ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ މޫނަށް ކުޅުޖަހާ މީހަކަށް 50،000 ރުފިޔާގެ އިނާމެއް ދޭނެކަމަށް ވިދާޅުވެ ތިމަރަފުށީ ދާއިރާގެ ކުރީގެ މެމްބަރު މުހައްމަދު މުސްތަފާގެ ނަމުގައިވާ ޓްވިޓާ އެކައުންޓުން ޓްވީޓް ކުރެއްވީ އޭނާ ނޫން ނަމަވެސް އޭގައި ހުރީ ރަނގަޅު ވާހަކަތަކެއް ކަމަށް އޭނާ ވިދާޅުވެއްޖެއެވެ.
މުސްތަފާކުރެއްވި އެ ޓްވީޓާ ގުޅިގެން އިއްޔެ ވަނީ އޭނާ ފުލުހަށް ހާޒިރުކޮށް ބަޔާން ނަގާފައެވެ. އަދި މިރޭ އޭނާ ފުލުހަށް ހާޒިރުކޮށް އެ ބަޔާނުގައި ވަނީ ސޮއި ކުރުވާފައެވެ.
ފުލުސް އޮފީހުން ނުކުމެވަޑައިގެން 'ސަން' އާ ވާހާކަ ދައްކަމުން މުސްތަފާ ވިދާޅުވީ, 'ތިމަރަފުށި' ޔޫޒާ ނޭމްގައި އިން ޓްވިޓާ ހޭންޑަލް އަކީ އޭނާ ނިސްބަތްވާ ތިމަރަފުށީ ދާއިރާގެ ކަންކަމަށް ބޭނުންކުރާ އެކައުންޓެއް ކަމަށެވެ.
"އިތުރު ދެތިން މީހަކު އެ ޓްވިޓާ އެކައުންޓުން ޓްވީޓްކުރާނެ. އަޅުގަނޑުގެ ފޯނު އޮންނާނީ ގޭގެ މޭޒުމަތީގައި. އެހެން އޮންނައިރު ބައެއް ފަހަރު އެ ފޯނު ބޭނުންކުރާ ދެތިން މީހަކު އުޅޭނެ." މުސްތަފާ ވިދާޅުވިއެވެ.
ނަމަވެސް އެ ޓްވީޓްގައި ހުރި ވާހަކަތައް އޭނާ ކުށްވެރި ނުކުރާ ކަމަށް ވިދާޅުވިއެވެ. އަދި އޭގައި ހުރީ ރަނގަޅު ވާހަކަތަކެއް ކަމަށް ވެސް އޭނާ ވިދާޅުވިއެވެ.
"އެކުރި މީހަކު އެކަން ކުރިއްޔާ އެ ވާހަކަތައް އަޅުގަނޑު ކުށްވެރިއެއް ނުކުރަން. އަޅުގަނޑަށް ކަމުދޭ ދައްކާފަހުރި ވާހަކަތައް. މާފަށް އެދެން ޖެހޭ ކަމަކަށް ގަބޫލެއް ނުކުރަން," މުސްތަފާ ވިދާޅުވިއެވެ.
މޫނަށް ކުޅުޖެހުމަކީ ދިވެހިންނަށް އާ ކަމަކަށްވި ނަމަވެސް އެއީ ދުނިޔޭގެ އެހެން ގައުމުތަކުގައި ކޮށް އުޅޭ ކަމެއް ކަމަށް ވެސް މުސްތަފާ ވިދާޅުވިއެވެ.
މުސްތަފާއަކީ އެމްޑީޕީ މެމްބަރެކެވެ. އެ ޕާޓީގެ ޕްރައިމަރީގައި އޭނާ ތާއީދު ކުރީ އެމްޑީޕީގެ ރައީސް މުޙައްމަދު ނަޝީދަށެވެ. އަދި ރައީސް ޞާލިޙަށް ވަރަށް ބޮޑަށް ފާޑުވިދާޅުވެ އޭނާ ވަނީ ވާހަކަ ދައްކަވާފައެވެ.
ދާދި ފަހުން ފުލުހުން ވަނީ، މާލޭ ސިޓީ ކައުންސިލުގެ ތަރުޖަމާނު މަރިޔަމް ޝިއުނާ ކުރެއްވި ޓްވީޓެއްގެ މައްސަލަ ވެސް ބަލަން ފަށާފައެވެ. އޭނާގެ ޓުވީޓުގައި ވަނީ ވަރަށް ހަރުކަށިކަމާއެކު ބަޔަކު ނިކުމެ މިހާރު އޮތް ވެރިކަން ނިންމަން ވެއްޖެ ކަމަށް ބުނެފައެވެ.