އެމެރިކާ ފޯވަޑް ކްރިސްޓިއަން ފުލިސިޗްގެ ސޮއި ހޯދުމަށް ޔުވެންޓަސް އިން ޗެލްސީއާ މަޝްވަރާކޮށްފައިވާ ކަމަށް ރިޕޯޓުކޮށްފިއެވެ.
ޕުލިސިޗް ހޯދުމަށް ޔުވެންޓަސްގެ އިތުރުން ވާދަވެރި އޭސީ މިލާނާއި ނަޕޯލީން ވެސް ދަނީ މަސައްކަތްތަކެއް ކުރަމުންނެވެ. ޔުވެންޓަސްއަށް އޮތް ކަންބޮޑުވުމަކީ އަންނަ ސީޒަނުގެ ޔޫއެފާ ޗެމްޕިއަންސް ލީގަށް އެ ކްލަބު ކޮލިފައިނުވުމެވެ.
'ގެޒެޓާ ޑެލޯ ސްޕޯޓް' އިން ރިޕޯޓުކުރާ ގޮތުގައި ޕުލިސިޗް ހޯދުމަށް ޔުވެންޓަސްގެ ސްޕޯޓިން ޑިރެކްޓަރު ޖިއޮވާނީ މަންނާ ވަނީ އިނގިރޭސިވިލާތުގެ ލަންޑަނަށް ދަތުރުކޮށް، އިއްޔެގެ ވަގުތެއްގައި ޗެލްސީއާ ބައްދަލުކޮށްފައެވެ. އަދި ޗެލްސީން ހޯދުމަށް މަސައްކަތްކުރާ ޔުވެންޓަސްގެ ސާބިއާ ފޯވަޑް ޑުސާން ވްލަހޮވިޗްގެ ޓްރާންސްފާއާ މެދު ވެސް އެ ބައްދަލުވުމުގައި މަޝްވަރާކޮށްފައިވާ ކަމަށް ވަނީ ރިޕޯޓުކޮށްފައެވެ.
އޭގެ އިތުރުން ޗެލްސީގެ އިނގިރޭސި މިޑްފީލްޑަރު ރުބެން ލޮފްޓަސް ޗީކް އާއި އިނގިރޭސި ޑިފެންޑަރު ޓްރެވޯ ޗަލޮބޯގެ ސޮއި ހޯދުމަށް ވެސް ޔުވެންޓަސްގެ ސްޕޯޓިން ޑިރެކްޓަރު މަޝްވަރާކުރި ކަމަށް އެ ނޫހުން ރިޕޯޓުކުރިއެވެ. ޗަލޮބާ ހޯދުމަށް އިންޓަ މިލާނުން ވެސް މަސައްކަތްކުރަމުންދާ އިރު، ލޮފްޓަސް ޗީކް ހޯދުމަށް އޭސީ މިލާނުން ދަނީ މަސައްކަތްކުރަމުންނެވެ.
ރިޕޯޓުތައް ބުނާގޮތުގައި ޔުވެންޓަސް އިން ޕުލިސިޗް ހޯދުމަށް 120 މިލިއަން ޔޫރޯގެ އަގެއް ހުށަހަޅާ އިރު، ޗެލްސީން ވްލަހޮވިޗަށް 80 މިލިއަން ޔޫރޯގެ އަގެއް ހުށަހަޅާނެއެވެ.
އުމުރުން 24 އަހަރުގެ ޕުލިސިޗްއަށް ނިމިގެންދިޔަ ސީޒަނުގެ ގިނަ މެޗުތަކުގައި ކުޅުމުގެ ފުރުސަތު ލިބިފައެއް ނުވެއެވެ. ބޮރޫޝިއާ ޑޯޓްމަންޑުން 2016 ވަނަ އަހަރު ކެރިއަރު ފެށި ޕުލިސިޗް، ޗެލްސީއާ ގުޅުނީ 2019 ވަނަ އަހަރުއެވެ. ޗެލްސީއަށް ސޮއިކުރުމަށްފަހު ފުރަތަމަ އަހަރު ލޯނުގެ ދަށުން ވެސް އޭނާ ޑޯޓްމަންޑަށް ކުޅުނެވެ.