ޕޭމަންޓް ޕްރޮސެސް ކުރުމަށްޓަކައި ހުށަހަޅަން ޖެހޭ ލިޔެކިޔުންތައް ދުރާލާ ހުށަހަޅައިފިނަމަ، ސްޓޫޑެންޓް ލޯން ފައިސާ ލިބުމުގައި ލަސްނުވާނެ ކަމަށް އެޑިއުކޭޝަން މިިނިސްޓަރު ޑރ. އިބްރާހީމް ޙަސަން މިއަދު ވިދާޅުވެއްޖެއެވެ.
ހަޔާ އެޑިއުކޭޝަން މިނިސްޓަރު މިހެން ވިދާޅުވީ، ސްޓޫޑެންޓް ލޯނާއި ދަރިވަރުންނަށް ދިނުމަށް ހަމަޖެހިފައިވާ ޕޭމަންޓުތައް ދިނުމުގައި ލަސްވަމުންދާ ޝަކުވާ ދަރިވަރުން ކުރަމުންދާ ކަމަށާ އެކަން ހައްލު ކުރުމަށް ސަރުކާރުން ކުރަމުންދާ މަސައްކަތްތަކާ ގުޅޭ ގޮތުން ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ.
މިނިސްޓަރުގެ ޖަވާބުގައި އެ ޝަކުވާ ވަރަށް ގިނައިން ލިބޭ ކަމަށް އެއްބަސްވެވަޑައިގެންނެވި ނަމަވެސް މައްސަލަ ރަނގަޅަށް ބަލާއިރު ޕޭމަންޓު ލިބުމުގައި ޑިލޭތައް އަންނަނީ ޕޭމަންޓް ޕްރޮސެސްކުރަން ބޭނުންވާ ހުރިހާ ޑޮކިއުމަންޓުތައް ހަމަ ނުވާތީ ކަމަށް ވިދާޅުވިއެވެ.
"އަޅުގަނޑުމެން އެ ބަލާލައި އިރުގައި ގިނަ ޝަކުވާތަކަކީ އަޅުގަނޑުމެންނާ ހަމައަށް އަންނަ ގޮތަށް ކަންކަން ހިނގާފަ އޮންނަ ޝަކުވާތަކެއް ނޫން،" އޭނާ ވިދާޅުވިއެވެ.
ސްޓޫޑެންޓް ލޯނުގެ ކަންކަން ހިނގާކޮށް ތަފްސީލުކޮށްދެއްވަމުން މިނިސްޓަރު ވިދާޅުވީ، ދަރިވަރުންނަށް ލޯނު ލިބިގެން އެކަން އަންގާ ފޮނުވާ އީމެއިލްއާއެކު އެޓޭޗްމަންޓެއް ލިބޭނެ ކަމަށެވެ. މި އެޓޭޗްމަންޓުގައި ޕޭމަންޓް ޕްރޮސެސް ކުރުމަށް ހުށަހަޅަން ޖެހޭ ހުރިހާ ލިޔެކިޔުންތަކުގެ ލިސްޓެއް އޮންނާނެ ކަމަށާއި ލިސްޓުގައިވާ ހުރިހާ ލިޔެކިޔުންތައް ހަމަކޮށްފިނަމަ، އެއްވެސް ދަތިކަމެއް ނެތި ޕޭމަންޓް ޕްރޮސެސް ވާނެ ކަމުގެ ޔަގީންކަން މިނިސްޓަރު ދެއްވިއެވެ.
"އޭގެން ދެ ޑޮކިއުމަންޓް ހުށަހަޅާފަ އަޅުގަނޑުމެންނަށް ނޮޓިފައި ކުރިޔަސް ޕޭމަންޓް ޕްރޮސެސް ވާކަށް ނުފަށާނެ. މީ ވަރަށް ގިނައިން ދިމާވާ މައްސަލައެއް. ވަރަށް ގިނަ ކޭސްތަކުގައި ވަރަށް ގިނަ ބޭފުޅުން ގުޅީމަ އަޅުގަނޑުމެން ޑަބަލް ޗެކް ކުރާއިރު ވަރަށް ގިނައިން އެހެން ދިމާވޭ،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ވަރަށް ގިނަ ފަހަރު ޔުނިވާސިޓީއަށް ޕޭމަންޓު ދައްކަން ގާތްވުމުން ޕޭމަންޓު ހޯދުމަށް ދަރިވަރުން މަސައްކަތް ކުރާ ކަމަށެވެ. ނަމަވެސް ޕޭމަންޓު ޕްރޮސެސް ކުރުމަކީ ސަރުކާރުގެ އުސޫލުތަކާ، މާލިއްޔަތު ގާނޫނުގެ ދަށުން ވަކި އުސޫލެއްގެ މަތިން ކަމަށާ ފައިސާގެ ކަންކަން ހަމަޖެއްސައި އެ ޕްރޮސެސް ކުރެވޭނީ ވަކިކަހަލަ ލިޔެކިޔުމެއް ލިބިގެން ކަމަށް މިނިސްޓަރު ވިދާޅުވިއެވެ.
ޕޭމަންޓުތައް ލަސްވާ ކަމުގެ ޝަކުވާ ބައެއް ކުދިންގެ ފުށުން ލިބުނު ނަމަވެސް، ގިނަ ކުދިން ދުރާލާ އެ ޒިންމާ ނަގައިގެން ޑޮކިއުމަންޓުތައް ހަމަ ކޮށްގެން ހުށަހަޅާ ކަމަށް މިނިސްޓަރު ވިދާޅުވިއެވެ.
ހަޔާ އެޑިއުކޭޝަން މިނިސްޓްރީން ވަނީ ސްޓޫޑެންޓް ލޯނަށް ކުރިމަތިލުމުގެ ފުރުސަތު އިއްޔެ ހުޅުވާލާފައެވެ. މިފަހަރުގެ މަތީތައުލީމުގެ ލޯނު ފުރުސަތުުތަކާ ގުޅޭގޮތުން ދެއްކި ވާހަކައިގައި މިނިސްޓަރު ވިދާޅުވީ ރާއްޖެ އާއި ރާއްޖެއިން ބޭރުން މަތީ ތައުލީމު ހޯދުމަށް ލޯނަށް އެދުމުގެ 720 ފުރުސަތު ހުޅުވާލާފައިވާކަމަށެވެ.
ސްޓޫޑެންޓް ލޯނަށް ހުށަހެޅުމުގެ ސުންގަޑި ހަމަވާނީ އަންނަ މަހުގެ 15 ވަނަ ދުވަހުގެ 13:30 އަށެވެ.