މާލޭ ސިޓީ ކައުންސިލުގެ ލޭންޑް ޔޫސް ޕްލޭން ފާސްކޮށް ނުދޭތީ ސިޓީ ކައުންސިލްގެ ގިނަ މަޝްރޫތަކެއް ހިންގަން ހުރަސް އެޅިފައިވާކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ސިޓީ ކައުންސިލުން ހިންގަން ރާވައިފައިވާ ބޮޑެތި މަޝްރޫތަކާ ގުޅޭ ގޮތުން "ސަން"އާ މިއަދު ވާހަކަދައްކަވަމުން މުއިއްޒު ވިދާޅުވީ، ކޮންމެ މަޝްރޫއެއް ވެސް ސިޓީ ކައުންސިލުން ހިންގަން ނިންމަނީ އެކަން ކުރާނެ ގޮތުގެ ހަރުދަނާ ޕްލޭނަކާއެކު ކަމަށެވެ.
އެހެން ނަމަވެސް އެކަން ތަންފީޒުކުރަން އޮންނަ އެންމެ ބޮޑު ހުރަހަކީ ސަރުކާރުން އަދިވެސް ލޭންޑް ޔޫސް ޕްލޭން ފާސްކޮށް ނުދިނުން ކަމަށެވެ.
"އެ ނެތި ތަރައްގީގެ މަޝްރޫތަކެއް އަސްލު ނުއެއް ހިންގޭ. ދެން އަޅުގަނޑުމެންނަށް އަހަރެއްހާ ދުވަސް މި ގެއްލުނީ ސަރުކާރުން އެ ޕްލޭން ފާސްކޮށް ނުދީގެން. އެއީ އަޅުގަނޑުމެން ލޭންޑް ޔޫސް ޕްލޭން ނުހަދައިގެންނެއް ނޫނޭ. ހުރިހާ ކަމެއްކޮށް، ނިންމައި، ހުރިހާ ޕްރޮސީޖާއެއް ފުރިހަމަކުރުމަށްފަހު ހުށަހެޅި ޕްލޭނަށް އެއް އަހަރުވީ. އަދިވެސް ފާސްކޮސް ނުދެއްވާ،" މުއިއްޒު ވިދާޅުވިއެވެ.
މާލޭ މަސް މާރުކޭޓު ތަރައްގީކޮށް ޒަމާނީ ފެންވަރަށް ހަތަރު ބުރީގެ އިމާރާތެއް އެޅުމާ ގުޅޭ ޕްލޭނެއް ސިޓީ ކައުންސިލުން ވަނީ އެކުލަވާލައިފައެވެ.
އެ މަޝްރޫއުގެ އަމަލީ މަސައްކަތް 2022ވަނަ އަހަރުގެ ތެރޭ ފެށޭނެކަމަށް ސިޓީ ކައުންސިލުން ކުރިން ބުނި ނަމަވެސް އެކަން އެގޮތަށް ފެށިފައެއް ނުވެއެވެ.
"އެ މަސައްކަތް ވެސް އަސްލު ނުފެށުނީ ލޭންޑް ޔޫސް ޕްލޭން ސަރުކާރުން ފާސްކޮށް ނުދެއްވާތީ. އަޅުގަނޑުމެން މަސް މާރުކޭޓު އަޅަން ބޭނުންވާ ފަރާތެއް ހޯދައި ހުރިހާ ޕްރޮސެސެއް އެކަމުގައި އޮތީ ނިމިފައި. އެކަމު ކިހިނެތްތޯ ކުރެހުން ހުށަހަޅައި ފާސްކުރާނީ،" މުއިއްޒު ސުވާލު އުފެއްދެވިއެވެ.
މަސް މާރުކޭޓު ތަރައްގީކުރަން ނިންމައިފައިވަނީ އެ ތަން ހަތަރު ބުރީގެ އިމާރާތެއްގެ ގޮތުގައި ކަމަށާއި އެ ތަނަށް ލޯކަލް މާރުކޭޓާއި ތަރުކާރީއާއި މޭވާ މާރުކޭޓު ބަދަލުކުރާ ގޮތަށް ހިތްފަސޭހަ ތަނެއްގެ ގޮތުގައި ކަމަށެވެ. ނަމަވެސް އެކަން ވެސް ކުރެވޭނީ ހުއްދަ ލިބިގެން ކަމަށް މޭޔަރު ވިދާޅުވިއެވެ.
ލޭންޑް ޔޫސް ޕްލޭން ފާސްކޮށްދެނީ ވެސް ޕްލޭނިން މިނިސްޓްރީން ކަމަށާއި، ކުރެހުން ވެސް ފާސްކުރަން އޮންނަނީ ހަމަ އެ މިނިސްޓްރީކަމަށް މުއިއްޒު ވިދާޅުވިއެވެ.
"އެކަހަަލަ ގޮތަކަށް ތާށިވެފައި އެ ވެސް މި އޮތީ. ދެން 'އެ ވެސް' އޭ މި ދެންނެވީ ޕާކިން ބިލްޑިންތަކާއި މަސް މާރުކޭޓާއި އެ ކަހަަލަ ގިނަ ކަންތައް މި ހިމެނެނީ،" އޭނާ ވިދާޅުވިއެވެ.
މުއިއްޒު ވިދާޅުވީ އަދިވެސް ލޭންޑް ޔޫސް ޕްލޭނަށް ބަދަލު ގެންނަން ސަރުކާރުން ބޭނުންވާނަމަ ސަރުކާރާ ވާހަކަދައްކައިގެން އެ މަސައްކަތް ކުރަން ސިޓީ ކައުންސިލުން ތައްޔާރަށް އޮތްކަމަށެވެ.
މޭޔަރު ވިދާޅުވީ އުންމީދަކީ ވީ އެންމެ އަވަހަކަށް އެ ޕްލޭން ފާސްވުން ކަމަށެވެ. އަދި އެކަން އަވަހަށް ނުކުރެވޭނަމަ ކައުންސިލަށާއި މަލޭ ރައްޔިތުންނަށް ލިބޭ ގެއްލުން ބޮޑުވާނެކަމަށް ވެސް އޭނާ ވިދާޅުވިއެވެ.
"އަޅުގަނޑުމެންގެ ޕްލޭންތައް ވެސް ވަރަށް ބޮޑަށް ފަހަތަށް ދިޔަ ނޫންތޯ. ބޮޑު ގެއްލުމެއް ނޫންތޯ ޚާއްސަކޮށް ރައްޔިތުންނަށް ލިބޭ،" މުއިއްޒު ވިދާޅުވިއެވެ.