ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދީނީ ގޮތުން ހަރުކަށި ފިކުރުގެ މީހުން ހަމަލާ ދިނުމަށް އެތައް ފަހަރަކު ރާވަމުން ދިޔަކަން, ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ކުރިއަށް ގެންދިޔަ އިންކުއަރީގެ ރިޕޯޓުގައި ބުނެފިއެވެ. އެ ރިޕޯޓުގައި ބުނެފައިވާ ގޮތުން އެމަނިކުފާނާ ފިކުރީ ގޮތުން ހިޔާލު ތަފާތު މީހުންނާއި ދީނީ ހަރުކަށި ފިކުރުގެ މީހުން ދިޔައީ އެކި ފަހަރު މަތިން އެމަނިކުފާނަށް ނުރައްކާ ކުރަމުންނެވެ.
އެ ކޮމިޓީން އިކުއަރީއެއް ހެދީ 6 މޭ 2021 ވަނަ ދުވަހުގެ ރޭ ރައީސް މުހައްމަދު ނަޝީދު ދިރިއުޅުއްވާ ގ. ކެނެރީގެއިން ނުކުމެވަޑައިގެން ކާރުކޮޅަށް އަރާވަޑައިގަންނަވަން ހިންގަވާފައި ވަޑައިގަންނަވަނިކޮށް އެމަނިކުފާނަށް އަމާޒުކޮށް މާލޭގައި ބޮމުގެ ހަމަލާއެއް ދިނުމާ ގުޅިގެން, އެމަނިކުފާނުގެ ސެކިއުރިޓީ ބްރީޗްވި ގޮތް ހޯދުމަށެވެ.
ރައޔްިތުންގެ މަޖިލީހުން އިއްޔެ އާންމުކުރި އެ އިންކުއަރީ ރިޕޯޓުގައި ރައީސް ނަޝީދުގެ ތުރެޓް ޕްރޮފައިލާއި އެމަނިކުފާނަށް ރައްކާތެރިކަން ފޯރުކޮށްދިނުމުގެ ޒިންމާ އުފުލާ އިދާރާތަކާއި ރާއްޖޭގައި އިންޓެލުޖެންސް މައުލޫމާތު އެއްކޮށް ގެންގުޅޭ އިދާރާތަކާއި އެތަންތަނުގެ މަސްއޫލިއްޔަތުތަކާއި އެ މަސްއޫލިއްޔަތުތައް އަދާކޮށްފައިވާ މިންވަރު ބަލާފައިވެއެވެ.
އިންކުއަރީއަށް ރިޕޯޓުގައި ބުނެފައިވާ ގޮތުން ރައީސް ނަޝީދަކީ ސިޔާސީ ހަޔާތްޕުޅު ފެއްޓެވި ހިސާބުން ސިޔާސީ ތުރެޓު ލިބިވަޑައިގަންނަވަމުން ގެންދެވި ބޭފުޅެކެވެ. އަދި އެމަނިކުފާނަކީ ގައުމުގެ އެކި މައްސަލަތަކާ ގުޅޭގޮތުން ފާޅުގައި ވާހަކަދައްކަވާ ބޭފުޅެއް ކަމަށާއި އެމަނިކުފާނަކީ ހަރުކަށި ފިކުރާ ދެކޮޅަށް ފާޅުގައި ބަސް ވިދާޅުވެ އެ ފިކުރާ ދެކޮޅަށް މަސައްކަތްކުރައްވާ ބޭފުޅެއްކަން ފާހަގަކޮށްފައިވެއެވެ.
"ހައްދުފަހަނައެޅުމާއި ހަރުކަށި ފިކުރާދެކޮޅާށް ރައީސް މުހައްމަދު ނަޝީދު ވަކާލާތުކުރައްވަމުްނ ގެންދަވާތީ, އެ ފިކުރަށް ތާއީދުކުރާ ފަރާތްތަކުން ރައީސް މުހައްމަދު ނަޝީދަކީ ލާދީނީ މީހެއްގެ ގޮތުގައާއި އިސްލާމްދީނުގެ އަދުއްވެއްގެ ގޮތުގައި ސިފަކޮށްފައިވެއެވެ. އަދި އެމީހުން ރައީސް މުހައްމަދު ނަޝީދަކީ މަރާލަންޖެހޭ މީހެއްގެ ގޮތުގައި އެކި ގޮތްގޮތުން ހާމަކުރަމުން ދެއެވެ," ކޮމިޓީގެ އިންކުއަރީގައި ބުނެފައިވެއެވެ.
އަދި އެކި ޓީވީ ޗެނަލްތަކާއި ނޫސް މަޖައްލާތަކުގެ އިތުރުން ސޯޝަލް މީޑިއާގައިވެސް ރައީށް ނަޝީދާ މެދު ނަފްރަތު އުފެއްދުމުގެ އަމަލުތައް ކެނޑިނޭޅި ހިނގަމުން ދާކަމަށްވެސް އެ ރިޕޯޓުގައި ބުނެފައިވެއެވެ.
ހަރުކަށި ފިކުރުގެ އެތައް އިންޒާރެއް
ރިޕޯޓުގައި ފާހަގަކޮށްފައިވާ ގޮތުގައި 2019 ވަނަ އަހަރުގެ މަޖިލިސް އިންތިހާބުގެ ކެމްޕޭނު ދަތުރެއްގައި ރައީސް ނަޝީދު ގދ. މަޑަވެއްޔަށް ވަޑައިގެން އުޅުއްވަމުން ގެންދަވަނިކޮށް ހަރުކަށި ފިކުރުގެ ބަޔަކު އެމަނިކުފާނަށް ހަމަލާދޭން އުޅޭކަމުގެ މައުލޫމާތު ލިބިގެން އެމީހުން ހައްޔަރުކުރިކަމަށް އިންކުއަރީއަށް އެނގިފައިވާކަމަށް ރިޕޯޓުގައި ވެއެވެ.
މީގެ އިތުރުން 2019 ވަނަ އަހަރުގެ ސެޕްޓެމްބަރު މަހު ދިވެހިރާއްޖޭގެ ސުޕްރީމް ކޯޓަށް އަންހެން ފަނޑިޔާރުން އައްޔަނުކޮށްފައިވާ އިރު, އަންހެން ފަނޑިޔާރުން އައްޔަނުކުރުމަކީ އިސްލާމްދީނާ ހިލާފު ކަމެއްކަމަށާއި އެފަދައިން އަންހެން ފަނޑިޔާރުން އައްޔަނުކުރުމަށް ވޯޓުދޭ މީހުންނަކީ ކާފަރުންކަމަށް އެހަރުކަށި ފިކުރުގެ މީހުންދެކޭކަމަށް ރިޕޯޓުގައި ފާހަގަކޮށްފައިވެއެވެ.
ސުޕްރީމްކޯޓަށް ފަނޑިޔާރުން އައްޔަނުކުރަނީ ރައްޔިތުންގެ މަޖިލީހުގެ ރުހުން ހޯދައިގެން ކަމުން, ސުޕްރީމްކޯޓާށް އަންހެން ދެ ފަނޑިޔާރަކު އައްޔަނުކުރުމަށް 3 ސެޕްޓެމްބަރު 2019 ވަނަ ދުވަހު މަޖިލީހުން ރުހުން ދީފައިވާ އިރު, "އެ ނިންމުމާ އެއްކޮޅާށް ވޯޓުދޭ މަޖިލީހުގެ މެމްބަރުންތަކެއް މަރާލާނެކަމަށާއި ރައީސް މުހައްމަދު ނަޝީދަކީ ފުރަތަމަ ޓާގެޓުކަމަށް" އެމްއެންޑީއެފްގެ ޑިފެންސް އިންޓެލް ސާވިސް (ޑީއައިއެސް)އަށް މައުލޫމާތު ލިބުނުކަމަށް އިންކުއަރީ ރިޕޯޓުގައި ބުނެފައިވެއެވެ.
މި ދެ ހާދިސާއާ ގުޅިގެންވެސް އެމަނިކުފާނުގެ ތުރެޓު ލެވެލް "ސަބްސްޓެންޝަލް"އަށް ބަދަލުކުރިކަމަށް އިންކުއަރީ ރިޕޯޓުގައި ބުނެފައިވެއެވެ.
މީގެ އިތުރުންވެސް ސެޕްޓެމްބަރު 2019 ގައި ކޮށްފައިވާ ޓްވީޓަކާއި, އޮކްޓޫބަރު 2019 ގައި ފޭސްބުކްގައި އަޕްލޯޑުކޮށްފައިވާ ފޮޓޮއަކާ ގުޅިގެން ރައީސް ނަޝީދުގެ ތުރެޓު އެސެސްކުރިއެވެ. އަދި ޖުލައި 2020 ގައި އަޕްލޯޑުކޮށްފައިވާ ވީޑިއޯއެއްގައި ހަރުކަށި ފިކުރަށް ހިތްވަރުދީ, އެ ފިކުރުގެ މީހުން ޓާކެޓު ސިލެކްޓުކުރުމުގައި ރައްޔިތުންގެ މަޖޮލީހާއި އެ މަޖިލީހުގެ މެމްބަރުންނަށް އަމާޒުކުރުމަށް ހިތްވަރުދޭ މޭރުމަކުން ވާހަކަ ގެނެސްފައިވާކަމަށް އިންކުއަރީ ރިޕޯޓުގައި ބުނެފައިވެއެވެ. މި ވީޑިއޯގެ އެސެސްކޮށް ރައީސް ނަޝީދުގެ ތުރެޓް ލެވެލް "ސިވިއާ"އަށް ބަދަލުކޮށްފައިވެއެވެ.
އަދި ޑިސެމްބަރު 2020 ގައި ރާއްޖޭގެ ހައި ލެވެލް ބޭފުޅުންނަށް ހަމަލާއެއް ދޭން ރާވާކަމަށާއި ރައީސް ނަޝީދާއި ރައްޔިތުންގެ މަޖިލީހުގެ އިދާރާއަށް ޓާގެޓުކޮށްފައިވާކަމުގެ މައުލޫމާތު ލިބިގެން އެ މައުލޫމާތު އެސެސްކޮށްފައިވާކަމަށާއި ނަމަވެސް އިމިނެންޓް ތުރެޓެއްގެ ގޮތުގައި ނުބެލެވޭތީ ރައީސް ނަޝީދުގެ ތުރެޓު ލެވެލް "ސިވިއާ"ގައި ދަމަހައްޓާފައިވާކަމަށް އިންކުއަރީއަށް އެނގިފައިވާކަމަށް ރިޕޯޓުގައި ވެއެވެ.
މިއަހަރު ތެރޭގައި ދެ އިންޒާރެއް
ރިޕޯޓުގައި ބުނެފައިވާ ގޮތުގައި މި އަހަރުގެ ޖެނުއަރީ މަހުގެ ތެރޭގައި މަޖިލީހުގެ މެމްބަރުންނާއި މަޖިލީހުގެ އިދާރާއަށް އަމާޒުކޮށް, ހަރުކަށި ފިކުރު ގަބޫލުކުރާ ބަޔަކު ޓެރަރިޒަމްގެ އަމަލެއް ހިންގުމުގެ ވިސްނުން ގެންގުޅޭކަމުުގެ މައްޗަށް ބަލައި, ފުލުހުންގެ އިންޓެލިޖެންސް ކޮމާންޑަށް މައުލޫމާތު ލިބުނެވެ. އެ މައުލޫމާތު އެމްއެންޑީއެފަށް ހިއްސާކުރިކަމަށް ފުލުހުން ބުނިކަމަށް ރިޕޯޓުގައި ބުނެއެވެ. ނަމަވެސް އެ މައުލޫމާތު އެމްއެންޑީއެފަށް ނުލިބޭކަމަށް އެފަރާތުން ބުނެއެވެ.
މީގެ އިތުރުން "މަރާލަން ބޭނުންވާ މީހުންކަމަށް ބުނެ" މި އަހަރުގެ ފެބްރުއަރީ މަހުގެ ތެރޭގައި ފޭސްބުކް އެކައުންޓަކުން ލިސްޓެއް އާންމުކުރި ކަމަށާއި އެ ލިސްޓުގައި ރައީސް ނަޝީދުގެ ނަން ހިމެނިފައި އޮތްކަމަށް އިންކުއަރީން ބުނެފައިވެއެވެ.
"މި ފަރާތްތައް މަރާލަން ބޭނުންވާ ސަބަބެއް ކަމަށް ބުނެފައިވަނީ މާތްالله އަށާއި ރަސޫލާއަށްޓަކައެވެ," ރިޕޯޓުގައި ވެއެވެ.
ރިޕޯޓުގައި ބުނެފައިވާ ގޮތުން, ޑިފެންސް އިންޓެލިޖެންސުން ގަބޫލުކުރަނީ މި އިންޒާރު ދިނުމުގެ ސަބަބަކީ ރައްޔިތުންގެ މަޖިލީހަށް ހުށަހެޅި މިއުޒަކާ ގުޅޭ ގަރާރެވެ. މި އިންޒާރު ބެލުމަށްފަހު ރައީސް ނަޝީދުގެ ތުރެޓް ލެވެލް "ކްރިޓިކަލް"އަށް ބަދަލުކުރެވުނުކަމަށް އިންކުއަރީ ރިޕޯޓުގައި ބުނެފައިވެއެވެ.
އިންކުއަރީ ރިޕޯޓުގައި ބުނެފައިވަނީ ރައީސް ނަޝީދަކީ އެކި ފަރާތްތަކުން ނުރައްކާތައް އަމާޒުވެފައިވާ ފަރާތަކަށް ވާ އިރު, "[އެމަނިކުފާނަކީ] މުޖުތަމައު ތެރޭގައި ވަރަށް ހަރަކާތްތެރިކޮށް އުޅުއްވާ ބޭފުޅަކަށް ވުމުން އެމަނިކުފާނަށް އޮންނަ ނުރައްކާ އިތުރަށް ބޮޑުވާކަންވެސް [އިންކުއަރީއަށް މައުލޫމާތު ދެއްވި] އެބޭފުޅުން ފާހަގަކުރައްވާ" ކަމަށެވެ.