ޣާޒީ ސްކޫލުގެ އެޑްމިނިސްޓްރޭޓަރުގެ މަގާމުގައި ހުރި، އައިޝަތު ޝިޔާޒާގެ ކޮރަޕްޝަންގެ މައްސަލަ ބަލައި އެކަށީގެންވާ ފިޔަވަޅު އަޅާނެކަމަށް އެޑިއުކޭޝަން މިނިސްޓްރީން މިއަދު ބުނެފިއެވެ.
ހުޅުމާލޭ، ޣާޒީ ސްކޫލުގެ އެޑްމިނިސްޓްރޭޓަރު ޝިޔާޒާ، ކޮރަޕްޝަންގެ އަމަލުތައް ހިންގިއިރު، އެޑިއުކޭޝަން މިނިސްޓްރީން އެކަމާމެދު ފިޔަވަޅު އަޅާފައި ނުވާ ކަމަށް ބުނެ އެ ސްކޫލުގެ ޓީޗަރުން މިއަދު ވަނީ އިހުތިޖާޖުކޮށްފައިވެއެވެ.
މި އިހުތިޖާޖުގައި ބައިވެރިވާ އިސް ޓީޗަރަކު ނަން ނުޖަހަން ޝަރުތުކޮށް މިއަދު "ސަން"އަށް ވިދާޅުވީ، އެޑްމިނިސްޓްރޭޓަރުގެ ކޮރަޕްޝަން ބޮޑުވެ، އެ މައްސަލަ އެޑިއުކޭޝަން މިނިސްޓަރާ ހަމައަށް ވެސް ގެންގޮސްފައިވާ ކަމަށެވެ. ނަމަވެސް އެއްވެސް ފިޔަވަޅެއް އަޅައިފައި ނުވާ ކަމަށް ވިދާޅުވިއެވެ.
އެކަމާ ގުޅިގެން އެޑިއުކޭޝަން މިނިސްޓްރީން މިއަދު ނެރުނު ބަޔާނުގައި ބުނީ ސްކޫލުގެ އެޑްމިނިސްޓްރޭޓަރު ޝިޔާޒާއަށް ތުހުމަތު ކުރެވޭ ކޮރަޕްޝަންގެ މައްސަލައާ ގުޅިގެން އެ މިނިސްޓްރީން އިންޓާނަލް އޮޑިޓެއް ހަދައިފައިވާ ކަމަށެވެެ.
އަދި ފައިސާ ޚަރަދުކުރުމުގައި މާލިއްޔަތު ގަވައިދާ ޚިލާފަށް އަމަލުކޮށްފައިވާކަން ފާހަގަވުމުން، އެކަން ބަލަން ވެސް އިދާރީ ތަހުގީގެއް ކުރިއަށް ގެންދާކަމަށް މިނިސްޓްރީން ބުންޏެވެ.
އެއާއެކު މިހާރު އެ ކަމުގައި ޝާމިލުވާ ހުރިހާ މުވައްޒަފުންނާ މެދު އިސްލާހީ ފިޔަވަޅު އެޅުމުގެ މަސައްކަތް ކުރަމުން އަންނަކަމަށް މިނިސްޓްރީން ބުންޏެވެ.
ނަމަވެސް މި ކަންކަން ކުރަން ފެށި ވަކި ތާރީޚެއް މިނިސްޓްރީން ހާމަކޮށްފައެއް ނުވެއެވެ.
މިނިސްޓްރީން ބުނިގޮތުގައި މީގެ އިތުރުން ސްކޫލަށް ބެލެނިވެރިން ހަދިޔާކުރި ޓީވީތަކެއްގެ ތެރެއިން އެއް ޓީވީ މުވައްޒަފަކު ގެއަށް ގެންދިޔަ މައްސަލައަކާއި އެޑްމިނިސްޓްރޭޓަރު އިސްވެ މުވައްޒަފުންތަކެއްގެ ޑޮކިއުމަންޓް ފޯޖުކުރި މައްސަލަ ވެސް އަންނަނީ ތަހުގީގުކުރަމުންނެވެ.
އަދި އެ ކަމުގައި ޖިނާއީ ކުށްތަކެއް ހިމެނޭތީ އެ މައްސަލަ ފުލުހަށް ހުށަހަޅައިފައިވާކަމަށް ވެސް އެ މިނިސްޓްރީގެ ބަޔާނުގައިވެއެވެ.
މި މައްސަލަތައް ފެންމަތިވެފައިވަނިކޮށް، އެޑްމިނިސްޓްރޭޓަރު ޝިޔާޒާ ވަނީ އެޑިއުކޭޝަން މިނިސްޓްރީގެ އިންކްލޫސިވް އެޑިއުކޭޝަން ޑިޕާޓްމަންޓަށް ދެ މަސް ދުވަހުގެ މުއްދަތަކަަށް ބަދަލުކޮށްފައެވެ.
ސްކޫލުގެ ޓީޗަރުންނާއި މުވައްޒަފުންނަށް އެ ކަން ސިފަވީ ޝިޔާޒާއަށް ދިން ޕްރޮމޯޝަނެއްގެ ގޮތުގައެވެ.
ނަމަވެސް މިނިސްޓްރީން ބުނީ އެކަން ކުރީ އޭނާގެ މައްސަަލަ ތަހުގީގުކުރުމުގައި އިތުރަށް ފަސޭހަކުރުމަށް ކަމަށެވެ.
"އެޑްމިނިސްޓްރޭޓަރު މި މިނިސްޓްރީގެ ޑިޕާޓްމަންޓަކަށް ވަގުތީ ގޮތުން ބަދަލުކުރެވުނީ، ދެވުނު ޕްރޮމޯޝަނެއްގެ ގޮތަކު ނޫނެވެ. އަދި، އެ ފަރާތުގެ ވަޒީފާ މިނިސްޓްރީއަށް ބަދަލުކުރި ކުރުމެއްގެ ގޮތުގައެއް ނޫނެވެ،" މިނިސްޓްރީގެ ބަޔާނުގައިވެއެވެ.
އެޑިއުކޭޝަން މިނިސްޓްރީން ބުނީ މިހާރު އެ މައްސަލައިގައި ހިމެނޭ މީހުންނަށް ޖަވާބުދާރީވުމުގެ ފުރުސަތު ދީފައިވާކަމަށެވެ. އަދި އެ މީހުންނާ މެދު ފިޔަަވަޅު އަޅާނީ ސިވިލް ސާވިސް ކޮމިޝަންގެ ގަވައިދާ އެއް ގޮތަށް ކަމަށް ބުންޏެވެ.