މާލެއާއި ތިލަފުށި ގުޅާލާ ބްރިޖުގެ މަސައްކަތް ފެށުން ލަސްވަނީ ކޮވިޑްގެ ސަބަބުން، ކަމަށާއި ދެ ހަފްތާ ތެރޭ މަސައްކަތް ފެށޭނެ ކަމަށް އިކޮނިމިކް މިނިސްޓަރ ފައްޔާޒް އިސްމާއީލް ވިދާޅުވެއްޖެ އެވެ.
މިނިސްޓަރ ފައްޔާޒް "ސަން"އަށް ވިދާޅުވީ، މާލެ-ތިލަފުށި ބްރިޖުގެ މަޝްރޫއު ހިންގާނެ ކޮންޓްރެކްޓަރު ހޮވައި, އިންޑިއާ އެގްޒިމް ބޭންކުގެ އެޕްރޫވަލް ލިބިފައިވާ ކަމަށެވެެ. އަދި ކުރިއަށްއޮތް ހަފްތާއެއް ނުވަތަ ދެ ހަފްތާ ތެރޭގައި ކޮންޓްރެކްޓުގައި ސޮއިކުރެވޭނެކަމަށް ލަފާކުރެވޭ ކަމަށް މިނިސްޓަރު ފައްޔާޒު ވިދާޅުވިއެވެ.
"ކޮންޓްރެކްޓުގައި ސޮއިކުރުމާއެކު އަމަލީ މަސައްކަތް ފެށޭނެ. އަމަލީ މަސައްކަތޭ މި ދެންނެވީ އޭގެ މޮބިލައިޒޭޝަން އަށް ބޭނުންވާ ކަންކަމާ، ޑިޒައިނިންގް އާ ކޯޓާޔާ. ތަނބު ޖަހަން ފަށާނެ ދުވަހެއް ނޭނގެ ދަންނަވާކަށް" ފައްޔާޒް ވިދާޅުވިއެވެ.
ކޮވިޑްގެ ހާލަތުގައި ކޮންމެވެސް ލަސްތަކެއް ހުރި ނަމަވެސް ޝެޑިއުލްއަށް ވުރެ މާ ލަސް ނުވާކަމަށް ފައްޔާޒް ވިދާޅުވިއެވެ.
"އެއީ ވެސް ވަރަށް ދިގު ޕްރޮސެސްއެއް އޮންނަ ކަމެއް. އެގްޒިމް ބޭންކުން ޑޮކިއުމަންޓްސް ތައްޔާރުކޮށް، ޑޮކިއުމަންޓްސް ވެރިފައިކޮށް އޭގެ އެޕްރޫވަލްސް ހޯދާ، އެ ހުރިހާ ކަމެއް ނިމިގެން ޓެންޑާ މި ކުރަނީ،" ފައްޔާޒް ފާހަގަކުރެއްވިއެވެ.
ފައްޔާޒް ވިދާޅުވި ގޮތުގައި ޓެންޑާ ކުރާއިރު އަންދާޒާ ކުރާ މުއްދަތަށް ވުރެ ގިނަ ދުވަސް ވާނެ ކަމަށާއި، ސަބަބަކީ ބިުކުރާ ފަރާތްތަކުން އަބަދުވެސް އިތުރު ވަގުތު ދޭން އެދޭތީ ކަމަށް ފައްޔާޒް ފާހަގަ ކުރެއްވިއެވެ.
އަދި އެފަދަ ބޮޑެތި މަޝްރޫޢުތަކުގައި އިތުރަށް ވަގުތުކޮޅެއް ދޭނެ ކަމަށާއި މި މަސައްކަތުގައި ވެސް އެފަދަ ގޮތަކަށް ދުވަސްކޮޅެއް ދީފައި ވާނެ ކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ ޓެންޑާ ކުރެވިގެން އިވެލުއޭޝަންގެ މަސައްކަތް ވަރަށް ބާރު ސްޕީޑެއްގައި ދިޔަ ކަމަށެވެ.
މީގެ އިތުރުން، ފައިނޭންޝަލް އިވެލުއޭޝަން ނިމިގެން، ޓެންޑަރ ބޯޑުން ނިންމާފައި އެގްޒިމް ބޭންކަށް ފޮނުވިތާ ހަފްތާއަކަށް ވުރެ ގިނަ ދުވަހެއް ނުވާނެ ކަމަށް ފައްޔާޒް ފާހަގަކުރެއްވިއެވެ.
"މަސައްކަތް ކުރުމުގައި ކުޑަވަރެއްގެ ޑިލޭއެއް އަހިސްދާނެ. އެއީ ސައުތު އޭޝިޔާއިން މީހުން [ރާއްޖެ] އައުން މަނާކޮށްފައި މިއޮތީ ކޮވިޑާ ގުޅިގެން. އެކަހަލަ ކަންކަން އަންނާނެކަމަށް ލަފާކުރެވޭ ކޮވިޑާ ހެދި. ލޮކްޑައުންއާ އެއްޗެހި އައުމާ، ދަތުރުފަތުރާ އެކަލަ ކަންތައްތަކުގައި، 2019 ގައި ވިސްނި ފާސްޓް މިނުގައި ނުގޮސްދާނެ. މިކަހަލަ ކަންތައްތައް ހުންނާނެކަމަށް ލަފާކުރަނީ,"
މީގެ އިތުރުން ބޭރު ގައުމުތަކުން މުދާ ގެނައުމުގައިވެސް އުނދަގޫތަކެއް އުޅޭކަމަށްވިޔަސް، އަނެއްހެން ބޮޑު ލަސްވުމެއް އުޅޭކަމަށް އަންދާޒާ ނުކުރެވޭކަމަށް ފައްޔާޒް ވިދާޅުވިއެވެ.
އޭގެ މެއިން ކޮންޕޯނެންޓްސް ތަކެއް 2023 ގައި ނިމޭނެކަމަށް އަންދާޒާ ކުރެއެވެ.
"އަޅުގަނޑުމެންގެ ވިސްނުން މިހިރީ، ގުޅީފަޅުގައި ޕޯޓާއެކު އިތުރަށް ޑިވެލޮޕް ކުރާ ބިމުގައި އިންޑަސްޓްރިއަލް ކޮމާޝަލްގައި ގޯޑައުން ފެސިލިޓީތަކެއް އަންނާނެ ވަރަށް ބޮޑަށް. އެހެންކަމުން އަޅުގަނޑުމެން މި އެކްސްޕެކްޓް ކުރަނީ މާލޭގައި ގޯޑައުންއަށް ސްޕެންޑް ކުރާ ވަރަށްވުރެ އެތަނުން ޖާގަ ދޭނަމޭ ވިޔަފާރިތަކަށް،"
މީގެ އިތުރުން ކުލީގެ އަގު މާލޭގައި ބޮޑު ކަމަށާއި މާލޭގެ ހުރި ގުދަންތަކަކީ މީހުން ވަރަށް ބޮޑު ކުއްޔަކަށް ނަގައިގެން އުޅޭ ތަންތަނެވެ. އެހެންކަމުން ގުޅީފަޅުގައި ޕޯޓްއާއެކު އިތުރަށް ތަރައްޤީކުރާ ބިމުގައި ވަރަށް ބޮދަށް ގުދަންތައް އެޅުމަށް ބައެއް ޚާއްސަކުރެވޭނެކަމަށް ފައްޔާޒް ވިދާޅުވިއެވެ.
މާލެއާއި ތިލަފުށި ގުޅާލާ ބްރިޖުގެ އަމަލީ މަސައްކަތް، މި ހިނގާ ޖޫން މަސް ނިމުމުގެ ކުރިން ފެށުމަށް ވަކި ބަޔަކާ ހަވާލު ކުރެވޭނެ ކަމަށް ރައީސުލް ޖުމްހޫރިއްޔާ އިބްރާހިމް މުޙައްމަދު ސޯލިހު މީގެ ކުރިން ވިދާޅުވެފައި ވެއެވެ.