ހދ. ނޮޅިވަރަމްގައި މަރުވެފައި އޮއްވާ ފެނުނު, އެރަށު ހިތަށް ފިނިވާގޭ، ނިޝާމާ މުހައްމަދުގެ ހަށިގަނޑު ޕޯސްޓްމޯޓަމް ހެދުމަށްފަހު ރާއްޖެ ގެނެސްފިއެވެ.
"ސަން"އަށް އެނގިފައިވާގޮތުގައި ރާއްޖެ ގެނެސް ނިޝާމާގެ ހަށިގަނޑު މިހާރު ވަނީ އާ ސަހަރާއަށް ގެންގޮސްފައެވެ.
ނޮޅިވަރަމްގައި ނިޝާމާ ދިރިއުޅެމުން ދިޔަ ގޭތެރޭގައި އޭނާ މަރުވެފައި އޮއްވާ ފެނިފައިވަނީ މިމަހުގެ 10 ވަނަ ދުވަހުއެވެ. އޭނާގެ ހަށިގަނޑު ފެނިގެން އެރަށު ސިއްހީ މަރުކަޒަށް ގެންދިޔައިރު ވެސް އޭނާ އޮތީ މަރުވެފައެވެ.
ޕޯސްޓްމޯޓަމް ހެދުމަށް ނިޝާމާގެ ހަށިގަނޑު އިންޑިއާއަށް ފޮނުވައިލީ މިދިޔަ ބުދަ ދުވަހުއެވެ.
ފުލުހުންގެ ޚާއްސަ ތަހުގީގު ޓީމެއް އެރަށަށް ގޮސް ނިޝާމާގެ ޕޯސްޓްމޯޓަމް ހަދަން ނިންމި ނަމަވެސް، މީގެކުރިން އޭނާގެ އާއިލާއިން އެކަމާ ދެކޮޅު ހެދިއެވެ.
މި މައްސަލައިގައި އެންމެން ވެސް ތުހުމަތުގެ އިނގިލި ދިއްކުރި ނޮޅިވަރަމް ފެނަކަ ބްރާންޗްގެ ޓެކްނީޝަނެއްގެ ވަޒީފާގައި މަސައްކަތް ކުރާ، އޭނާގެ ފިރިމީހާ، އދ. ފެންފުށި ރޯޒީވިލާ، އަބޫބަކުރު ފައިސަލް ހައްޔަރުކޮށްފައި ވަނިކޮށް ވަނީ އަމިއްލައަށް ދަންޖެހިފައެވެ. އެއަށްފަހު އޭނާއަށް ހޮސްޕިޓަލްގައި ފަރުވާދެމުން ދަނިކޮށް ވަނީ މަރުވެފައެވެ.
ފައިސަލް މަރުވި ނަމަވެސް މައްސަލައިގެ ތަހުގީގު ކުރިއަށް ދާނެ ކަމުގެ ޔަގީންކަން ފުލުހުން ވަނީ ދީފައެވެ.
ނިޝާމާގެ މަރުގެ ހަގީގަތް ހޯދަން، އެ މަރުގެ ތުހުމަތުކުރެވޭ ފައިސަލް ވެސް މަރުވުމުން އިތުރު ގޮންޖެހުމަކަށް ވެގެން ދިއުމާއެކު، ނިޝާމާގެ ޕޯސްޓްމޯޓަމް ހެދުން ނޫން ގޮތެއް ދެން ނެތްކަމަށާއި، ޕޯސްޓްމޯޓަމް ހަދަން ފުލުހުންނަށް އެއްބާރުލުން ދޭނެ ކަމަށްވެސް އާއިލާއިން ބުނެފައިވެއެވެ.
ނިޝާމާއާއި ފައިސަލްގެ ކައިވެންޏަށް ތިން ކުދިން ވަނީ ލިބިފައެވެ. އޭގެ ތެރެއިން އެންމެ ބޮޑު ކުއްޖާއަށް ހަތް އަހަރު ފުރިފައިވާއިރު ދެވަނަ ކުއްޖާގެ އުމުރަކީ ހަތަރު އަހަރެއެވެ. އެންމެ ހަގު ކުއްޖާއަށް ދެ އަހަރެވެ.