ލޯކަލް ކައުންސިލް އިންތިހާބުގައި، މާލެ ސިޓީ ކައުންސިލްގެ ހުޅުމާލޭ ދާއިރާއަށް ވާދަކުރެއްވި ރިޒްނާ ޒަރީރުގެ ކެމްޕޭން ޖަގަހަ ހުޅުވި ވަގުތުވެސް، ކުރީގެ ރައީސް މުހައްމަދު ނަޝީދަށް ބަޔަކު ފާރަލާފައިވާ ކަމަށް އިންކުއަރީ ރިޕޯޓުން ހާމަވެއްޖެ އެވެ.
އެ ރިޕޯޓްގައި ވާގޮތުން، މޭ 6 ގެ ހަމަލާގެ ކުރިން ވެސް ބަޔަކު ދިޔައީ ނަޝީދަށް ފާރަ ލަމުންނެވެ. އެގޮތުން ޖަގަހަ ހުޅުވި ދުވަހު ވެސް ބަޔަކު ވަނީ ރައީސް ނަޝީދުގެ ފޮޓޯއާއި ވީޑިއޯ ނަގައި، އެ މަނިކުފާނުގެ ހަރަކާތްތަކަށް ބަލާފައެވެ.
މީގެ އިތުރުން، ނަޝީދަށް ހަމަލަދިން ކަމަށް ތުހުމަތު ކުރެވޭ މީހުން، ހަމަލާ ދިން ދުވަހުގެ ކުރިންވެސް އެއް ފަހަރަށް ވުރެ ގިނަ ފަހަރު ނީލޯފަރު ހިނގުމުގައި ހަރަކާތްތެރި ވެފައިވާ ކަމަށް ވެސް އެ ރިޕޯޓުގައިވެ އެވެ.
އަދި ނަޝީދު އަވަހާރަ ކޮއްލުމަށް ބަޔަކު ރާވަމުންދާ ކަމުގެ މައުލޫމާތު، މޭ ހަ ވަނަ ދުވަހުގެ ރޭ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ވަނީ ޑިފެންސް މިނިސްޓަރު މާރިޔާ އަހުމަދު ދީދީއަށް ދެއްވާފައި ކަން އެ ރިޕޯޓުން އެނގެއެވެ.
ހަަމަލާ ދިނުމުގެ ކުރިން ކަން ހިނގާފައިވާ ގޮތް ކަމަށް އެ ރިޕޯޓްގައި ފާހަގަ ކޮށްފައި ވަނީ، އެ ހަމަލާއަށް ތިން މިލިއަން ޑޮލަރު ގެ އަގެއް ހުށަހަޅާފައި ވާ ކަމުގެ މައުލޫމާތާއި އެޑްވާންސްކޮށް އެ އަގުގެ 50 ޕަސެންޓް ދިނުމަށް މަޝްވަރާ ކުރަމުން ދާ ކަމަށް އިލްޔާސް އަށް ލިބުނު މައުލޫމާތު، މިނިސްޓަރު މާރިޔާއާ ހިއްސާ ކުރައްވާފައިވާ ވާ ކަމަށެވެ.
ރައީސް ނަޝީދަށް އަމާޒުކޮށް ދިން ބޮމުގެ ހަމަލާގައި އަމަލީގޮތުން ބައިވެރިވި މީހުން ވަނީ ހައްޔަރުކޮށްފައެވެ. ނަމަވެސް އެކަމަށް ފަންޑުކުރި މީހުން ހޯދުމަށް ކުރާ މަސައްކަތާ މެދު ރައީސް ނަޝީދު ވަނީ ހިތްހަމަނުޖެހުން ފާޅުކުރައްވާފައެވެ.