ތޫނިސް (އޮކްޓޯބަރ 14) : ހުޅަނގު އެފްރިކާގެ އަރަބި ގައުމެއްކަމަށްވާ ތޫނިސްގައި ބޭއްވި ރިޔާސީ އިންތިހާބުގެ ދެވަނަ ބުރު ކާމިޔާބުކުރައްވައިފިކަން އެ އިންތިހާބުގައި ވާދަކުރެއްވި ގައިސް ސައީދު އިއުލާނުކުރައްވައިފިއެވެ.
އިއްޔެ ބޭއްވި ދެވަނަ ބުރުގެ ވޯޓުލުން ނިމުނުތާ ހައެއްކަ ގަޑިއިރު ތެރޭގައި ސައީދު ވިދާޅުވީ އޭނާއާ ވާދަކުރެއްވި ނަބީލް އަލްގުރަވީގެ މައްޗަށް ބޮޑުތަފާތަކުން އޭނާއަށް ވޯޓުލިބެމުންދާކަން އެގްޒިޓް ޕޯލްތަކުން ސާފުވެފައިވާ ކަމަށާ ވޯޓުގެ 70 އިންސައްތަ ލީޑުކުރައްވަނީ އޭނާ ކަމުގައެވެ. މިނިވަން ކެންޑިޑޭޓެއްގެ ގޮތުގައި ކުރިމަތިލެއްވި ގައިސް ސައީދަކީ ގާނޫނީ ދާއިރާގެ ކުރީގެ ޕްރޮފެސަރެކެވެ. އޭނާއަކީ މީގެ ކުރިން ސިޔާސީ ދާއިރާގައި ހަރަކާތްތެރިވެ ވަޑައިގެންފައިވާ ބޭފުޅެއް ނޫނެވެ.
މިދިޔަ މަހުގެ ކުރީކޮޅު ތޫނިސްގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ގައިސް ސައީދަށް ވޯޓުގެ 18.4 އިންސައްތަ ލިބިވަޑައިގެންނެވިއިރު އޭނާއާ އެންމެ ގާތުން ވާދަކުރެއްވި ނަބީލް އަލްގުރަވީއަށް ލިބިވަޑައިގެންފައިވަނީ 15.6 އިންސައްތަ ވޯޓެވެ. ވޯޓުލުމަށްފަހު ނުކުންނަ މީހުންގެ މެދުގައި ނަގާ އެގްޒިޓް ޕޯލުގެ ނަތީޖާ ދައްކާގޮތުން ގައިސް ސައީދަށް ވޯޓުގެ 70 އިންސައްތަ ލިބެއެވެ.
ގައިސު ސައީދަށް ލިބުނު ކަމިޔާބީއާއެކު އޭނާގެ ސަޕޯޓަރުން އުފާފަޅުކުރަމުން ދިޔަނަމަވެސް ތޫނިސްގެ އިންތިހާބުތަކާ ބެހޭ އިދާރާއިން އަދި ވަކި އެއްޗެއް ބުނެފައެއް ނުވެއެވެ. ވަގުތީ ނަތީޖާ އިއުލާން ކުރެވޭނީ ހުރިހާ ވޯޓުފޮށިތަކެއް ގުނައި ނިމުމުންކަމަށް އެ އިދާރާއިން ބުނެފައިވެއެވެ.
ތޫނިސްގައި މިދިޔަ ސެޕްޓެމްބަރުމަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި 27 ކެންޑިޑޭޓުން ވާދަކުރެއްވިއިރު އޭގެތެރޭގައި ގައިސް ސައީދުއާއި ނަބީލް އަލްގުރަވީއަށްވުރެ ސިޔާސީ ގޮތުން މާ ނުފޫޒުގަދަ، އަދި ތޫނިސްގެ ބޮޑުވަޒީރުކަމާއި ވަޒީރުކަމާއި އެނޫންވެސް އިސް މަގާމުތައް ދިގުމުއްދަތަކަށް އަދާކުރައްވާފައިވާ ގިނަ ކެންޑިޑޭޓުން ހިމެނިވަޑައިގެންނެވިއެވެ. ނަމަވެސް ފުރަތަމަ ބުރުން އެއިން އެއްބޭފުޅަކަށްވެސް 15 ޕަސަންޓު ވޯޓުވެސް ލިބިވަޑައިގެންފައެއް ނުވެއެވެ.
ގައިސް ސައީދު ވަނީ އޭނާ ރައީސްކަމުގެ ހުވާކުރެއްވުމަށްފަހު ފުރަތަމަ ޒިޔާރަތް ކުރައްވާނީ ތޫނިސްގެ އަވަށްޓެރި އަރަބި ގައުމެއްކަމަށްވާ އަލްޖީރިއާއަށް ކަމަށް ވިދާޅުވެފައެވެ. އަދި ތޫނިސްގެ އަވަށްޓެރި ލީބިޔާއަށް ޒިޔާރަތް ކުރައްވައި ލީބިޔާގައި އުފެދިފައިވާ ވެރިކަމުގެ އަރާރުންތަކުގެ މައްސަލަ ހައްލުކޮށް ލީބިޔާއަށް ސުލްހަ ގެންނަން މަސައްކަތް ކުރައްވަން ގަސްދުކުރައްވާ ކަމަށްވެސް ވިދާޅުވިއެވެ.
(އަލްޖަޒީރާ)