އިނގިރޭސި ޕްރިމިއާ ލީގުގައި ފުލަމް އަތުން ޗެލްސީ ބަލިވެ، ލީގު ކާމިޔާބުކުރަން އެ ޓީމުން ކުރާ އުންމީދުތައް ފަނޑުވާން ފަށައިފިއެވެ.
ޗެލްސީގެ ދަނޑުގައި ކުޅުނު ލަންޑަން ޑާބީ މެޗުން ފުލަމް މޮޅުވީ ފަހަތުން އަރައި 2-1 އިންނެވެ.
މެޗުގެ 16 ވަނަ މިނެޓުގައި އުފެއްދި ހަމަލާއެއްގައި ޗެލްސީންވަނީ ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ ކޯލް ޕާމާއެވެ. މިއީ މި އަހަރުގެ ތެރޭގައި އޭނާ ކާމިޔާބުކުރި 26 ވަނަ ލަނޑެވެ. އޭނާ މިވަނީ 2001 ވަނަ އަހަރު އޭރުގެ ތަޖުރިބާކާރު ފޯވަޑް ޖިމީ ފްލޮއިޑް ހަސެލްބޭންކް ހަދާފައިވާ ރިކޯޑް މުގުރާލާފައެވެ.
ފުލަމަށް ނަތީޖާ ހަމަހަމަކުރެވުނީ 82 ވަނަ މިނެޓުގައެވެ. އެއީ، ބަދަލު ކުޅުންތެރިޔާ ހެރީ ވިލްސަން ޖަހައިދިން ލަނޑަކުންނެވެ. އެ ޓީމުން ލީޑު ނެގީ، އިތުރު ވަގުތުގެ ފަސްވަނަ މިނެޓުގައި ރޮޑްރިގޯ މުނީޒް ޖަހައިދިން ލަނޑުންނެވެ.
މިއީ ޗެލްސީގެ ދަނޑު ސްޓެމްފަޑް ބްރިޖްގައި ކުޅެ ވޭތުވެދިޔަ 45 އަހަރުގެ ތެރޭގައި ފުލަމަށް މެޗެއް ކާމިޔާބުކުރެވުނު ފުރަތަމަ ފަހަރެވެ.
މި ކާމިޔާބީއާ އެކު ފުލަމް މިހާރު މި ވަނީ 28 ޕޮއިންޓާ އެކު އަށްވަނައަށް ކުރިއަށް ޖެހިލާފައެވެ. ޗެލްސީ އޮތީ 35 ޕޮއިންޓާ އެކު ދެވަނައިގައެވެ. ޗެލްސީއާއި އެއްވަނައިގައި އޮތް ލިވަޕޫލާ ދެމެދު ހަތް ޕޮއިންޓު އެބައޮތެވެ. ލިވަޕޫލުން އެއް މެޗު މަދުން ކުޅެފައިވުމުން، އެ ފަރަގު އިތުރަށް ފުޅާވުމުގެ ފުރުސަތު އެބައޮތެވެ.