އިންޑިއާގެ ހިންދޫ ދީނުގެ މުނާސަބަތެއް ކަމަށްވާ ދިވާލީއަށްފަހު ނިއު ދިއްލީގެ ޖައްވު ނުރައްކާތެރި މިންވަރަކަށް ތަޣައްޔަރުވެއްޖެއެވެ.
ހިންދޫ ދީނުގެ "ފެސްޓިވަލް އޮފް ލައިޓްސް" ފާހަގަކުރުމުގެ ގޮތުން ނިއު ދިއްލީގައި ދިރިއުޅޭ އާންމުން ވަނީ ހަވާއަރުވާފައެވެ.
ދުނިޔޭގެ ގައުމުތަކުގެ ވެރިރަށްތަކުގެ ތެރެއިން އެންމެ ވައި ނުސާފު ނިއު ދިއްލީގައި ހަވާ އެރުވުމާއި، ހަވާ ވިއްކުމާއި ގަތުން މިދިޔަ މަހު ވަނީ މަނާކޮށްފައެވެ. އަދި މި ނިންމުމާ ދެކޮޅަށް އަމަލުކުރާ ފަރާތްތަކަށް ހަ މަހުގެ ޖަލުހުކުމެއް އަންނަ ގޮތަށް ނިއު ދިއްލީން ކަނޑައެޅިއެވެ.
ނަމަވެސް މި އަހަރުގެ ދިވާލީއާ ދިމާކޮށްވެސް ނިއު ދިއްލީގެ 20 މިލިއަނަށްވުރެ ގިނަ މީހުން ވަނީ ހަވާއަރުވާފައެވެ.
ބައިނަލްއަޤުވާމީ މޮނިޓަރިންގ ކުންފުނި އައިކިއު އެއާއިން ހާމަކޮށްފައިވާ ގޮތުގައި ހަށިގަނޑަށް ނުރައްކާތެރި ޕީއެމް 2.5 ޕާޓިކަލްތައް ނިއު ދިއްލީގެ ޖައްވުގައި 3 ގުނަ ވަނީ އިތުރުވެފައެވެ. މިއީ ވައިގެ ކޮލިޓީގެ އިންޑެކްސްގެ 350 ވަނައެވެ.
ޕީއެމް 2.5 ޕާޓިކަލަކީ ހިތާއި ފުއްޕާމޭގެ ބަލިތައް ޖައްސާ ނުރައްކާތެރި ޕާޓިކަލެކެވެ. މި ޕާޓިކަލްގެ ސަބަބުން ފުއްޕާމޭގެ ކެންސަރު ޖެހުމަށް ވެސް މަގުފަހިކޮށްދެއެވެ.
މިކަމާ ގުޅިގެން ދިއްލީގެ ޗީފް މިނިސްޓަރު އަރުވިންދު ކެޖްރީވާލު ވިދާޅުވީ، ދިއްލީގެ ވައި ތަޣައްޔަރު ވިޔަނުދިނުމަށް އެ ސަރަހައްދުގެ އާންމުން އަންނަނީ މަސައްކަތް ކުރަމުން ކަމަށެވެ.
ދުނިޔޭގެ އެންމެ ޕޮލިއުޓެޑް 30 ސިޓީތަކުގެ ތެރެއިން 22 ސިޓީއަކީ އިންޑިއާގެ ސިޓީތަކެވެ. ނިއު ދިއްލީގެ ޖައްވު ކޮންމެ އަހަރެއްގެ ދިވާލީއަށްފަހު ތަޣައްޔަރުވާއިރު، އެ ސަރަހައްދުގެ ވެހިކަލްތަކާއި، އަވަށްޓެރި ސްޓޭޓުތަކުގެ ދަނޑުވެރިން އަންދާ ކުނީގެ ސަބަބުން މި ނިސްބަތް ކޮންމެ އަހަރަކުވެސް ދަނީ އިތުރުވަމުންނެވެ.