ސާނަވީ ތައުލީމު ނުވަތަ ގްރޭޑު 10 ނިމުމުން، ތައުލީމު ހާސިލުކުރުން ހުއްޓާނުލުމަށް ހުރިހާ ކިޔަވާ ކުދިންނަށް ރައީސް އިބްރާހިމް މުހައްމަދު ސޯލިހު އިލްތިމާސްކުރައްވައިފިއެވެ.
ރައީސް ސޯލިހު މިފަދައިން ވިދާޅުވީ 2019 ވަނަ އަހަރު ސާނަވީ އިމްތިހާނުން މަތީ ވަނަތައް ހާސިލްކުރުމަށް ބޭއްވި ޓޮޕް އެޗީވާސް އެވޯޑުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ރައީސް ވަނީ ކާމިޔާބީ ހޯދި ދަރިވަރުންނަށް މަރުހަބާ ދަންނަވައި، އެ ކުދިންގެ ބެލެނިވެރިންނާއި ޓީޗަރުން ކޮށްދެއްވި އަގު ވަޒަން ކުރައްވައިފައެވެ.
ރައީސް ވިދާޅުވީ ސާނަވީ އިމްތިހާނު ނިންމާ ދަރިވަރުންގެ ތެރެއިން، މަތީ ސާނަވީ އިމްތިހާނަށް ކުރިމަތިލާ ދަރިވަރުންގެ އަދަދު މަދު ވަމުން އަންނަ ކަމަށާއި އެއީ ކަންބޮޑުވާން ޖެހޭ ކަމެއް ކަމަށެވެ.
"މިދިޔަ ފަސް އަހަރަށް ބަލާއިރު ރާއްޖޭގައި ކޮންމެ އަހަރަކު ސާނަވީ އިމްތިހާނު މި ހަދަނީ އެވްރެޖުކޮށް ފަސް ހާސް ހަ ސަތޭކަ ދަރިވަރުން. އޭގެ ތެރެއިން މަތީ ސާނަވީއަށް މި ވަންނަނީ އެވްރެޖުކޮށް ދެ ހާސް ސާޅީސް ކުދިން، އާދެ، ސާނަވީ ހަދާ ކުދިންގެ ތެރެއިން ގާތްގަނޑަކަށް ތިރީސް ފަސް ޕަސެންޓު،" ރައީސް ވިދާޅުވިއެވެ.
ރައީސް ވިދާޅުވީ މަތީ ދަރިވަރުން މަތީ ސާނަވީ ތައުލީމު ނުހަދަނީ ކީއްވެތޯ އަދި އެ ކަމުގެ ސަބަބަކީ ކޮބައިތޯ ބަލަން ޖެހޭ ކަމަށް ދެކިވަޑައިގަންނަވާ ކަމަށެވެ. އަދި އެންމެ ކުއްޖަކު ވެސް ތައުލީމު ފުރިހަމަނުކޮށް ދޫކޮށްލުމަކީ ގައުމަށް ލިބޭނެ ދެރައެއްގެ ގޮތުގައި ރައީސް ވަނީ ސިފަކުރައްވައިފައެވެ.
"ގްރޭޑު ދިހައެއް ނިމުނީމާ ކިޔަވާ ނިމުނީކަމަށް ގަބޫލުކުރެވޭނަމަ އެ ވިސްނުން އަވަހަށް ސިކުނޑިން ފޮހެލުމަށް އަޅުގަނޑު އިލްތިމާސްކުރަން، އެފަދަ ކަތި ފިޔަވަޅަކުން ގެއްލިގެންދާނީ އެ ކުއްޖެއްގެ މުސްތަގްބަލު އެކަންޏެއް ނޫން، އެއީ މުޅި ގައުމަށް ލިބޭ ގެއްލުމެއް، އެންމެ ކުއްޖަކު ވެސް ތައުލީމީ ހަޔާތް ފުރިހަމަ ނުކޮށް ދޫކޮށްލުމަކީ ގައުމަށް ގެއްލޭނެ ވަރަށް އަގުބޮޑު ރައުސްމާލެއް،" ރައީސް ސޯލިހު ވިދާޅުވިއެވެ.
މިއީ ގައުމު ބިނާކޮށް، ގައުމު ކުރިއެރުވުމަށް އެޅޭ ހުރަހެއްގެ ގޮތުގައި ސިފަކުރައްވަމުން ރައީސް އިތުރަށް ވިދާޅުވީ ގައުމަކީ އޭގެ ޒާތުގައި އަމިއްލައަށް ކުރިއަރާދާ ތަނެއް ނޫން ކަމަށެވެ. އަދި ގައުމު ތަރައްގީ ވާނީ ގައުމުގައި އުޅޭ މީހުން ތަރައްގީވެގެން ކަމަށް ރައީސް ވިދާޅުވިއެވެ.
"ގައުމު ތަރައްގީވަނީ ގައުމުގަ އުޅޭ މީހުން ތަރައްގީވެގެން، ގައުމު ކުރިއަރަނީ ތިމާ ހުރި ހާލަތުން އެހެން އެއަށް ވުރެ ރަނގަޅު ހާލަތަކަށް ބަދަލުވުމުގެ ވިސްނުން ގައުމުގެ ދަރީންގެ ސިކުނޑީގައި އުފެދި، އެ އަޒުމުގައި އެ ކަމަށް މަސައްކަތް ކޮށްގެން،" ރައީސް ވިދާޅުވިއެވެ.
މީގެ އިތުރުން ރައީސް ވަނީ ކޮވިޑް-19ގެ ބަލިމަޑުކަމުގެ ތެރޭގައި ކިޔަވާ ކުދިންނާއި މުދައްރިސުން ވީ ގުރުބާނީގެ އަގު ވަޒަން ކުރައްވައިފައެވެ.