ގދ. ތިނަދޫ ސަހަރާގައި ސިހުރު ހެދި ކަމަށް ބުނެ، ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ ކުރީގެ މެންބަރު ސައުދުﷲ ހިލްމީއާ ގުޅުވައި ދައްކާ ވާހަކަތައް އޭނާ ދޮގުކޮށް، އެ މައްސަލަ ފުލުހަށް ހުށަހަޅައިފިއެވެ.
"ސަން"އާ ވާހަކަ ދައްކަވަމުން ސައުދު ވިދާޅުވީ، ސިހުރު ހެދުމަށް އޭނާ ބަޔަކު ސަހަރާ ތެރެއަށް ވެއްދި ކަމަށާއި ސިހުރު ހެދުމަށް ބަޔަކު ތިނަދުއަށް ފޮނުވި ކަމަށް ނޫހެއްގައި ރިޕޯޓުކޮށްފައިވާ ކަމަށެވެ.
"އަޅުގަނޑު ސިހުރު ހައްދުވަން ބަޔަކު ސަހަރާތެރެއަށް ވެއްދި ވާހަކައާއި، ރާއްޖެއިން ބޭރުން ސިހުރު ހެދުމަށް ބަޔަކު ގެނައި ވާހަކައާއި، މިފަދަ ވާހަކަތަކެއް އެ ނޫހުން ރިޕޯޓު ކުރި. ވަރަށް ތަފުސީލީ މައުލޫމާތުތަކެކޭ ކިޔާފަ ދޮގު ވާހަކަތަކެއް އެ ފަރާތްތަކުން މީގެ ހަތަރު ދުވަސް ކުރިން ރިޕޯޓްކޮށްފައި އެ ވަނީ،" ސައުދު ވިދާޅުވިއެވެ.
ސައުދު ކިޔައިދެއްވި ގޮތުގައި އެ މައްސަލަ ފެށުނީ އޭނާގެ ކުންފުނި ކަމަށްވާ ސްވިފްޓް އިންޖިނިއަރިން ޕްރައިވެޓް ލިމިޓެޑްގެ ހިއްސާދާރެއް ކަމުގައިވާ މުޙައްމަދު ޒުބައިރުގެ އާއިލާ މީހަކަށް ސިހުރުގެ ކަމަކާ ދިމާވުމުންނެވެ. އަދި, އެ ކަމުން ސަލާމަތްވުމަށް ރުގްޔާ ކުރުމުން، އެ މީހުން ކުރިން ދިރިއުޅުނު ގެއަށާއި ސަހަރާ ތެރެއަށް ސިހުރު ހަދާފަ ހުރިކަން އެނގުމުންނެވެ. އެހެންކަމުން އެ ސިހުރު ބާތިލުކުރަން ޖެހުނު ކަމަށާއި، އެކަން ކުރުމަށް އޭނާގެ ހިއްސާދާރު، ތިނަދޫގެ ސަހަރާއަށް މީހަކު ފޮނުވި ކަމަށް ސައުދު ވިދާޅުވިއެވެ.
އަދި, ސަހަރާއަށް ވަން މީހާ އަމަލުކުރީ ރުގްޔާ ކުރާ މީހަކު ކިޔައިދިން ގޮތަށް ކަމަށާއި އެކަމާ ސައުދުއާ ގުޅުމެއް ނެތް ކަމަށް އޭނާ ވިދާޅުވިއެވެ.
"އެއީ އަޅުގަނޑަށް އެނގޭ ކަމެއް ނޫން. އަޅުގަނޑުގެ ޕާޓްނަރު (ޒުބައިރު) ބުނެގެން ކުންފުނީގެ ބައެއް ސްޓާފުން ކުއްޖަކު އެ ތަނަށް ވެއްދުމަށް އެހީތެރިވެދިނީ،" ސައުދު ވިދާޅުވިއެވެ.
ނަމަވެސް ސަހަރާއަށް ވަން މީހާ އެތަނުގައި އުޅެނިކޮށް ސަހަރާ ކައިރީހުރި މީހަކަށް އެ މީހާ ފެނުނު ކަމަށް ސައުދު ވިދާޅުވިއެވެ.
އެ މަންޒަރު ދުށް މީހާ ވަނީ، އެ ދުވަހު ވަޅުލި މީހާގެ މަހާނައަށް ސިހުރު ހަދާ މަންޒަރު ފެނުނު ކަމަށް ބުނެ އެ އާއިލާ މީހުން ކައިރީ އެ ވާހަކަ ކިޔައިދީފައެވެ. ނަމަވެސް އެކަން ހިނގައިދިޔަ ގޮތް ޒުބައިރު ވަރަށް ތަފުސީލުކޮށް އެ އާއިލާއަށް ކިޔައިދިން ކަމަށް ސައުދު ވިދާޅުވިއެވެ.
"ދެން ޒުބައިރު ބުނި އެތަން ފެނުނު މީހާއާ ދިމާލަށް ހާދަ ބޮޑު ފިތުނައެކޭ ތި ހެދީ. އެ މަހާނައަށް ސިހުރު ހަދަން ވަނީ އޭ ކިޔައިގެން. ދެން އޭނަވެސް ބުނި ކަމަށް ވަނީ ތިމަންނައަށް ހީވި ގޮތޭ ވަރަށް ބޮޑަށް މައާފު ކުރާށޭ. ދެން އަޅުގަނޑާ ވާހަކަދެއްކި މީހުންވެސް ބުނި އެތަން އެ އާއިލާއިންވެސް އެކަން އޯކޭ ވެގެން ދިޔަ ކަމަށް،" ސައުދު ކިޔައިދެއްވިއެވެ.
ސައުދު ވިދާޅުވީ އެކަން އެގޮތަށް ނިމިފައި އޮއްވާ، ސިހުރު ހެދި ކަމަށް ބުނެ ނޫހެއްގައި ރިޕޯޓުކުރިކަމަށެވެ. އަދި ބޭރު ބަޔަކު ތިނަދޫއަށް ގެނެސްގެން އުޅޭ ވާހަކަވެސް އެނޫހުން ރިޕޯޓްކުރި ކަމަށް އޭނާ ވިދާޅުވިއެވެ.
މި ދެ މީހުންނާ ގުޅޭގޮތުން ސައުދު ވިދާޅުވީ، އެ މީހުންނަކީ މާލޭގައި ހޮޓާ ހިންގާ އޭނާގެ އާއިލާ މީހުންނާ ވަރަށް ގާތް ރަހުމަތްތެރިއަކާއި އޭނާގެ އާއިލާ ބައެއް ކަމަށެވެ. އަދި, އެ މީހުން ގާނޫނާ ޚިލާފު އެއްވެސް ކަމެއް ކޮށްފައި ނުވާ ކަމަށް އޭނާ ވިދާޅުވިއެވެ.
"މި މަހުގެ 12 ވަނަ ދުވަސް އެއީ ސިހުރު ހެދި ކަމަށް ބުނާ ދުވަސް. އެއަށްވުރެ މާފަހުން އެމީހުން ތިނަދުއަށް ދިޔައީ. ސާދަ ވަނަ ދުވަހު. ތިނަދުއަށް އެމީހުން ދިޔުމުން ތިނަދޫ މީހަކު އެތަނުން އެކަކު ގެސްޓްހައުސް ކުރިމަތީގައި ހުއްޓާ އިންޒާރުދީ ބިރުދައްކާ، އެމީހުންގެ ވީޑިއޯ އާއި އެމީހުންނާ ބެހޭ ހައްސާސީ މަޢުލޫމާތު ފޭސްބުކް ވަގު އެކައުންޓަކުން ހާމަކޮށް އެ މީހުންނަކީ ސިހުރުވެރިންކަމަށް މައުލޫމާތު ފެތުރުމުން އެ މީހުންގެ ފުރާނަޔަށް ބިރުން އަނެއް ދުވަހު އައީ މާލެއަށް. އަދި 17 ވަނަ ދުވަހު އަނބުރާ ގައުމަށް ދިޔަ. އޭގެ އަނެއް ދުވަހު އިމިގްރޭޝަނުން އެމީހުން ހޯދަން އިއުލާނުކުރީ،" ސައުދު ވިދާޅުވިއެވެ.
ސައުދު އިތުރަށް ވިދާޅުވީ، ސިހުރު ހަދާ ކަމަށް ބުނެ އޭނާއާ ގުޅުވައި ވާހަކަތައް ފަތުރަމުންދަނީ އޭނާގެ އަގު ވައްޓާލުމުގެ ނިޔަތުގައި ކަމަށެވެ. އަދި އޭގެ ފަހަތުގައި ސިޔާސީ ބަޔަކު ތިބި ކަމަށް ވެސް އޭނާ ތުހުމަތު ކުރައްވައެވެ.
ސިހުރު ހެދި ކަމަށް ބުނާ މައްސަލަ މިހާރު ބަލަމުންދާއިރު، އޭނާގެ އަބުރަށް އަރައިގަތް މައްސަލަ ވެސް މިހާރު ފުލުހަށް ހުށަހަޅާފައިވާ ކަމަށް ސައުދު ވިދާޅުވިއެވެ.
ސައުދު ވިދާޅުވީ އެ ކަމާ ގުޅިގެން އޭނާއާއި އޭނާގެ އާއިލާއަށް ބޮޑެތި އަސަރުތަކެއް ކުރަމުންދާ ކަމަށެވެ. އަދި, މީހުންގެ ފުރައްސާރަތައް ލިބެމުންދާ ކަމަށާއި ސޯޝަލް މީޑިއާ ޕްލެޓްފޯމްތައް ބޭނުން ކޮށްގެން އޭނާއަށް ހަޑިހުތުރު ބަހުން މެސެޖު ކުރާ ކަމަށް ވެސް ވިދާޅުވިއެވެ.
މި ކަމާ ގުޅިގެން ސްވިފްޓް އިންޖިނިއަރިން ކުންފުނީގެ ހިއްސާދާރު މުޙައްމަދު ޒުބައިރު "ސަން"އަށް ވިދާޅުވީ، އޮންލައިން ނޫހެއްގައި ފަތުރަމުންދާ ވާހަކައަކީ އޭގައި އެއްވެސް ތެދެއް އޮތް ވާހަކައެއް ނޫން ކަމަށެވެ. އެއީ ޝަރުއީ ހަމަތަކުގެ މަތިން އޭނާގެ އާއިލާއަށް ދިމާވި ކަމަކުން ސަލާމަތްވުމަށް ރުގްޔާ ކުރުމަށް ކުރި ކަމެއް ކަމަށް އޭނާ ވިދާޅުވިއެވެ.
"އަޅުގަނޑުގެ އާއިލާއަށް ޝިފައެއް ހޯދުމަށް ޝަރުޢީ ރުގްޔާއެއް ކުރުމުގެ މަސައްކަތް އަޅުގަނޑު ކުރީ. އެހެންނަމަވެސް އެބޭފުޅުންގެ އުނދަގޫ ބޮޑުވެ، އަޅުގަނޑުމެންނަށް އެކަން ވެސް އެންމެ ފުރިހަމައަކަށް ނުކުރެވުނު. އެހެންނަމަވެސް ކުރިއަށް އޮތް ތަނުގައި ކައުންސިލާ ގުޅިގެން އަޅުގަނޑުމެން މިބަލަނީ އެކަން ކުރެވޭނެ ކަމަށް،" ޒުބައިރު ވިދާޅުވިއެވެ.
އޭނާ ވެސް ތުހުމަތު ކުރައްވަނީ މި މައްސަލައިގައި ސިޔާސީ ނުފޫޒެއްވާ ކަމަށެވެ.