މިއަހަރުގެ ރަމަޟާން މަހަށް ހަނދު ބެލުން އަންނަ އާދިއްތަ ދުވަހު ކުރިއަށް ގެންދަން ނިންމާފައިވާއިރު، އެ ރޭ ހަނދު ސާބިތުވެއްޖެނަމަ ބަޑިޖެހުމުގެ ރަސްމިއްޔާތު ޖުމްހޫރީ މައިދާނުގައި ކުރިއަށް ދާނެ ކަމަށް އެމްއެންޑީއެފް އިން ބުނެފި އެވެ.
އެމްއެންޑީއެފް އިން ބުނީ ހަނދު ސާބިތުކުރުމަށް ބާއްވާ ޖަލްސާގައި، ހަނދު ސާބިތުވެއްޖެ ކަމަށް ނިންމައިފި ނަމަ ބަޑިޖެހުމުގެ ރަސްމިއްޔާތު ޖުމްހޫރީ މައިދާނުގައި އޮންނާނެ ކަމަށެވެ.
މި ހިނގާ 1442 ވަނަ އަހަރުގެ ޝައުބާން މަހުގެ 29 ވަނަ ދުވަހަކީ 2021 އޭޕްރިލް 11 ވާ އާދީއްތަ ދުވަހެވެ.
ހިޖުރީ ކަލަންޑަރުގައި ގުނާ ހަނދުމަހެއްގެ ދިގުމިނަކީ 29 ނުވަތަ 30 ދުވަހެވެ. ކުރިއަށް އޮތް ހަނދުމަހަށް ހަނދު ބަލާނީ ހިނގަމުންދާ މަހުގެ 29 ވަނަ ދުވަހު އެވެ. ހިޖުރީ މަހެއް ނިމި، އާ މަހަށް ހަނދު (ނިއު މޫން) އުފެދުމުން ބަލާނީ ހިލާލް ހަނދެއް (ކްރެސެންޓް މޫން)އެއް ފެނޭތޯއެވެ. އެ ދުވަހު ހަނދު ނުފެނިއްޖެ ނަމަ އާ މަސް ގުނަން ފަށާނީ ހިނގަމުންދާ މަހުގެ 30 ދުވަސް ހަމަކުރުމަށްފަހު އެވެ.
ރާއްޖޭގައި ހަނދު ސާބިތުކުރުމަށް އަމަލުކުރަމުން ގެންދާ އުސޫލަކީ ރާއްޖޭގެ އެއްވެސް ހިސާބަކަށް ހަނދު ނުފެނިއްޖެނަމަ، ފަލަކީ ހިސާބުތަކަށް ބެލުމާއި، އިސްލާމީ އެހެން ގައުމުތަކުން ކުރެ ގައުމަކަށް ހަނދު ފެނިއްޖެކަމުގެ މައުލޫމާތު ބަލައި ހޯދުމެވެ. އާންމުކޮށް އެހެން ގައުމަކުން، (ހާއްސަކޮށް ސައުދީ އަރަބިއްޔާ ފަދަ އިސްލާމީ ބޮޑު ގައުމަކުން) ހަނދާ މެދު ގޮތެއް ނިންމައިފިނަމަ އެ ގައުމުން ނިންމި ގޮތަށް ރާއްޖެއިންވެސް އަމަލުކުރެ އެވެ.