މީޑިއާނެޓާއި ޑާކްރެއިން އެންޓަޓެއިންމަންޓް ގުޅިގެން އުފައްދާ ސިޓްކޮމް ރޫމީ އާ ޖަންނަތުގެ ފުރަތަމަ އެޕިސޯޑް މިވަނީ އާ އަހަރާއެކު ބެލުންތެރިންގެ މުނިފޫހި ފިލުވުމަށްޓަކައި ދޫކޮށްލާފައެވެ. ރެއިން ފެށިގެން މީޑިއާނެޓްގެ ސްޓްރީމިން އެޕް "މަލްޓި ސްކްރީން" އިން މި ސިލްސިލާގެ ފުރަތަމަ އެޕިސޯޑް ހިލޭ ބަލާލެވޭނެއެވެ. އަދި މިއީ ނުބަލާ ދޫކޮށްލާވަރުގެ ސިލްސިލާއެއް ނޫނެވެ.
މި ދެތިން މަހު މުނި ފޫހިފިލުވުމުގެ ދާއިރާގައި އެންމެ ބާރަށް ދެކެވެމުން އައި ވާހަކައަކީ ރޫމީ އާ ޖަންނަތުގެ ވާހަކައެވެ. ޑާކް ރެއިންގެ ފަރާތުން މީޑިއާނެޓް އޮރިޖިނަލެއްގެ ގޮތުގައި އުފައްދަމުންދާ މުޅިން އައި ސިޓްކޮމެއްގެ ވާހަކައެވެ. ޑާކްރެއިންގެ ސޯޝަލް މީޑިއާގެ އެންމެހާ ވަސީލަތްތަކާ ޚަބަރުތަކުން ކެނޑިނޭޅި ދައްކަމުން ދިޔައީ މި ސިލްސިލާގެ ވާހަކައެވެ. އޭރު އެނގުނުހާވެސް އެއްޗަކީ މި ސިލްސިލާއަކީ ކޮމެޑީއެއްކަމާ މި ސިލްސިލާގައި މިދާއިރާގެ ނަން މަޝްހޫރު މޫނުތައް ހިމެނިގެން ދާކަމެވެ. ކޮންމެއަކަސް ރޭގެ ބާރަޖެހުމާ ހަމަޔަށް ކުރި އިންތިޒާރުގެ ނިމުން އައީ އާ އަހަރާ އެކު ބަލާލަން ލިބުނު މި އާ ސިޓްކޮމް އާ ހަމައިންނެވެ. ބަލާ ނިމިގެން މި ރިވިއު ލިއުމާ ހަމައަށްވެސް އެ ސިޓްކޮމްގެ އަސަރު އެބަހުއްޓެވެ. އެވާހަކަ ފަހަށް ބާއްވަމާ ހިނގާށެވެ.
ރޫމީ އާ ޖަންނަތަކީ މުހައްމަދު އަލީ (މޮގާ) އަދި އާއިޝަތު ފުއާދު ޕްރޮޑިއުސްކޮށް އާއިޝަތު ފުއާދާއި އަހްމަދު ތަލާލްގެ ސްކްރިޕްޓަކަށް އަލީ ޝިފާއުއާއި މުހައްމަދު ފައިސަލް ޑައިރެކްޓްކޮށްފައިވާ ހެއްވާ މަޖާ ސިލްސިލާއެކެވެ. ރޭ ބަލާލަން މިލިބުނީ 15 އެޕިސޯޑްގެ މައްޗަށް އެކުލެވިގެންވާ ފުރަތަމަ ސީޒަންގެ ފުރަތަމަ އެޕިސޯޑްއެވެ. ފުރަތަމަ އެޕިސޯޑްގައި މައިގަނޑުގޮތެއްގައި ފެނިގެންދަނީ މި ސިލްސިލާގެ އެކި ކެރެކްޓާތަކުގެ ތައާރަފްތަކާ މި ސިލްސިލާގައި ކުރިއަށް ހިނގާނެ ކަންކަމަށް ފަހިކުރާ ހާދިސާތަކެވެ. މިއީ ވަރަށް ކުރުކޮށް މީގެ ވާހަކަ ބުނެލަންޏާ ބުނެވޭނެ އެއްޗެވެ. އެކަމަކު ރޫމީ އާ ޖަންނަތުގެ ވާހަކައަކީ އެހާ ކުރުކޮށް ބުނެވޭނެ އެއްޗެއް ނޫނެވެ. ސަބަބަކީ މި ސިލްސިލާ ޑާކްރެއިންއިން ގެނެސްދީފައިވާ ގޮތެވެ. އެންމެ ފުރަތަމަ މި ފުރަތަމަ އެޕިސޯޑްގެ ކުރު ތައާރަފެއް ދޭނަމެވެ.
މި ސިލްސިލާގެ ފުރަތަމަ އެޕިސޯޑްގައި އެންމެ ފުރަތަމައިނުންވެސް ފެނިގެންދާ އެންމެ ހާއްސަ އެއްކަމަކީ މުޖުތަމައިގައި އާންމުކޮށް އަންހެނުންނާ ފިރިހެނުންނަށް ހާއްސަކުރެވިފައިވާންޖެހޭނެ ކަމަށް ބެލެވޭ ރޯލްތަކަށް ގޮންޖަހާ އެކަން ބަދަލުކޮށްލުމަށް ވިސްނައިގެން ލިޔުންތެރިން ތިބިކަމުގެ ހެއްކެވެ. ރޫމީ (ފުބޫ) އަކީ މި ސިލްސިލާގައި ޝެފެކެވެ. އަދި ޖަންނަތު (ނުޒޫ) އަކީ ސިފައިންގެ މީހެކެވެ. ރޫމީ އަކީ ތަންކޮޅެއް "އީޒީގޮއިން ކާމް" މީހެއްގެ ގޮތުގައި ފެނިގެންދާއިރު ޖަންނަތަކީ އަބަދުވެސް ގޮތުގައި ހުންނަ ޒިންމާދާރު އެހެނަސް ހިތްހެޔޮ މީހެކެވެ. މި ސިލްސިލާގައި މި ދެ ކެރެކްޓަ ގެ ޑައިނަމިކްސް ނުވަތަ ވިސްނުމާ ޚިޔާލުގެ ތަފާތު ކޮމިކަލީ ގެނެސްދޭނެކަމުގެ ނިޝާންތައް ފުރަތަމަ އެޕިސޯޑުންވެސް ފެނިގެން ދެއެވެ. ޖަންނަތާ ރޫމީއާ އުޅެނީ ރައްޓެހި ވެގެންނެވެ. އަދި އެ ގުޅުން ކައިވެންޏާ ހަމައަށް ދިއުމުގެ މަރުހަލާ ފުރަތަމަ އެޕިސޯޑާ ހަމައިންވެސް ފެށެއެވެ. އެހެނަސް ކައިވެންޏަށް ކުރާ ޕްރޮޕޯޒަލްއާ އެއަށްފަހު ދެފަރާތުގެ އާއިލާދިމާވެ ހިނގާ ކަންކަމަކީ އެހާ އާދައިގެ ކަންކަމެއް ނޫނެވެ. މާ ގިނަ ސިއްރުތައް ފަޅާ އަރުވާނުލާ ބުނާކަމުގައި ވަނީނަމަ، ރޫމީގެ ރޭވުންތަކާއި، ޖަންނަތުގެ ވިސްނުމާ މިދެމީހުންގެ އާއިލާގެ ޚިޔާލުތައް ވަރަށްވެސް ތަފާތެވެ. އަދި މީގެ ސަބަބުން ދިމާވާ ހާދިސާތައް އެހާމެ މަޖަލެވެ. ރޫމީގެ އެންމެ ގާތް ދެ އެކުވެރިންނަކީ، ނޫސްވެރިއެއްކަމުގައި އަމިއްލައަށް ގަބޫލުކުރާ، ކަންކަމުގެ ވަރަށް ކަންޖޫސްގޮތެއް ހުންނަ ނެޑީ (ފައިސަލް) އަދި ވިސްނުންތެރިކަމާއެކު ކޮންމެކަމެއް ކުރުމަށްވެސް ވިސްނާ ހަސަން (ރެކްސް) އެވެ. ރޫމީގެ އާއިލާގެ މީހެއްގެ ގޮތުގައި ފެނިގެންދަނީ ރޫމީގެ އެއްބަނޑުއެއްބަފާ ބޭބެގެ ރޯލުން ރުޅިގަދަ ގޮތުގަ ހުންނަ ހިތްގަދަ ކަމަށް ހެދިގެން އުޅޭ ހާދީ (ސައީދު) އެވެ. ޖަންނަތުގެ އާއިލާގެ ފަރާތުން މި އެޕިސޯޑުގައި ފެނިގެންދަނީ ހަމަ ގައިމުވެސް މި އެޕިސޯޑުން އެންމެ ފާހަގަކުރެވުނު އެއް ކެރެކްޓަ ފިލަމީނާ (ޝީލާ) އެވެ. ފިލަމީނާއަކީ ޖަންނަތުގެ ބައްޕަގެ ފަރާތު މީހެކެވެ. އަދި އެއީ ޖަންނަތުގެ މަންމަ ފަދައިން ޖަންނަތަށް ލޯބި ދެމުން އަންނަފަރާތްކަމުގައި ދެކެވިގެން ދިޔަ ބައެއް ވާހަކަ ތަކުން އެނގިގެން ދިޔައެވެ. ފިލަމީނާއަކީ ހާދަހާ ތަފާތު ކެރެކްޓަ އެކެވެ. ތުއިކަމުގެ ތެރެއިން ދޭ ޖަވާބުތަކަކީ ހިތް ހަރު ހާދީވެސް ރާޑިކޮށްލާކަހަލަ ޖަވާބެވެ. ރީތިކަމަށް އެހާ ލޯބިކުރެއެވެ. އަދި ހިތްހަމަ ނުޖެހޭ ކަމެއް ވުމުން މޫނުމަތިން ފެނިގެންދާ ޖަޒުބާތުތަކަކީ ދެވަނައެއް ނެތްފަދަ މަޖާ އެކްސްޕްރެޝަންތަކެކެވެ. އަދި ހަމަ މިއާއެކު ދިވެހި ބަހުން ނޫނީ ވާހަކަ ނުދައްކަން މަސައްކަތްކުރާ ބިއާންކާ (މަރީއާ ތެރޭސާ) ގެ ކެރެކްޓަ އަކީ އޭނަ ބުނާ ކޮންމެ ޖުމްލައެއް ހިނި ނައިސް އަޑު އަހާ ނުލެވޭނެ ކެރެކްޓައެކެވެ.
މި އެޕިސޯޑްގައި ހާދީއާ ނެޑީއާ ދޭތެރޭ ހިނގާ އަރާރުންތަކަކީވެސް އެހާމެ ހެއްވާ ކަންތައްތަކެވެ. އެންމެ ފާހަކަގަކޮށްލެވެނީ އެއްވެސް ސީނެއްގައި މަޖާވެގެން އޯވާ ނުވެ ބަލާމީހުން ހެތްވާލުމަށް މި ސިލްސިލާގެ އުފެއްދުންތެރިން ކޮށްފައިވާ މޮޅު މަސައްކަތެވެ. ކޮންމެ ސީނެއްގައި ފެނިގެންދާ ހެއްވާ ކަންކަމުގެ ކޮމިކް ޓައިމިން ނުވަތަ މަޖާކަންކަން ގެނެސް ދީފައިވާ ވަގުތުތަކާ ގޮތްތައް ހަމަ މާ ފުރިހަމައީއެވެ. ލިޔުމުގައި ގެނެސްފައިވާ ޖޯކްތައް ސްކްރީނަށް ތަރުޖަމާ ކުރުމުގައި ޑައިރެކްޓަރުންގެ ކުޅަދާނަކްނަވެސް ހަމަ މޮޅީއެވެ. އަދި ކޮންމެ ކެރެކްޓައެއްގެ ވަކި ވަކި ހާއްސަ ޓްރެއިޓްތައް އެކްޓަރުން ކެޕްޗަ ކޮށްފައިވާ ގޮތްވެސް ހަމަ ތައުރީފު ހައްގީއެވެ. މިސާލަކަށް ހަސަންގެ ކެރެކްޓަ އަކީ މަޑުމަޑުން އިންނަ މީހެއްކަމުގައިވިޔަސް ނެޑީގެ އެ އަވަސް އަދި އުނދަގޫބޮޑު ކެރެކްޓަ އާ އެކުވެސް އެކަކު އަނެކަކުގެ ހެތްވާ ކަންކަން ނުފޮރުވޭ އަދި އޯވަޝެޑޯ ނުވާގޮތަށް އެއިން ކޮންމެ ކެރެކްޓަ އެއް ހަރަކާތްތެރިވެފައިވާގޮތަކީ ހަމަ ފާހަގަކޮށްލަން ޖެހޭނެކަމެކެވެ. އަދި ތަފާތު ކެރެކްޓަތައް ގެނެސްފައިވާއިރު އެއިން އެއްވެސް ކެރެކްޓަރަކާ ދޭތެރޭ ލިޔުންތެރިންވެސް ޑައިރެކްޓަރުންވެސް އަދި އެކްޓަރުންވެސް ފަރުވާކުޑަކޮށްފައެއް ނުވެއެވެ. މިއީކީ ޑާކްރެއިންއަށް އާ ކަމެއް ވެސް ނޫނެވެ. މީގެ ކުރިން ބޮޑު ސްކްރީންގައި ހައުސްފުލް ޝޯތަކެއް ނިންމާލި މާމުއި އަކީވެސް މިފަދަ އޮންސޯމްބަލް ކާސްޓެއް ހިމަނައިގެން ލިޔެފައިވާ މޮޅު ސްކްރިޕްޓަކާ ޑައިރެކްޝަނެކެވެ. މި ސިލްސިލާގައިވެސް މި ހަރަކާތްތެރިވަނީ ހަމަ އެޓީމެވެ. ކެރެކްޓާތައް ފުރިހަމަ ކުރުމަށް ކޮށްފައިވާ މަސައްކަތަށް އައްސަރިބަހާ ސާބަހެވެ. ބެލުންތެރިން މި ސިލްސިލާ ބަލަންޖެހޭ އެންމެ މުހިންމު އެއް ސަބަބަކީ މި ކެރެކްޓަ ތަކަކީ ބެލުންތެރިންނަށް އެބަޔަކު ދެކެ ލޯބި ނުވެވި ގަޔާ ނުވެވި ނުދާނެ ކެރެކްޓަރ ތަކަކަށް ވާނެތީއެވެ. ހަމަ ގައިމުވެސް ފުރަތަމަ އެޕިސޯޑުންވެސް ދެން ވާނެ ގޮތެއްގެ އިންތިޒާރުކުރަން މަޖުބޫރުކުރުވައިފިއެވެ.
މީގެ އިތުރުން މި ސިލްސިލާގެ މި ފުރަތަމަ އެޕިސޯޑުންވެސް މީގެ ޕްރޮޑަކްޝަން ވެލިއު ރަނގަޅަށް ހާމަވެއެވެ. ގިނަ ހާދިސާތައް ހިނގަނީ އެކަމަށް ހާއްސަކޮށްގެން ފަރުމާކުރެވިފައިވާ އެޕާޓްމަންޓެއްގައެވެ. ސިޓްކޮމްއެއް ކަމަކު މުޅި އެޕިސޯޑްގެ ކުލަޔާ އަޑާ ބެކް މިއުޒިކާ ހުރިހާކަމެއް ފިލްމަކަށް ދުލެއް ނުކުރެއެވެ. މިއިން އެނގެނީ މި ސިލްސިލާއަކީ މޮޅު ސިލްސިލާއަކަށް ހެދުމަށްޓަކައި ޑާކްރެއިންއާއި މީޑިއާނެޓުން ކުރަމުންދާ މަސައްކަތެވެ. މި ސިލްސިލާގެ އިންޓްރޯއިން ފެށިގެންގޮސް ކްރެޑިޓްސް އާ ހަމައަށްވެސް ހަމަ ވަރަށް ފެންވަރު ރަނގަޅެވެ. އަދި އެއްކަމެއް ފާހަގަކޮށްލާނަމެވެ. މި ސިލްސިލާގައި ޖަންނަތަކީ އެމްއެންޑީއެފްގެ ފަޔާ އެންޑް ރެސްކިއުގެ ހިތްވަރުގަދަ ފަޔާ ފައިޓަރކެވެ. މިކަން ގެނައުމަށްޓަކައިވެސް ޑާކްރެއިން އިން ވަނީ އެންމެ ކުޑަ ތަފްސީލަށްވެސް ފަރުވާ ބަހައްޓައިގެން މި ކެރެކްޓަ ފަރުމާކޮށްފައެވެ. އެގޮތުން ޑާކްރެއިންއިން ފާހަގަކުރި ގޮތުގައި މިމަސައްކަތްކޮށްފައިވަނީ އެމްއެންޑީއެފްގެ ވަރަށް ބޮޑު އެހީތެރިކަމާއެކުގައެވެ. އަދި ކުރިއަށް ހުރި އެޕިސޯޑްތަކުގައި މި ކަމުގެ ފުރިހަމަ ނަމޫނާތައް ފެނިގެންދާނެކަމުގައިވެސް ޑާކްރެއިންއިން ހާމަކުރިއެވެ. އެހެންކަމުން މި ސިލްސިލާގައި ޖަންނަތުގެ ހިތްވަރާ އެމްއެންޑީއެފްގެ މުވައްޒަފެއްގެ ހައިސިއްޔަތުން ދައްކާލާ ހާއްސަކަންކަންވެސް ފެނިގެންދިއުމަކީ ހަމަ ވަރަށް އެކަށީގެންވާކަމެކެވެ. ކުރިންވެސް ބުނިހެން މި ސިޓްކޮމްއަކީ ސްލެޕްސްޓިކް ސްޓައިލްގެ އެއްޗެއް ނޫނެވެ.
ހަމަ ކޮންމެގޮތެއް ހަދާފަވެސް މީގެ ފުރަތަމަ އެޕިސޯޑް ބަލަންޖެހެއެވެ. އަންނަންހުރި ހެތްވާ މަޖާ ކަންކަމުގެ މުހިންމު ސިގްނަލްތައް މި އެޕިސޯޑުން ލިބޭތީއާ މި އެޕިސޯޑް ބަލާފަ އަދިވެސް އަހަންނަށް ހުނުން ކޮންޓްރޯލް ނުވެގެން އުޅޭތީވެސް މެއެވެ.