މީގ ކުރިން ދުބާއީގެ މަޝްހޫރު ހޮޓެލް ގްރޫޕު "ޖުމެއިރަ" އިިން މާލެ އަތޮޅުގައި ހިންގި "ޖުމެއިރާ ވިޓަވެލި" ރިސޯޓު އެޓްމޮސްފިއާގެ އޮޒެން ބްރޭންޑުގެ ދަށުން ހުޅުވަން ނިންމައިފިއެވެ.
އެޓްމޮސްފިއާ ހޮޓެލް އެންޑް ރިސޯޓްސް އިން ބުނީ އެކުންފުނީގެ ކާމިޔާބު ލަކްޒަރީ ބްރޭންޑް "އޮޒެން" ގެ ދަށުން ހިންގާ ރިސޯޓެއްގެ ގޮތުގައި "އޮޒެން ރިޒާވް ވިޓަވެލި ރިސޯޓު" ހުޅުވަން ނިންމާފައިވާ ކަމަށެވެ.
މި ރިސޯޓު ވެސް ހުޅުވާނީ އޮޒެން ބްރޭންޑުގެ ދަށުން ހިންގާ އެހެން ރިސޯޓުތަކެކޭ އެއްގޮތަށް ލަގްޒަރީ ކޮންސެޕްޓު ރިސޯޓެއްގެ ގޮތުގައެވެ. މިއީ އެޓްމޮސްފިއާގެ އޮޒެން ބްރޭންޑު އިތުރަށް ފުޅާކުރުމަށް ކުރާ މަސައްކަތަށް ލިބުނު ކާމިޔާބީއެއް ކަމަށް އެކުންފުނިން ބުންޏެވެ.
ވިޓަވެލީގައި 89 ވިލާ ހުންނާނެކަމަށާއި މަތީ ފަންތީގެ ފަތުރުވެރިންނަށް ބޭނުންވާ ޕްރައިވެސީ މި ރިސޯޓުން ލިބޭނެ ކަމަށް އެޓްމޮސްފިއާ ކުންފުނިން ބުންޏެވެ. ކޮންމެ ވިލާއެއްގައި ޕްރައިވެޓް ޕޫލެއް އޮންނާނެ ކަމަށާއި އެމްވައި ވިޓަވެލި ޔޮޓުގައި ޕްރައިވެޓް އެޑްވެންޗާ ތަކަށް ފަތުރުވެރިންނަށް ފުރުސަތު އޮންނާނެ ކަމަށްވެސް އެޓްމޮސްފިޔާ ކުންފުނިން ބުންޏެވެ.
އޮޒެން ބްރޭންޑުގެ ދަށުން އެޓްމޮސްފިއާ އިން ރާއްޖޭގައި ހުޅުވި ފިރަތަމަ ރިސޯޓަކީ 2016 ވަނަ އަހަރު ހުޅުވި އޮޒެން މާދޫ އެވެ. އެ ކުންފުނިން ރާއްޖޭގައި ހިންގާ އިތުރު ރިސޯޓުތަކުގެ ތެރޭގައި އެޓްމޮސްފިއާ ކަނިފުށި، އޮބްލޫ ބައި އެޓްމޮސްފިއާ އެޓް ލެނގެލި، އޮޒެން ބައި އެޓްމޮސްފިއާ އަދި އޮބްލޫ ސެލެކްޓް އެޓް ސަންގެލިގެ އިތުރުން ވަރު ބައި އެޓްމޮސްފިއާ ހިމެނެއެވެ.