ކުރިއަށް އޮތްތަނުގައި ވެސް ތާއީދު ކުރާނީ އެމްޑީޕީއަށް ކަމަށް ކުރީގެ މާލޭ ސިޓީ ކައުންސިލުގެ މޭޔަރު އަދި މިފަހަރު ރައްޔިތުންގެ މަޖިލީހުގައި މައްޗަންގޮޅި އުތުރު ދާއިރާއަށް ވާދަކުރައްވާ ކެންޑިޑޭޓް ސަރަނގު އާދަމް މަނިކު ވިދާޅުވެއްޖެ އެވެ.
ސަރަނގު އާދަމް މަނިކަކީ އެމްޑީޕީގައި ގިން ދުވަސްތަކެއް ވަންދެން އުޅުއްވި އެޕާޓީގެ ރައީސް އަދި ކުރީގެ ރައީސް މުހައްމަދު ނަޝީދާ އަރިސްކޮށް އުޅުއްވި ބޭފުޅެކެވެ. އޭރު އާދަމް މަނިކު މާލޭ ސިޓީ ކައުންސިލަށް އިންތިހާބުވީވެސް އެމްޑީޕީ ޓިކެޓްގަ އެވެ.
މައްޗަންގޮޅި އުތުރު ދާއިރާއަށް ވާދަކުރައްވުމަށް ރަސްމީކޮށް ކެމްޕެއިން ލޯންޗުކުރުމަށް މިރޭ ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން އާދަމް މަނިކު ވިދާޅުވީ އޭނާއަކީ "ވަރަށް ބޮޑަށް އެމްޑީޕީއަށް ތާއީދުކުރާ އަދި ކުރިއަށް އޮތްތަނުގައިވެސް އެމްޑީޕީއަށް ހިދުމަތް ކުރާނެ މީހެއް" ކަމަށެވެ.
" އަޅުގަނޑުގެ ވިސްނުން އެމްޑީޕީއާ ރައީސް ނަޝީދާ ދުރަކަށް އެއްވެސް ހާލެއްގައި ނުދާނެ. މިތާގައި ހުރި ފޮޓޯތަކަށް ބައްލަވާލެއްވީމަވެސް އެކަން އެނގޭނެ." އާދަމް މަނިކު ވިދާޅުވި އެވެ.
މައްޗަންގޮޅި އުތުރު ދާއިރާއަށް ވާދަކުރައްވާ އާދަމް މަނިކު ކެމްޕެއިން ލޯންޗް ކުރުމުގެ ޖަލްސާގެ ތެރެއިން --- ސަންފޮޓޯ/ ފަޔާޒު މޫސާ
އެމްޑީޕީއަށް ތާއީދުކުރާ މީހެއްގެ ގޮތުގައި ހުންނަވާ ސަބަބުތަކެއްވެސް އާދަމް މަނިކު ދެއްކެވި އެވެ. ވިދާޅުވީ މިގައުމަށް މި ފަހުން އައި ކޮންމެ ކުރި އެރުމަކީ އަދި ކޮންމެ ބަދަލަކީވެސް އެމްޑީޕީން މަސައްކަތްކޮށްގެން ގެނައި ބަދަލުތަކަކަށް ވާތީ ކަމަށެވެ. އެމްޑީޕީން މަސައްކަތް ކުރަނީ ވަކި ފަރުދެއް ނުވަތަ ވަކި ވިޔަފާރިވެރިއެއްގެ މަސްލަހަތު އިސްކުރަން ނޫން ކަމަށާއި އެމްޑީޕީން އަކީ ހުރިހާ ރައްޔިތުންގެ ޕާޓީއެއް ކަމަށް ވިދާޅުވެ އާދަމް މަނިކު ވަނީ އެމްޑީޕީއަށް ވަރަށް ބޮޑަށް ތައުރީފު ކުރައްވާފަ އެވެ.
ލޭބާ ޕާޓީގެ ވަގުތީ ހިންގާ ކޮމިޓީގެ ރައީސް އަދި ގާނޫނީ ވަކީލު އަބްދުﷲ ހަސީންވެސް ވަނީ އެ ކެމްޕެއިން ލޯންޗް ކުރުމުގެ ޖަލްސާގައި ވާހަކަފުޅު ދައްކަވާ ސަރަނގު އާދަމް މަނިކަށް ތާއީދު ކުރައްވާކަން ހާމަ ކުރައްވާފަ އެވެ.
ހަސީން ވިދާޅުވީ މައްޗަންގޮޅިގެ މަޖިލިސް ގޮނޑިއަށް އެންމެ އެކަށީގެންވާ މައްޗަންގޮޅިގެ ދަރިއަކީ ސަރަނގު އާދަމް މަނިކު ކަމަށެވެ. ލޭބާ ޕާޓީން އާދަމް މަނިކަށް ތާއީދު ކުރުމަށް އެދި އެޕާޓީގެ ކައުންސިލަށް ހުށަހަޅާނެ ކަަމަށްވެސް ހަސީން ވަނީ ވިދާޅުވި އެވެ.
މައްޗަންގޮޅި އުތުރު ދާއިރައަށް އެމްޑީޕީން ވާދަކުރަނީ މިހާރު މާލޭ ސިޓީ ކައުންސިލުގެ މެމްބަރު މުހައްމަދު ރަޝީދު (ބޯދިގު ރަޝީދު) އެވެ. އަދި ރައީސް މައުމޫނުގެ ދަރިކަލުން މިޙާރު ދިއްގަރު ދާއިރާގެ މެމްބަރު އަހުމަދު ފާރިސް މައުމޫނުވެސް ވާދަކުރައްވަނީ އެދާއިރާ އަށެވެ.