ވޯޓު ކަރުދާހުގައި ކުރަހައި ނުވަތަ ލިޔެފިނަމަ އެ ވޯޓު ބާތިލުވާ ގޮތަށް ގެނައި އިސްލާހަށް ރައްޔިތުން ހޭލުންތެރިކުރުމަށް އެންމެންގެ އެހީތެރިކަން ބޭނުނުވާ ކަމަށް އިލެކްޝަންސް ކޮމިޝަނުން ބުނެފިއެވެ.
ވޯޓު ކަރުދާހުގައި ކުރަހައި ނުވަތަ ލިޔެފިނަމަ އެ ވޯޓެއް ބާތިލުވާ ގޮތަށް އިންތިހާބުތަކާ ބެހޭ އާންމު ގާނޫނަށް ގެނައި އިސްލާހު ރައީސް އިބްރާހިމް މުހައްމަދު ސޯލިހު މިއަދު ވަނީ ތަސްދީގު ކޮށްފައެވެ.
އެ އިސްލާހު ރައްޔިތުންގެ މަޖިލީހުން މަޖިލީހުން ފާސްވެގެން ދިޔައީ މިދިޔަ ހަފްތާ ހޯމަ ދުވަހު ވޯޓުގައި ބައިވެރިވި 53 މީހުންގެ ވޯޓުންނެވެ. އެ އިސްލާހު ހުށަހެޅުއްވީ އިދިކޮޅު މައި ޕާޓީ، ޕީޕީއެމްގެ ފަރާތުން އައްޑޫ ސީޓީ ހުޅުދޫ ދާއިރާ މެމްބަރު މުހައްމަދު ޝާހިދެވެ.
"އަޅުގަނޑުމެން މި އެދެނީ ރައްޔިތުންގެ ކިބައިން، ސިޔާސީ ޕާޓީތަކުގެ ކިބައިން އަދި ކެންޑިޑޭޓުންނާއި އެހެނިހެން ޖަމިއްޔާ ޖަމާއަތްތަކުގެ ކިބައިން [މކަމަށް ރައްޔިތުން ހޭލުންތެރިކުރުމުގައި] އަޅުގަނޑުމެންނަށް އެހީތެރިކަން ފޯރު ކޮށްދިނުމަށް،"އީސީ ތަރުޖަމާނު، އަހްމަދު އަކްރަމް
އިލެކްޝަންސް ކޮމިޝަންގެ މެމްބަރު އަދި އެކޮމިޝަންގެ ތަރުޖަމާނު އަހްމަދު އަކްރަމް މިއަދު ކުރެއްވި ޓްވީޓެއްގައިި ވިދާޅުވީ، މިއަދު ތަސްދީގުކުރެވުނު އިސްލާހާއެކު ވޯޓު ކަރުދާހުގައި ރަނގަޅު ފާހަގައިގެ އިތުރުން އެއްވެސް ފާހަގައެއް ޖަހައިފިނަމަ ވޯޓު ބާތިލުވާނެ ކަމަށެވެ. އަދި އެ ކަމަށް ރައްޔިތުންގެ ހޭލުންތެރިކަން ކުރުވުމަށް އެންމެންގެ އެހީތެރިކަން ބޭނުންވާ ކަމަށް އަކްރަމް ކުރެއްވި ޓްވީޓެއްގައި ވިދާޅުވިއެވެ.
Vote karudhaas kolhugai rangalhu faahagaige ithurun ehves kurehumeh nuvatha liyumeh nuvatha faahaga eh jahaifi nama e karudhaaskolheh baathil vaane, mikamah rahyithun heylutheri kuruvumah ehmenge eheetherikan beynun. pic.twitter.com/MsL75VQx8K
— Ahmed Akram (@akram4535) March 12, 2019
އެކަމާ ގުޅޭގޮތުން އިތުރު ތަފްސީލު ދެއްވަމުން އަކްރަމް ވިދާޅުވީ، އެ ބަދަލަކީ އެ ކޮމިޝަނުން ވަރަށް ގިނަ ދުވަސްތަކެއް ވަންދެން އިންތިޒާރު ކުރަމުން އައި ބަދަލެއް ކަމަށާއި ނަމަވެސް މި ބަދަލު އައިސްފައިވަނީ އިންތިހާބަށް ވަރަށް ކުޑަ ދުވަސްކޮޅަކަށް ވެފައި ވަނިކޮށް ކަމަށެވެ.
"ކޮމިޝަނުން މަސައްކަތް މި ކުރަނީ މި ކުޑަ ދުވަސްކޮޅުތެރޭ މިކަމަށް ރައްޔިތުން ވަރަށް ބޮޑަށް ހޭލުންތެރި ކުރެވޭތޯ. އަޅުގަނޑުމެން މި އެދެނީ ރައްޔިތުންގެ ކިބައިން، ސިޔާސީ ޕާޓީތަކުގެ ކިބައިން އަދި ކެންޑިޑޭޓުންނާއި އެހެނިހެން ޖަމިއްޔާ ޖަމާއަތްތަކުގެ ކިބައިން [އެކަމަށް ރައްޔިތުން ހޭލުންތެރިކުރުމުގައި] އަޅުގަނޑުމެންނަށް އެހީތެރިކަން ފޯރު ކޮށްދިނުމަށް،" އަކްރަމް ވިދާޅުވިއެވެ.
އަކްރަމް ވިދާޅުވީ، އިލެކްޝަންސް ކޮމިޝަނުން މިހާރުވެސް ހިންގަމުން ގެންދާ ޕްރޮގްރާމް ތަކުގައި އެ އިސްލާހާ ގޫޅޭގޮތުން ރައްޔިތުން ހޭލުންތެރިވުމުގެ މަސައްކަތް ކުރަމުން ދާ ކަމަށެވެ.
އިލެކްޝަންސް ކޮމިޝަންގެ ތަރުޖަމާނު އަހްމަދު އަކްރަމް މީގެ ކުރިން ނޫސްވެރިންނަށް ދެއްވި އިންޓަވިއުއެއްގެ ތެރެއިން: އެނާ ވިދާޅުވަނީ ތަސްދީގު ކުރި އިސްލާހަށް ހުރިހާ ފަރާތްތަކުގެ އެހީތެރިކަން ބޭނުންވާ ކަމަށް -- ސަން ފައިލް ފޮޓޯ/ މުހައްމަދު މުޒައްޔިން ނާޒިމް
އަންނަ މަހު ހަވަނަ ދުވަހު ބާއްވާ މަޖިލިސް އިންތިހާބަށް މިހާރު އޮތީ 25 ދުވަހެވެ. 25 ދުވަސް ތެރޭ މިކަމަށް ރައްޔިތުން ހޭލުންތެރި ކުރެވިދާނެ ކަމަށް ގަބޫލުފުޅު ކުރައްވަންތޯ ސުވާލު ކުރުމުން އަކްރަމް ވިދާޅުވީ، ރައްޔިތުންގެ އެހީތެރިކަމާ ނުލާ އެކަން ކުރުމަށް ވަރަށް އުދަގޫ ވާނެ ކަމަށާއި ނަމަވެސް ރައްޔިތުންގެ އެހީތެރިކަމާއެކު އެއީ ކުރެވިދާނެ ކަމެއް ކަމަށެވެ.
"އެންމެ އެކައްޗެއްގެ ގޮތުގައި ކުރިއަށް ގޮއްސި ނަމަ މިކަން އަޅުގަނޑުމެންނަށް ކުރެވޭނެ. އަލުގަނޑުމެން މިތިބީ ވަރަށް ފޫގަޅާއިގެން. އިރާދަކުރެއްވިޔާ އަޅުގަނޑުމެންނަށް މިކަން ވާނެ،" އަކްރަމް ވިދާޅުވިއެވެ.
ވޯޓު ކަރުދާހުގައި ކުރަހައި ނުވަތަ ލިޔެފިނަމަ އެ ވޯޓު ކަރުދާސް ބާތިލުވާ ގޮތަށް އިންތިހާބުތަކާ ބެހޭ އާންމު ގާނޫނަށް ގެނައި އިސްލާހު ތަސްދީގުކޮށް މިއަދު ގެޒެޓްގައި ޝާއިއުކޮށްފައިވާއިރު، މި އިސްލާހަށް އަމަލު ކުރަން ފެށުމަށް ހަމަޖެހިފައިވަނީ ތަސްދީގު ކުރާ ދުވަހުން ފެށިގެންނެވެ.