މިހާރު ފެތުރެމުންދާ ކޮރޯނާ ވައިރަސް ނުވަތަ ކޮވިޑް-19 އަށް ޕޮޒިޓިވް ވިތާ ހަ ހަފުތާ ފަހުން ޔުވެންޓަސްގެ ފޯވަޑް، ޕައުލޯ ޑިބާލާ އެ ބަލިން ފަސޭހަވެފައިވާ ކަމަށް އޭނާ ބުނެފި އެވެ.
ކޮވިޑް-19 އަށް ޕޮޒިޓިވްވި ކަން ޑިބާލާ އެންމެ ފުރަތަމަ އިއުލާން ކުރީ މާޗު މަހުގެ 21 ގަ އެވެ. އޭނާ އާއި އޭނާގެ ލޯބިވެރިޔާވެވެސް އޭރު ޕޮޒިޓިވް ވި އެވެ. ޑިބާލާ އާ ދާދި އެއްކޮށް ކަހަލަ ގޮތަކަށް، ކޮވިޑް ޖެހުނު ޔުވެންޓަސްގެ ޑިފެންޑަރު، ޑެނިއަލް ރުގާނީ އާއި މިޑްފީލްޑަރު ބްލޭސް މަޓްއީޑީ ވެސް ވަނީ މީގެ ދުވަސްކޮޅެއް ކުރިން ކޮވިޑް-19 އިން ރަނގަޅުވެފަ އެވެ.
ޑިބާލާ އިންސްޓަގުރާމުގައި މިރޭ ކުރި ޕޯސްޓެއްގައި ބުނީ، ހަ ހަފުތާއަށްފަހު މިހާރު އޭނަގެ ހަށިގަނޑުގެ ތެރޭގައި ކޮރޯނާ ވައިރަސް ނެތް ކަމަށެވެ. އަދި އޭނަ އެބަލިން ފަސޭހަވެފައިވާ ކަން ޔުވެންޓަސްއިން ވެސް މިރޭގެ ވަގުތެއްގައި ވަނީ ޔަގީންކޮށްދީފަ އެވެ.
"ޑިބާލާ އެންމެ ފަހުން ކޮރޯނާ ވައިރަހަށް ކުރި ދެ ޓެސްޓްގެ ނަތީޖާ ވެސް ވަނީ ނެގެޓިވް ވެފައި،" ޔުވެންޓަސްއިން ބުނެފައިވެ އެވެ.
އުމުރުން 26 އަހަރުގެ ޑިބާލާ ކޮރޯނާ ވައިރަހުން ރަނގަޅުވި އިރު ޔުވެންޓަސްއިން އަންނަނީ އަންނަ މަހުގެ ތެރޭގައި ހުއްޓިފައިވާ އިޓާލިއަން ލީގު ފެށުމަށް ތައްޔާރުވަމުންނެވެ. އެގޮތުން ގައުމުން ބޭތުގައި ތިބި ކުޅުންތެެރިންވެސް އަނބުރާ އިޓަލީއަށް އައިސްފައިވާ އިރު މި މަހުގެ ތެރޭގައި ރަސްމީކޮށް ޕްރެކްޓިސްތައް ފަށާނެ ކަމަށް އެކުލަބުން ވަނީ ބުނެފަ އެވެ.
ކޮރޯނާ ވައިރަހުގެ އަސަރު އެންމެ ބޮޑަށް ކުރި އިޓަލީން އެގައުމުގެ ކުޅިވަރުގެ ހުރިހާ ހަރަކާތެއް މެދުކަނޑާލީ މާޗު މަހުގެ ކުރީކޮޅު އެވެ. އޭގެ ފަހުން މިހާރު ދެމަސް ދުވަސް ވެފައިވާ އިރު އިޓަލީގެ ހާލަތު މިހާރު ވަނީ ބޮޑުތަނުން ރަނގަޅުވެފަ އެވެ.