަ ޕީޕީއެމް/ޕީއެންސީއާ އެކު ކޯލިޝަން ހެދުމެވެ.
ފާސްކުރީ މަޝްވަރާ ކޮމިޓީއެއް އެކުލަވާލުމަށް
މިއަދުގެ ޖަލްސާގައި އެ ކައުންސިލުގެ 39 މެންބަރުންގެ އަގުލަބިއްޔަތުން ވަނީ ރިޔާސީ އިންތިޚާބުގެ މަޝްވަރާތަކަށް އަށް މެންބަރުންގެ ކޮމިޓީއެއް އެކުލަވާލުމަށް ފާސްކޮށްފައެވެ.
އެ ކޮމިޓީގައި ހިމެނޭ މެންބަރުންނަކީ؛
- ރިޔާސީ ކެންޑިޑޭޓް އިލްޔާސް ލަބީބު
- ރަނިންމޭޓް ހުސައިން އަމްރު މުހައްމަދު ރަޝާދު
- ވަގުތީ ޗެއާޕާސަން ހަސަން ލަތީފު
- މަޖިލީހުގެ ނާއިބު ރައީސް އީވާ އަބްދުﷲ
- މެދުހެންވޭރު ދާއިރާގެ މެންބަރު އަލީ އާޒިމް
- ރައީސް އޮފީހުގެ ކުރީގެ މިނިސްޓަރު މުހައްމަދު ޝިފާޒް
- ޗެއާޕާސަންގެ ނާއިބު މުހައްމަދު ބަޝީރު
- ޗެއާޕާސަންގެ ނާއިބު މުހައްމަދު އަންސަރު
މީގެ ތެރެއިން ފުރަތަމަ ހަ ނަން ހުށަހެޅުއްވީ ވިލުފުށީ ދާއިރާގެ މެންބަރު ހަސަން އަފީފެވެ. އަންސަރާއި، ބަޝީރުގެ ނަން ހުށަހެޅުއްވީ ހއ އަތޮޅު ކައުންސިލުގެ ރައީސް މޫސާ ޝަފީގެވެ.
ޑިމޮކްރެޓްސް އަކީ އެމްޑީޕީގައި އުފެދުނު ހިޔާލު ތަފާތުވުންތަކަށް ފަހު، އެ މަނިކުފާނަށް ތާއީދު ކުރައްވާ މެންބަރުން އެ ޕާޓީ ދޫކޮށްލައްވައި އުފެއްދެވި ޕާޓީއެކެވެ.
އެމްޑީޕީން ވަކިވުމަށް ފަހު، ޑިމޮކްރެޓްސްއާ ގުޅުނު މެންބަރުން ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. މި ފަހަރުގެ އިންތިޚާބުގައި ވެސް އެ ޕާޓީން ބޮޑަށް މަސައްކަތް ކޮށްފައިވަނީ ސަރުކާރު "ފެއިލްވެއްޖެ" ކަމަށް ބުނެއެވެ.