ދިވެހި މުޖުތަމައުގައި ގެވެށި އަނިޔާ ހުއްޓުވަން ބޭނުން ނަމަ ސްކޫލް ކުދިންނާ ހަމައިން ފެށިގެން ގޮސް އުމުރުން ދުވަސްވީ މީހުންނަށް ވެސް އެކަމުގެ މައުލޫމާތު ފޯރުކޮށްދޭން ޖެހޭކަމަށް ޖެންޑާ މިނިސްޓަރު އާއިޝަތު މުހައްމަދު ދީދީ ވިދާޅުވެއްޖެ އެވެ.
ގެވެށި އަނިޔާ ހުއްޓުވުމަށް އެޅޭނެ ފިޔަވަޅުތަކާ ގުޅޭ މައުލޫމާތު ފޯރުކޮށްދީ، އަތޮޅުތެރޭގައި ޕްރޮގްރާމް ހިންގާނެ މުވައްޒަފުން ބިނާކުރުމަށް އިއްޔެ ވަނީ ދެ ދުވަހުގެ ވާޗުއަލް ޓްރެއިނިން ޕްރޮގްރާމެއް ފަށައިފަ އެވެ.
އެ ޕްރޮގްރާމު ފައްޓަވައިދެއްވަމުން މިނިސްޓަރު ދެއްކެވި ވާހަކައިގައި ވިދާޅުވީ ގެވެށި އަނިޔާ ހުއްޓުވޭނީ ހުރިހާ އުމުރެއްގެ މީހުންނަށް ވެސް މައުލޫމާތު ފޯރުކޮށްދީގެން ކަމަށެވެ.
"މުޖުތަމައުގައި ގެވެށި އަނިޔާ ހުއްޓުވަން ބޭނުން ނަމަ ސްކޫލް ކުދިންނާ ހަމައިން ފެށިގެން ގޮސް އުމުރުން ދުވަސްވީ މީހުންނަށް ވެސް މި މައުލޫމާތު ފޯރުކޮށްދޭން އެބަ ޖެހޭ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އެ ސަބަބަށްޓަކައި ގެވެށި އަނިޔާއަށް ހޭލުންތެރި ކުރުމުގެ މަސައްކަތް ކުރެވޭނެ އީޖާދީ ގޮތްތައް ހޯދައި، ކެމްޕޭންގެ ހަރަކާތްތައް ކުރިއަށް ގެންދިއުމަށް އެފްސީއެސްސީން ކުރާ މަސައްކަތުގައި ވީހާވެސް ގިނަ ބަޔަކު ބައިވެރިކުރެވޭތޯ ބަލަން ޖެހޭ ކަމަށެވެ.
"ގެވެށި ގުޅުން" ކެމްޕޭންގެ ތެރެއިން ފެށި އެ ޕްރޮގްރާމުގައި 18 ފެމިލީ އެންޑް ޗިލްޑްރަން ސާވިސް ސެންޓަރަކުން ޖުމްލަ 33 މުވައްޒަފުން ވަނީ ބައިވެރިވެފަ އެވެ.