ނަޕޯލީއާއެކު އޮތް ކޮންޓްރެކްޓް އާކުރަން ނައިޖީރިއާ ފޯވަޑް ވިކްޓާ އޮސިމްހެން ދެކޮޅު ހަދާފައިވާ ކަމަށްބުނެ ފަތުރަމުންދާ ހަބަރުތައް އޭނާގެ އެޖެންޓް ރޮބާޓޯ ކަލެންޑާ ދޮގުކޮށްފިއެވެ.
ދާދި ފަހުން ހަބަރުތައް ބުނެފައިވާ ގޮތުގައި ނަޕޯލީން ކޮންޓްރެކްޓް އާކުރުމަށް ހުށަހެޅުމުން އޮސިމްހެން ވަނީ އެކަމަށް ދެކޮޅު ހަދައިފައެވެ. ނަމަވެސް އެފަދަ ނިންމުމެއް އޮސިމްހެން ނިންމާފައި ނުވާ ކަމަށްބުނެ، އޭނާގެ އެޖެންޓް ކަލެންޑާ ވަނީ އެ ހަބަރުތައް ދޮގުކޮށްފައެވެ.
"އެއީ ކަނޑައެޅިގެން ދޮގު ހަބަރެއް،" ކޮންޓްރެކްޓް އާނުކުރަން އޮސިމްހެން ނިންމި ކަމަށްބުނާ ހަބަރުތަކާ ގުޅިގެން ކަލެންޑާ ކުރި ޓުވީޓެއްގައި ބުންޏެވެ.
އޮސިމްހެންގެ ކޮންޓްރެކްޓް އާކުރުމަށް ނަޕޯލީން މަސައްކަތްކުރަމުންދާ އިރު، އޭނާ ހޯދުމަށް ޕެރިސް ސެއިންޓް ޖާމައިން (ޕީއެސްޖީ) އާއި ބަޔާން މިއުނިކް ފަދަ ޔޫރަޕުގެ ބޮޑެތި ކްލަބުތަކަކުން ވެސް ދަނީ މަސައްކަތްކުރަމުންނެވެ. އޭނާ ހޯދުމަށް ކްލަބުތަކުން 150 މިލިއަން ޔޫރޯ (168 މިލިއަން ޑޮލަރު)ގެ އަގެއް ހުށަހަޅަން ޖެހޭނެ ކަމަށް ރިޕޯޓުތައް ބުނެއެވެ.
ނަޕޯލީގެ ރައީސް އޯރެލިއޯ ޑި ލޮރެންޓިސް މީގެ ކުރިން ވިދާޅުވެފައިވާ ގޮތުގައި އޮސިމްހެން އަކީ ވިއްކާ ކުޅުންތެރިއެއް ނޫނެވެ. އޮސިމްހެންގެ އެޖެންޓް ކަލެންޑާ ވެސް އެކަމާ ވާހަކަދައްކާފައިވުމުން، ނަޕޯލީއާއެކު ހަދާފައިވާ ކޮންޓްރެކްޓް އޭނާ އާކުރާނެ ކަމަށް ބެލެވެއެވެ.
ނަޕޯލީއަށް 33 އަހަރަށްފަހު އިޓާލިއަން ސެރީއާގެ ޗެމްޕިއަންކަން ހޯދައިދިނުމުގައި އެންމެ އިސް ދައުރެއް އަދާކޮށްދިން އެއް ކުޅުންތެރިޔަކީ އުމުރުން 24 އަހަރުގެ އޮސިމްހެންއެވެ. ލީގުގައި އޭނާ ވަނީ ނަޕޯލީއަށް 22 ގޯލު ކާމިޔާބުކޮށްދީފައެވެ.