ޝަރުއީ ދާއިރާގެ މުވައްޒަފުންނަށް މުސާރައިގެ ކުރިއެރުން ނުދިން މައްސަލަ ހައި ކޯޓަށް

ހައި ކޯޓު: ޝަރުއީ ދާއިރާގެ މުވައްޒަފުންނަށް މުސާރައިގެ ކުރިއެރުން ނުދިން މައްސަލަ ވަނީ ހައި ކޯޓަށް ހުށަހަޅާފަ -- ސަން ފޮޓޯ/ ފަޔާޒު މޫސާ

ޝަރުއީ ދާއިރާގެ މުވައްޒަފުންނަށް މުސާރައިގެ ކުރިއެރުން ދޭން އަމުރު ނުކުރި މައްސަލަ ހައި ކޯޓުގައި އިސްތިއުނާފް ކޮށްފިއެވެ.

ކޮންމެ ދެ އަހަރަކުން އެއް އަހަރު މުވައްޒަފުންގެ މަސައްކަތުގެ ފެންވަރު ބެލުމަށްފަހު 70 އިންސައްތައަށް ވުރެ މަތިން މާކްސް ލިބޭ މުވައްޒަފުންނަށް 200 ރުފިޔާގެ މުސާރައިގެ ކުރިއެރުމެއް ދޭންޖެހޭ ކަމަށް ޝަރުއީ ދާއިރާގެ މުވައްޒަފުންގެ ގަވާއިދުގައި ބަޔާންކޮށްފައިވެއެވެ.

ނަމަވެސް އެ ފައިސާ ނުދޭތާ ހަތަރު އަހަރު ވެފައިވާތީ، ޝަރުއީ ދާއިރާގައި މަސައްކަތް ކުރާ ބައެއް މުވައްޒަފުންގެ ފަރާތުން އެ މައްސަލަ ވަޒީފާއާ ބެހޭ ޓްރައިބިއުނަލްއަށް ހުށަހެޅިއެވެ.

ޝަރުއީ ދާއިރާގެ މުވައްޒަފުންނަށް މުސާރައިގެ ކުރިއެރުން ހައްގު ނަމަވެސް، ދައުލަތުގެ ބަޖެޓު ނެތުމުން ހަތަރު އަހަރު ވަންދެން ނުދީ ހުރި ފައިސާ ދޭން އަމުރު ނުކުރެވޭނެ ކަމަށް ވަޒީފާއާބެހޭ ޓްރައިބިއުނަލްއިން ވަނީ މި މަހު ނިންމައިފައެވެ.

އެ މައްސަލަ ޓްރައިބިއުނަލްއަށް ހުށަހެޅި މުވައްޒަފުންގެ ފަރާތުން ހައި ކޯޓުގައި އިސްތިއުނާފް ކޮށްފައެވެ. ނަމަވެސް މައްސަލަ ބަލައިގަތުމާ ގުޅޭ ގޮތުން ހައި ކޯޓުން ވަކި ގޮތެއް ނުނިންމައެވެ.

ޝަރުއީ ދާއިރާގެ މުވައްޒަފުންގެ މުސާރައިގެ އޮނިގަނޑު އެކުލަވާލާފައިވާ ގޮތަށް ބަލާއިރު، ޖުޑީޝަލް އެލަވަންސާއި އިތުރު ގަޑީގެ ފައިސާ ވެސް ހިސާބު ކުރަނީ މުސާރައިގެ ނިސްބަތަށް ބަލައިގެންނެވެ. އެހެންކަމުން މުސާރައިގެ ކުރިއެރުން ނުލިބޭތީ ޖުޑީޝަލް އެލަވަންސާއި އިތުރު ގަޑީގެ ފައިސާގެ ކުރިއެރުމެއް ވެސް ޝަރުއީ ދާއިރާގައި މަސައްކަތް ކުރާ މުވައްޒަފުންނަށް މިހާރު ނުލިބެއެވެ.

އެ މައްސަލަ ޓްރައިބިއުނަލްއަށް ހުށަހެޅިފަހުން 2017 ވަނަ އަހަރާއި 2018 ވަނަ އަހަރުގެ މަސައްކަތުގެ ފެންވަރު ބެލުމަށްފަހު 2019 ވަނަ އަހަރު ދޭންޖެހޭ ފައިސާގެ ތެރެއިން އެއް ބައި ޝަރުއީ ދާއިރާގެ މުވައްޒަފުންނަށް މިދިޔަ މަހު ދީފައިވެއެވެ. ނަމަވެސް 2022 ވަނަ އަހަރު ދޭންޖެހޭ ފައިސާ މިހާތަނަށް ދީފައި ނުވެއެވެ.

comment ކޮމެންޓް