ވެލެންސިއާއާއެކު ހަދާފައިވާ ކޮންޓްރެކްޓް ބާތިލުކުރުމަށްފަހު، އުރުގުއާއީ ފޯވަޑް އެޑިންސަން ކަވާނީ އާޖެންޓީނާގެ ބޮކަ ޖޫނިއާސްއާ ގުޅިއްޖެއެވެ.
މެންޗެސްޓާ ޔުނައިޓެޑު ދޫކޮށްލުމަށްފަހު، މިދިޔަ ސީޒަނުގައި ވެލެންސިއާއާ ކަވާނީ ގުޅުނީ ދެ އަހަރު ދުވަހުގެ ކޮންޓްރެކްޓެއްގެ ދަށުންނެވެ. ނަމަވެސް ބޮކަ ޖޫނުއާސްއާ ގުޅުމަށް އޭނާ ވަނީ ކޮންޓްރެކްޓް ބާތިލުކޮށްފައެވެ.
މިދިޔަ ސީޒަނުގެ ސްޕެނިޝް ލަލީގާގައި ކަވާނީއަށް ކާމިޔާބުކޮށްދެވުނީ އެންމެ ފަސް ގޯލެވެ. މިދިޔަ ސީޒަނުގައި ވެލެންސިއާއަށް ރެލިގޭޓު ނުވެ ސަލާމަތްވެވުނީ ވެސް ކިރިޔާއެވެ. ރިޕޯޓުތައް ބުނާގޮތުން އެ ކްލަބާއެކު ހެދި ކޮންޓްރެކްޓް ކަވާނީ ބާތިލުކުރީ އަމިއްލަ އަތުން 1.3 މިލިއަން ޕައުންޑް ދެއްކުމަށްފަހުއެވެ.
ޔޫރަޕުގައި ވިދާލާފައިވާ ކަވާނީ އެންމެ ބޮޑަށް ފާހަގަކޮށްލެވިފައިވަނީ ޕަލޭމޯ، ނަޕޯލީ އަދި ޕެރިސް ސެއިންޓް ޖާމައިން (ޕީއެސްޖީ)ގައި އޭނާ ދެއްކި ކުޅުމުންނެވެ. ކަވާނީ އެނބުރި ދެކުނު އެމެރިކާއަށް ދާން ބޭނުންވާކަން ފުރަތަމަ އިއުލާންކޮށްފައިވަނީ އޭނާގެ ބޭބެއެވެ.
ބޮކަ ޖޫނިއާސްގައި ކަވާނީ ފެނިގެންދާނީ އެ ކްލަބުގެ ތަރިންތަކެއް ބޭނުންކުރި ދިހަ ނަމްބަރުގެ ޖާޒީގައެވެ. މީގެ ކުރިން އެ ޖާޒީގައި ޑިއޭގޯ މަރަޑޯނާ، ހުއާން ރިކޭލްމީ އަދި ކާލޯސް ޓެވޭސް ފަދަ ލެޖެންޑުން ވަނީ ފެނިގެން ގޮސްފައެވެ.