އެމްއެމްޕީއާރުސީގެ ހިޔާނާތުގެ ފަސް މައްސަލައެއްގައި ދައުވާ ކޮށްދިނުމަށް ޕްރޮސިކިއުޓަ ޖެނެރަލް (ޕީޖީ)ގެ އޮފީހަށް ހުށަހެޅުމަށްޓަކައި، އެ އޮފީހާއެކު މަޝްވަރާތައް ފަށާފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން ބުނެފިއެވެ.
އޭސީސީން މިއަދު މީޑިއާތަކާ ހިއްސާކުރި މައުލޫމާތުގައި ވަނީ އެ އިދާރާއިން ޕީޖީއަށް ދައުވާކުރަން ހުށަހަޅާ ފަސް މައްސަލައިގެ ތެރޭގައި އަމިއްލަ ފަރުދުންނާއި ކުންފުނިތައްވެސް ހިމެނޭ ކަމަށެވެ.
އެކަމުގެ އިތުރު ތަފްސީލެއް ހާމަކޮށްފައިނުވާއިރު އޭސީސީން ބުނީ ޕީޖީއާއެކު މަޝްވަރާ ކުރުމަށްފަހު އެ މައްސަލަތަކާ ގުޅެ އިތުރު މައުލޫމާތު ހާމަކުރާނެ ކަމަށެވެ.
އެ ހިޔާނާތް އެންމެ ފުރަތަމަ ތަހުގީގުކުރީ އޭސީސީ އާއި އެސެޓް ރިކަވަރީ ކޮމިޝަނާއި ފުލުހުން ގުޅިގެންނެވެ.
ނަމަވެސް އެމްއެމްޕީއާރުސީގެ ހިޔާނާތާ ގުޅޭ ތަހުގީގު ހަމައެކަނި އޭސީސީން ފެށީ ކުރިން އެ މައްސަލަތައް ތަހުގީގު ކުރަމުންދިޔަ އެސެޓް ރިކަވަރީ ކޮމިޝަން އުވާލައި ހުރިހާ މަސައްކަތްތަކެއް އޭސީސީއާ ހަވާލުކުރުމުންނެވެ.
އެސެޓް ރިކަވަރީ ކޮމިޝަން އުވާލީ އެކަށީގެންވާ ގޮތެއްގައި މައްސަލަތައް ނުބެލި ލަސްވަމުންދާކަމުގެ ޝަކުވާއާ ފާޑުކިޔުންތަކުގެ ސަބަބުންނެވެ.
އެސެޓް ރިކަވަރީ ކޮމިޝަން އުވާލުމުން އެމްއެމްޕީއާރުސީގެ މައްސަލައިގެ ކަންކަން އަލުން މުރާޖައާ ކުރުމުގެ މަސައްކަތް އޭސީސީން ފެށީ މި އަހަރުގެ އޭޕްރީލް މަހުގެ ތެރޭގައެވެ.
އެމްއެމްޕީއާރުސީ ހިޔާނާތުން ފައިދާ ލިބުނު މީހުން ހިމެނޭ ލިސްޓެއް އެންމެ ފުރަތަމަ އޭސީސީއާއި އެސެޓް ރިކަވަރީ ކޮމިޝަނާއި ފުލުހުން އާންމުކުރިއެވެ.
އެމްއެމްޕިއާރުސީގެ ހިޔާނަތާ ގުޅިގެން މިހާތަނަށް ދައުވާކޮށްފައި ވަނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި އެމަނިކުފާނުގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ ވެރިޔަކަށް އޭރު ހުންނެވި އަބްދުﷲ ޒިޔަތާއި ރައްޔިތުންގެ މަޖިލީހުގެ ކުރީގެ މެންބަރު އަހުމަދު ނިހާން ހުސެއިން މަނިކުގެ މައްޗަށް އެކަންޏެވެ.
ބޮޑު ހިޔާނާތުގައި ފައިސާ ލިބުނު މީހުންނާއި އެ ހިޔާނާތް ހިންގުމަށް ނުއަގުގައި ވިއްކާފައިވާ ރަށްތަކާއި ފަޅުތަކުގެ މައްސަލައިގެ ތަހުގީގު އެއްކޮށް ކުރިއަށް ގެންދަން އޭސީސީން ވަނީ ނިންމައިފައެވެ.
މީގެ އިތުރުން މިދިޔަ އަހަރުގެ ތެރޭގައި އޮޑިޓު އޮފީހުން އެކުލަވައިލި ރިޕޯޓެއްގައި އެމްއެމްޕީއާރުސީ މެދުވެރިކޮށް ނުއަގުގައި ވިއްކި ރަށްތަކާއި ފަޅުތަކުގެ ހަމަ އަގު ވަނީ ހިމަނައިފައެވެ.
ހަމައެއާއެކު އެސީސީން ވަނީ އެ މައުލޫމާތުގެ އަލީގައި އެ ރަށްތަކަށް ހަމަ އަގު ހޯދައި، ދައުލަތަށް ގެއްލިފައިވާ ފައިސާ އަނބުރާ ހޯދުމުގެ މަސައްކަތަށް ހާއްސަ އިސްކަމެއް ދޭނެ ކަމަށް މީގެ ކުރިން ވެސް ބުނެފައެވެ.
މިދިޔަ އަހަރު އޮޑިޓު އޮފީހުން އެކުލަވައިލި ރިޕޯޓެއްގައި އެމްއެމްޕީއާރްސީން 37 ރަށާއި 12 ފަޅު ނުއަގުގައި ވިއްކާލައިފައިވާ ކަމަށް ބުނެފައިވެއެވެ. އޭގެ ސަބަބުން ތިން ބިލިއަނަށް ވުރެ ގިނަ ރުފިޔާގެ ގެއްލުން ދައުލަތަށް ލިބިފައިވާ ކަމަށް ވެސް އެ އޮޑިޓު ރިޕޯޓުގައިވެއެވެ.