ބަންދުކޮށްފައިވާ ޝަންގްރިއްލާ ރިސޯޓުން ސަރުކާރަށް އޮތް ހިއްސާ ދޫކޮށްލައި މި އަހަރު ނިމުމުގެ ކުރިން އެ ރިސޯޓް ހުޅުވަން ސަރުކާރުން އަމާޒު ހިފައިފިއެވެ.
ސަރުކާރުގެ 30 ޕަސެންޓު ހިއްސާ އޮންނަ އައްޑޫ ޝަންގްރިއްލާ ރިސޯޓް މަރާމާތު ކުރުމަށް ބަންދު ކޮށްފައިވަނީ ކޮވިޑް ފެތެރެން ފެށިފަހުންނެވެ. އެ ރިސޯޓް ނުހުޅުވި އެތައް ދުވަހެއް ވެފައިވާއިރު އައްޑޫ ސިޓީގެ ރައްޔިތުން އަންނަނީ ކަންބޮޑުވުން ފާޅުކުރަމުންނެވެ.
އެ ކަންބޮޑުވުންތައް މިއަދު ރައްޔިތުންގެ މަޖިލީހަށް ގެންނެވީ އައްޑޫ މީދޫ ދާއިރާގެ މެންބަރު ރޮޒައިނާ އާދަމެވެ. ޑރ. ޢަބްދުﷲ މައުސޫމްއާ ސުވާލު ކުރެއްވީ ޝަންގްރިއްލާ ރިސޯޓް ނުހުޅުވި ލަސްވުމާއި ހުޅުވޭނެ ތާރީހެއް ހާމަކޮށްދިނުމަށް އެދިއެވެ.
ޖަވާބުގައި ޑރ. މައުސޫމް ވިދާޅުވީ, އެހެން ރިސޯޓްތަކާ ހިލާފަށް 284 އެނދުގެ އެ ރިސޯޓަކީ ސަރުކާރުގެ 30 ޕަސެންޓު ހިއްސާ އޮންނަ ރިސޯޓެއް ކަމަށާއި އެހެން ކަމުން ސަރުކާރުގެ ހިއްސާ އޮންނަ ރިސޯޓެއް ނުހުޅުވި ގިނަ ދުވަސްތަކެއް ވެގެން ދިޔުމުން ރައްޔިތުންގެ ސުވާލުތައް އިތުރުވި ކަމަށެވެ.
ރިސޯޓް ނުހުޅުވި ލަސްވާ ބައެއް ސަބަބުތައް މައުސޫމް ކިޔައިދެއްވިއެވެ.
"އައްޑޫ އިންވެސްޓްމެންޓް ޕްރައިވެޓް ލިމިޓެޑްއާ އެއްކޮށް ވެފައިވާ އެގްރީމެންޓްގެ ސަބަބުން ރިސޯޓަށް ގެއްލުންވާ ހާލަތުގައި ލޮސް ފައިނޭންސް ކުރުމަށް ދޭ ލޯނުގައި ސަރުކާރުން ބައިވެރިވާން ޖެހޭ. އެގޮތުން 68 މިލިއަން ޑޮލަރު މިހާރު ސަރުކާރުން ލޯން ފައިނޭންސްގެ ގޮތުގައި އެ ކުންފުންޏަށް ދައްކަން ޖެހިފައި އެބައޮތް," މައުސޫމް ވިދާޅުވިއެވެ.
ތިރީސް އިންސައްތަ ހިއްސާ އޮވެ ދައުލަތަށް ފައިސާ އެއް ނުލިބި އެހޭ ގިނަ ދުވަސްތަކެއް ފާއިތުވަމުންދާތީ ސަރުކާރުގެ ވިސްނުން އެހެން ގޮތަކަށް ބަދަލުކޮށްފައިވާކަން މައުސޫމް ފާހަގަކުރެއްވިއެވެ. އެ ވިސްނުމަކީ ސަރުކާރުގެ ހިއްސާ ދޫކޮށްލުމެވެ.
"ދައުލަތުން ވެސް ބޮޑަށް ބޭނުންވަނީ އެ ހިއްސާ އެ ބޭފުޅުންނަށް (އައްޑޫ އިންވެސްޓްމެންޓް ޕްރައިވެޓް ލިމިޓެޑް) ދޫކޮށްލާފައި މިކަމައިގެން ކުރިއަށް ދެވޭނެ ގޮތެއް ހޯދުން," މައުސޫމް ވިދާޅުވިއެވެ.
ޓުއަރިޒަމް ގާނުނަށް ގެނައި 10 ވަނަ އިސްލާހުގެ ސަބަބުން ހިއްސާ ދޫކޮށްލުމަށް މަގެއް ކޮށުނުކަން ފާހަގަކޮށް މައުސޫމް ވިދާޅުވީ, ސަރުކާރުގެ ޝެއާ ވިއްކާލެވެން ނުވަތަ ބަދަލު ކުރާ ނަމަ 80 މިލިއަން ރުފިޔާ ދައުލަތަށް ދައްކަން ޖެހޭ ކަމަށެވެ.
"އެ ފޯމިއުލާގެ ދަށުން އެ ރަށުގެ ސައިޒާ ބޮޑުކަމުން 80 މިލިއަން ވަރު އަރާ އެ ޝެއާ ބަދަލުކުރަން. އެހެންވީމަ އަޅުގަނޑުމެން އަނެއްކާ ޓުއަރިޒަމް ގާނޫނަށް ގެނެވޭ 11 ވަނަ އިސްލާހެއް ވާނެ މިހާރު ޑްރާފްޓްކޮށްފައި," މައުސޫމް ވިދާޅުވިއެވެ.
ޓުއަރިޒަމް ގާނޫނަށް ގެންނަން މަސައްކަތް ކުރާ އިސްލާހުގެ ސަބަބުން ސަރުކާރުގެ 30 ޕަސެންޓު ހިއްސާ ލުއި ގޮތަކަށް އައްޑޫ އިންވެސްޓްމެންޓް ޕްރައިވެޓް ލިމިޓެޑަށް ގަންނަން މަގުފަހިވެގެންދާނެ ކަމަށް އުންމީދު ކުރާ ކަމަށް މައުސޫމް ވިދާޅުވިއެވެ.
ފިނޭންސް މިނިސްޓްރީގެ އިތުރުން ޝަންގްރިއްލާ ރިސޯޓްގެ 70 ޕަސެންޓު ހިއްސާ ކުރާ އައްޑޫ އިންވެސްޓްމެންޓް ޕްރައިވެޓް ލިމިޓެޑާ ވާހަކަ ދައްކައިގެން އެ ރިސޯޓް ވީހާވެސް އަވަހަކަށް ހުޅުވަން މަސައްކަތް ކުރަމުން އަންނަ ކަން މައުސޫމް ފާހަގަކުރެއްވިއެވެ. އަދި އެކަމަށް އެކަށީގެންވާ ބައެއް މަރާމާތު ކުރަން ޖެހޭ ކަމަށް ވެސް ވިދާޅުވިއެވެ.
"އެހެންވީމަ ސީދާ ތާރީހެއް އަޅުގަނޑުމެންނަށް ދެންނެވެން ނެތް ކަމުގައި ވިޔަސް އަޅުގަނޑުމެން އުންމީދު މިކުރަނީ މިއީ ފަތުރުވެރިކަމުގެ ރަން އަހަރަށްވާތީ އައްޑޫ ސިޓީއަށް ވެސް ފަތުރުވެރިކަމުގެ ރަން އަހަރު އޭގެ ރަނގަޅު ގޮތުގައި އަންނަން ޖެހޭނެ ކަމަށް. އެގޮތުން އަޅުގަނޑުމެންގެ އުންމީދަކީ އައްޑޫ އިންވެސްޓްމެންޓް ޕްރައިވެޓް ލިމިޓެޑުން ޝަންގްރިއްލާ މިއަހަރު ނިމުމުގެ ކުރިން ހުޅުވުން," މިނިސްޓަރު ވިދާޅުވިއެވެ.