ހުޅުމާލޭ ފަޅުތެރޭގައި އެއްވެސް ބަޔަކު ނޫޅޭ، ބޭރުގެ އުޅަނދުތަކެއް އަޅައިފައި އޮންނާތީ އެ ކަމުގެ ކަންބޮޑުވުން ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް)އިން ފާޅުކޮށްފިއެވެ.
އެ އެސޯސިއޭޝަންގެ ރައީސް އިސްމާއީލް ހަމީދު (ހައިރައިޒް އިއްސެ) ވިދާޅުވީ ހުޅުމާލޭ ފަޅުތެރޭގައި އެއްވެސް ބަޔަކު ނޫޅޭ އުޅަނދުތަކެއް އަޅައިފައި ހުރުމަކީ ބޮޑު ކަންބޮޑުވުމެއް ކަމަށެވެ.
"އެ އެއްޗެހިތައް ނަގިލި ކަހައިލައިގެން ބޯޓުތައް އެބަ ހޫރޭ ފަޅުތެރޭގައި،" އިއްސެ ވިދާޅުވިއެވެ.
މި ކަންބޮޑުވުންތައް އާބަންކޯ، ޓްރާންސްޕޯޓް މިނިސްޓްރީ، ޓޫރިޒަމް މިނިސްޓްރީ، ޕޮލިސް އަދި ކޯސްޓުގާޑުގެ ސަމާލުކަމަށް ގެނެސްފައިވާނެ ކަމަށް ވެސް އިއްސެ ވިދާޅުވިއެވެ. ނަމަވެސް، އަދިވެސް އެއްވެސް ފަރާތަކުން މި ކަމަށް އެޓެންޑުވެފައި ނުވާކަމަށް ވެސް އޭނާ ވިދާޅުވިއެވެ.
"އަޅުގަނޑުމެންނަކަށް ނޭނގެ ކޮންބައެއްގެ އެއްޗެހިތަކެއް ކަމެއް ވެސް. ބޯޓިން އެސޯސިއޭޝަނުން ރިކުއެސްޓުކުރަނީ ނުރައްކާތެރި ހާދިސާއެއް ދިމާވުމުގެ ކުރިން އެ ކަމަށް އެޓެންޑުކުރަން،" އިއްސެ ވިދާޅުވިއެވެ.
އިތުރަށް އޭނާ ވިދާޅުވީ، މިފަދަ އޮޑިފަހަރު ފަޅުތެރޭގައި ހުރުމުގެ ސަބަބުން އެ އުޅަނދުތައް ކަހާލައިގެން އެކަތި އަނެއްކައްޗާ ޖެހެން ވެސް ޖެހޭ ކަމަށެވެ. އަދި ބައެއް އުޅަނދުތަކުގެ އެއްބައި މޫދަށް ފެތިފައިވާއިރު، ނުރައްކާތެރި ހާދިސާއެއް ހިނގުމުގެ ބިރު އެބައޮތްކަމަށް ވެސް އޭނާ ވިދާޅުވިއެވެ.
މިކަމާ ގުޅިގެން ޓޫރިޒަމް މިނިސްޓްރީގެ ބަހެއް ހޯދުމަށް ކުރި މަސައްކަތުން އެ މިނިސްޓްރީގެ ބަހެއް ލިބިފައެއް ނުވެއެވެ.