މޯލްޑިވްސް މީޑިއާ ކައުންސިލް (އެމްއެމްސީ)ގެ ތިޖޫރީ ފަޅާލައި އޭގައި ހުރި ފައިސާކޮޅު ވަގަށް ގެންގޮސްފިއެވެ.
އެމްއެމްސީގެ ރައީސް ޝަހުބާން ފަހުމީ 'ސަން' އަށް ވިދާޅުވީ, އެ އިދާރާގެ ތިޖޫރީ ފަޅާލާފައި ހުރިކަން އެނގުނީ މިއަދު ހެނދުނު މުވައްޒަފުން އޮފީހަށް ދިއުމުން ކަމަށެވެ.
"ބޮޑަށް ބެލެވެނީ ރޭގައި ކަމަށް މި ތިޖޫރީ ފަޅާލީ. އޭގައި ހުރި 3600 އެއްހާ ރުފިޔާ ވަނީ ވަގަށް ގެންގޮސްފައި. އިތުރު އެއްޗެއް ވަގަށް ގެންދިޔަކަން އަދި ފާހަގަވެފައެއް ނުވޭ," ޝަހުބާން ފަހުމީ ވިދާޅުވިއެވެ.
އެ ތިޖޫރީގައި ހުރީ ޕޭޓީކޭޝްއަށް ބޭނުންކުރުމަށް ހުރި މަދު ފައިސާކޮޅެއްކަން ފާހަގަކޮށް ޝަހުބާން ވިދާޅުވީ, އެ ފައިސާ ވަގަށް ނަގާފައިވަނީ ތިޖޫރީގެ ތަޅު ހަލާކުކޮށްލައިގެން ކަމަށެވެ.
މަޖީދީ މަގު ބިއްލޫރިޖެހިގޭގެ ދެވަނަ ފަންގިފިލާގައި ހުންނަ އެމްއެމްސީގެ ތިޖޫރީ ފަޅާލި ނަމަވެސް އެތަނަށް ވަދެ ނިކުންނަ ދޮރަށް ހަލާކޮށްލާފައެއް ނުވެއެވެ. އެހެންކަމުން އެތަނަށް ވަގުން ވަދެފައިވަނީ ފާހަނާގެ ފެންލައިޓުން ކަމަށް ޝަހުބާން ވަނީ ލަފާކޮށްފައެވެ.
އެ މައްސަލަ ފުލުހަށް ހުށަހަޅާފައިވާއިރު އެ އިދާރާއިން އަންނަނީ މައްސަލަ އިތުރަށް ތަހުގީގު ކުރަމުންނެވެ.