ހުޅުމާލޭ، ޣާޒީ ސްކޫލުގެ އެޑްމިނިސްޓްރޭޓަރު އައިޝަތު ޝިޔާޒާ، ކޮރަޕްޝަންގެ އަމަލުތައް ހިންގިއިރު، އެޑިއުކޭޝަން މިނިސްޓްރީން އެކަމާމެދު ފިޔަވަޅު އަޅާފައި ނުވާ ކަމަށް ބުނެ އެ ސްކޫލުގެ ޓީޗަރުން މިއަދު އިހުތިޖާޖު ކުރަން ފަށައިފިއެވެ.
އެ ސްކޫލްގެ ގޯތިތެރޭގައި ޓީޗަރުން އިހުތިޖާޖު ފެށީ ހެނދުނު ދަންފަޅީގެ ދަރިވަރުން ސްކޫލް ނިމުނު ވަގުތެވެ. އެގޮތުން އިހުތިތާޖު ކުރި ޓީޗަރުން ތިބީ ޝުއޫރުތައް ލިޔެފައިވާ ޕޯސްޓަރުތަކެއް ހިފައިގެންނެވެ.
މި އިހުތިޖާޖުގައި ބައިވެރިވާ އިސް ޓީޗަރަކު ނަން ނުޖަހަން ޝަރުތުކޮށް މިއަދު "ސަން"އަށް ވިދާޅުވީ، އެޑްމިނިސްޓްރޭޓަރުގެ ކޮރަޕްޝަން ބޮޑުވެ، އެ މައްސަލަ އެޑިއުކޭޝަން މިނިސްޓަރާ ހަމައަށް ވެސް ގެންގޮސްފައިވާ ކަމަށެވެ. ނަމަވެސް އެއްވެސް ފިޔަވަޅެއް އަޅައިފައި ނުވާ ކަމަށް ވިދާޅުވިއެވެ.
އޭނާ ވިދާޅުވިގޮތުގައި އެޑްމިނިސްޓްރޭޓަރު ވަނީ ބައެއް މުވައްޒަފުންނަށް ސަލާމުގެ ސެޓްފިކެޓް ފޯޖުކޮށްދީފައެވެ.
މީގެ އިތުރުން ސްކޫލުގެ ޓާފު ދަނޑު ކުއްޔަށް ދީގެން ލިބޭ ފައިސާއަށް ޚިޔާނާތްތެރިވާ ކަމަށް ވެސް އޭނާ ތުހުމަތު ކުރެއްވިއެވެ. އަދި މަގާމުގެ ނުފޫޒު ބޭނުންކޮށްގެން އެހެން މީހުންނަށް ސްކޫލުން އެކިއެކި ފައިދާ ހޯދައިދޭ ކަމަށް ވެސް ވިދާޅުވިއެވެ.
ޣާޒީ ސްކޫލު ޓީޗަރުން އިހްތިޖާޖުކުރަނީ --
ހަމައެއާއެކު ސްކޫލުގެ މަރާމާތުގެ މަސައްކަތްތަކުގައި އެޑްމިނިސްޓްރޭޓަރު އިހުމާލުވާ ކަމަށް ވެސް ޓީޗަރު ވިދާޅުވިއެވެ.
"ދެން އޭނާ އެހެން މީހުން ކުރިމަތީ މި ބުނަނީ ފުއްޓަތްކެއް ޖަހާލާފައި، މި މައްސަލަ އޮއްބައިލާނަމޭ،" ޓީޗަރު ވިދާޅުވިއެވެ.
ސްކޫލުގެ ޓީޗަރުން ތުހުމަތުކުރާ ގޮތުގައި އެޑްމިނިސްޓްރޭޓަރުގެ މައްސަލަ ނުބަލައި ދޫކޮށްލުމުގައި އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ އަހްމަދު އަލީގެ ނުފޫޒު އެބައޮތެވެ.
މި މައްސަލަތައް ފެންމަތިވެފައިވަނިކޮށް، އެޑްމިނިސްޓްރޭޓަރު ޝިޔާޒާ ވަނީ އެޑިއުކޭޝަން މިނިސްޓްރީގެ އިންކްލޫސިވް އެޑިއުކޭޝަން ޑިޕާޓްމަންޓަށް ދެ މަސް ދުވަހުގެ މުއްދަތަކަަށް ބަދަލުކޮށްފައެވެ.
"މި ހުރިހާ ކަމަކާއެކު އިތުރު ތަޖުރިބާ ހޯދައިދޭށޭ ކިޔައިފައި މިނިސްޓްރީއަށް އޭނާ މި ބަދަލުކުރަނީ. ދެން އަޅުގަނޑުމެންނަށް ހީވަނީ މިއީ، އޭނާއަށް ދިން ޕްރޮމޯޝަނެއް ހެން،" ޓީޗަރު ވިދާޅުވިއެވެ.
މި މައްސަލަ އެންމެ ފުރަތަމަ ސްކޫލުގެ ސީނިއާ މެނޭޖްމަންޓުގެ ފަރާތުން ސްކޫލުގެ ޕްރިންސިޕަލް މަރިޔަމް މުހައްމަދަށް ވެސް ހުށަހެޅިއެވެ.
އެހެންނަމަވެސް ފިޔަވަޅު ނާޅައި ތިއްބައި، އަލުން އެ މައްސަލަ ބޮޑުވުމުން ޕްރިންސިޕަލް، އެޑްމިނިސްޓްރޭޓަރާ މެދު ފިޔަވަޅު އެޅިއެވެ.
ނަމަވެސް އެހާ ހިސާބުން އެޑިއުކޭޝަން މިނިސްޓްރީގެ ޕާމަނަންޓް ސެކެޓްރީ އަހްމަދު އަލީ ޕްރިންސިޕަލަށް އިންޒާރުދިންކަމަށް ޓީޗަރުން ބުނެއެވެ.
" އެކަމާ ގުޅިގެން އެޑިއުކޭޝަންގެ ޕީއެސް ވަރަށް ގަދަަޔަށް ޕްރިންސިޕަލަށް ދިންކަމަށް ވަނީ. އޭނާ ހުރި ގޮތަށް ހުރީ، ޕްރިންސިޕަލަށް ދާން ޖެހުނީ،" ޓީޗަރު ވިދާޅުވިއެވެ.
އެއާއެކު މިހާރު ވެސް އެ ސްކޫލު ހިންގަނީ ޕްރިންސިޕަލެއް ނެތިއެވެ. ސްކޫލު ހިންގަނީ ޑެޕިއުޓީ ޕްރިންސިޕަލެވެ.
ޓީޗަރުން ބުނީ ކޮރަޕްޝަނަށް ޒީރޯ ޓޮލަރެންސް ދޭން ވައުދުވެ، އެ ފަދަ ކަމަކަށް މިނިސްޓްރީ ތެރެއިން ހިތްވަރު ދިނުމަކީ ބަލައިގަނެވޭނެކަމެއް ނޫން ކަމަށެވެ.
އިހްތިޖާޖު ކުރާކަން އެނގިގެން މިއަދު އެޑިއުކޭޝަންގެ ޓީމެއް އެ ސްކޫލަށް ދިޔައެވެ. ނަމަވެސް އިހްތިޖާޖަށް ޓީޗަރުން ނިކުތީ ފްރަސްޓްރޭޝަން އިތުރުވުމުން އެ އަޑު އިއްވާށެވެ.