ޖެނީވާ (ޖުލައި 4): ކޮވިޑް-19ގެ އެންމެ ނުރައްކާތެރި ވޭރިއަންޓް ކަމަށްވާ ޑެލްޓާ ވޭރިއަންޓު ދުނިޔޭގެ 100 ވަރަކަށް ގައުމުގައި މިހާރު އުޅޭކަމަށާ މި ވޭރިއަންޓުން އެންމެބޮޑު ގެއްލުމެއް ލިބެމުންދަނީ އޭޝިއާގެ ގައުމުތަކަށްކަމަށް ދުނިޔޭގެ ސިއްހަތާބެހޭ ޖަމިއްޔާއިން ހާމަކޮށްފިއެވެ.
ޑަބްލިއުއެޗްއޯއިން ނެރުނު ރިޕޯޓެއްގައި ބުނި ގޮތުން އިންޑޮނީޝިއާ، މެލޭޝިއާ، އޮސްޓްރޭލިއާ، ބަންގްލަދޭޝް، ނޭޕަލް އަދި ޖަޕާނާއި ދެކުނު ކޮރެއާފަދަ ގައުމުތަކުގައި ކޮވިޑްގެ ނުރައްކާ ބޮޑުވެގެން ދިޔައީ ޑެލްޓާ ވޭރިއަންޓް ފެތުރުމުގެ ސަބަބުންނެވެ. އަދި ހާއްސަކޮށް ދުނިޔޭގެ އެންމެ އާބާދީ ބޮޑު އެއް ގައުމު ކަމުގައިވާ އިންޑޮނޭޝިއާ ވަނީ ޑެލްޓާ ވޭރިއަންޓުގެ ސަބަބުން ބޮޑު ބިރުވެރިކަމެއްގެ ތެރޭގައެވެ.
އިންޑޮނޭޝިއާގައި ދުވާލެއްގެ މައްޗަށް 26,000-29,000 އާ ދެމެދުގެ އަދަދަކަށް މީހުން ކޮވިޑްއަށް ޕޮޒިޓިވް ވާއިރު 300 އާ ގާތްކުރާ އަދަދަށް މީހުން މަރުވެއެވެ. އެގައުމުގެ ހެލްތު މިނިސްޓްރީން ބުނާ ގޮތުން އެގައުމުގައި އާދަޔާ ހިލާފަށް ކޮވިޑް19 ފެތުރެން ފެށީ ޑެލްޓާ ވޭރިއަންޓް ފެނުނު ދުވަސްވަރާއި ފިތުރު އީދު ދުވަސްވަރާ ދިމާވުމުންނެވެ. އެގޮތުން ގިނަ ބަޔަކު އެއްތަނަކަށް ޖަމާވެ ގައިދުރުކަމަށް ސަމާލުކަން ނުދީ އެކި ހަރަކާތްތަކުގައި ގައިގޯޅިވެ އުޅުނުކަމަށް އެ ގައުމުން ބުންޏެވެ.
އިންޑޮނޭޝިއާގައި ކޮވިޑް ޖެހިގެން މަރުވާ މީހުން ގެ އަދަދު ގިނަކަމުން އެމީހުން ކަފުންކޮށް ވަޅުލުމަށް ބޭނުންވާ ސަންދޯއް ލިބުން ދަތިވެ، ބައެއް މީހުން ވަޅުނުލެވި އެތައް ގަޑިއިރަކު ބައިތިއްބަން ޖެހޭހިސާބަށް ވަނީ ކަންކަން ގޮސްފައެވެ. އިންޑިއާއިން ފެތުރެން ފެށި ކޮވިޑް19ގެ ޑެލްޓާ ވޭރިއަންޓަކީ ވަރަށް ހަލުއިކޮށް ފެތުރޭ އެއްޗެކެވެ. އަދި އެއީ ބާރުގަދަކަމުން މަރުވާ އަދަދުވެސް ގިނަ ވޭރިއަންޓެކެވެ.
އޮލިމްޕިކްސް ކުޅިވަރުތައް ބޭއްވުމަށް ޖަޕާން ތައްޔާރުވަމުންދާއިރު ޖަޕާނުގައިވެސް ޑެލްޓާ ވޭރިއަންޓު ވަނީ ވަރަށް ބޮޑަށް ވަކި ހިއްޕާލާފައެވެ. ޖަޕާނުގެ ސިއްހަތާބެހޭ މަސްއޫލުވެރިން ވިދާޅުވާގޮތުގައި ޓޯކިޔޯއާއި އެ ގައުމުގެ އިރުމަތީގެ ޕްރޮވިންސްތަކުގައި ކޮވިޑް ޖެހޭ މީހުންގެ ތެރޭގައި ގިނައީ ޑެލްޓާ ވޭރިއަންޓް ޖެހިފައިވާ މީހުންނެވެ. މިއާއެކު ޓޯކިޔޯއާއި އެހެން ތިން ޕްރެފެކްޗާއެއްގައި ގިނަ ވަގުތުތަކަކަށް ކާފިއު ވަނީ އިއުލާންކޮށްފައެވެ.
ޑެލްޓާ ވޭރިއަންޓްގެ ސަބަބުން އޮސްޓްރޭލިޔާއާއި ދެކުނު ކޮރެއާގައިވެސް ރެކޯޑު އަދަދަކަށް ކޮވިޑްޖެހޭ މީހުން ވަނީ އިތުރުވެފައެވެ. ނަމަވެސް މިދިޔަ ޑިސެމްބަރު މަހު ޑެލްޓާ ވޭރިއަންޓް ފުރަތަމަ ފެނުނު ގައުމު ކަމަށްވާ އިންޑިއާގައި މިހާރުވަނީ ކޮވިޑް ކޮންމެވެސް ވަރަކަށް ކޮންޓްރޯލްވާން ފަށާފައެވެ.
އިންޑިއާގެ ރިޕޯޓްތައް ބުނާގޮތުން އެގައުމުގައި މިހާރު ދުވާލެއްގެ މައްޗަށް ކޮވިޑަށް ޕޮޒިޓިވް ވަނީ 46,000-50,000 އާ ދެމެދުގެ އަދަދެއްގެ މީހުންނެވެ. މީގެ ތިން މަސް ކުރިން އިންޑިއާގައި ދުވާލެއްގެ މައްޗަށް 400,000 އާށްވުރެ ގިނަ މީހުން ކޮވިޑަށް ޕޮޒިޓިވްވަމުން ގޮސްފައިވެއެވެ.