ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހެޅުމަށް މިހާތަނަށް 20 އަށްވުރެ ގިނަ މެންބަރުން ސޮއިކޮށްފިއެވެ.
މޮރިޝަސްއާއި ރާއްޖެއާ ފުށުއަރާ ކަނޑުގެ ސަރަހައްދު ބައިކުރީ ދިވެހީންގެ މަސްލަހަތާ ޚިލާފަށް ކަމަށް ބުނެ، ޕީޕީއެމް/ޕީއެންސީއާއި އެމްއެންޕީ، ޖުމްހޫރީ ޕާޓީ އަދި ފިކުރެއްގެ ދިރުމުން ވަނީ ރައީސްގެ އިތުބާރު ނެތް ކަމުގެ މައްސަލަ މަޖިލީހަށް ހުށަހަޅަން ނިންމައިފައެވެ.
އެކަމުގެ އެންމެ ފަހުގެ މައުލޫމާތު ދެއްވަމުން، އިދިކޮޅު އިއްތިހާދުގައި އިސްކޮށް ހަރަކާތްތެރިވާ، މަޑުއްވަރީ ދާއިރާގެ ޕީއެންސީ މެންބަރު އާދަމް ޝަރީފު އުމަރު މިއަދު "ސަން"އަށް ވިދާޅުވީ، ރައީސް ޞާލިޙުގެ އިތުބާރު ނެތްކަމުގެ މައްސަލަ ހުށަހަޅަން މިހާރު 20 އަށްވުރެ ގިނަ މެންބަރުން ސޮއިކޮށްފައިވާ ކަމަށެވެ.
ނަމަވެސް، ސޮއިކުރި މެންބަރުންގެ ސީދާ އަދަދެއް އޭނާ ވިދާޅެއްނުވެއެވެ. އަދި، ސޮއި ކުރެއްވި މެންބަރުންގެ ނަމެއް ވެސް ހާމައެއް ނުކުރައްވައެވެ.
އެ އިއްތިހާދުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ފިކުރެއްގެ ދިރުން ފެކްޝަނުގެ ފަރާތުން ބުނީ، ރައީސްގެ އިތުބާރު ނެތްކަމުގެ މައްސަލައިގައި ސޮއިކުރަން، އެ ފެކްޝަނުގެ އެއްވެސް މެންބަރެއްގެ އިއުތިރާޒެއް ނެތް ކަމަށެވެ.
ރައްޔިތުންގެ މަޖިލީހުގެ ގަވާއިދުގައި ވާގޮތުން ރައިސުލްޖުމްހޫރިއްޔާ ކަމުގެ މަގާމުން ދުރުކުރަން ގަރާރެއް ހުށަހެޅޭނީ މަޖިލީހުގެ ތިން ބައިކުޅަ އެއްބައި މެންބަރުން، ސަބަބު ބަޔާންކޮށް ސޮއިކޮށްފައިވާ ލިޔުމަކުންނެވެ. އެއީ، މިހާރު މަޖިލީހުގައި ތިއްބަވާ 87 މެންބަރުންގެ ތެރެއިން 29 މެންބަރުންނެވެ.
ރައީސްގެ އިތުބާރު ނެތްކަމުގެ މައްސަލަ ހުށަހަޅަން ތައްޔާރުވުމުންދާ އިއްތިހާދުގައި ހިމެނޭ ޕާޓީތަކުގެ މެންބަރުންގެ ގޮތުގައި މި ވަގުތު ތިއްބެވީ، ފިކުރެއްގެ ދިރުން ފެކްޝަނުގެ 13 މެންބަރުންނާއި ޕީޕީއެމްގެ ހަ މެންބަރުންނާއި ޕީއެންސީގެ ދެ މެންބަރުންނާއި ޖުމްހޫރީ ޕާޓީގެ ދެ މެންބަރުންގެ އިތުރުން އެމްއެންޕީގެ ތިން މެންބަރުންނެވެ.
ސަރުކާރު ކޯލިޝަން ހިންގާ މައި ޕާޓީ އެމްޑީޕީގެ 56 މެންބަރުން މިހާރު ވެސް މަޖިލީހުގައި ތިއްބަވާއިރު، އަދިވެސް މަޖިލީހުގެ މެޖޯރިޓީ އޮތީ، އެ ޕާޓީއަށެވެ. އެހެންވެ، އެންމެ ފަހުން އެމްޑީޕީގެ ސަރުކާރަށް ތާއީދުކުރާ ބޭފުޅުން ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓަރު ފައްޔާޒު އިސްމާއީލް ވެސް ވަނީ، މަޖިލީހަށް ވައްދާ، އިތުބާރު ނެތްކަމުގެ އެންމެ މައްސަލައެއް ވެސް ކާމިޔާބު ނުވާނެ ކަމަށް ބުނެފައެވެ.
އިމުގެ މައްސަލައިގައި، އިދިކޮޅު އިއްތިހާދުން ވަނީ ބަންޑާރަ ނައިބު އިބްރާހީމް ރިއްފަތާއި ފޮރިން މިނިސްޓަރު އަބްދުﷲ ޝާހިދުގެ އިތުބާރު ނެތްކަމުގެ މައްސަލައެއް ވެސް މަޖިލީހަށް ހުށަހަޅައިފައެވެ.